"وَرْمَشا" كلمة كان يرددها طفل صغير يقصد فيها شاورما. 

هذا الطفل هو صاحب المطعم فهد الغفيص اللي أفنى أيامه في اتقان صنع شاورما خفيفة ولذيذة.

وَرْمَشا هو مطعم هدفه بسيط، انه يتقن لقمة الشاورما. لكن الشاورما بحد ذاتها مب شي بسيط.

كل تفاصيل الشاورما مهمة ويبغى لها من يتقنها. وهذا اللي سواه فهد في مشروعه. 

أول ما تدخل المطعم تحس انك داخل غواصة مائية.. لكنها تغوص بالثوم العطري اللذيذ. 

الشاورما تركيبة غذائية، كل عنصر منها مهم جدًا، كلّهم يتماسكون عشان يقدمون لك طعم واحد لذيذ ويعلق بالراس. 

وهذا الي اشتغل عليه صاحب المطعم فهد بعد ما قعد سنة يطوّر في المنتج.

بدأت السالفة بوقت كورونا. مع استغلال الوقت بالتجارب والتطوير والتذوق. طول هالفترة كان فهد يذوّق الشاورما للأهل والأقارب والأصدقاء، لين ما طلع معه المنتج في نسخته النهائية المتقنة الرهيبة. 

فأي مطعم جاي من شخص طباخ واشتغل بكل حب وشغف على منتجه، بيكون لذيذ. ولا خيّب أملنا ابداً. 

هذي المعلومة حقيقية: فهد ​​صاحب المطعم كان يأخذ له ملعقة ثوم قبل النوم، لأسباب غير متعلقة بالصحة ولا بالمناعة.

السبب الحقيقي هو اهتمام فهد بنجاح صوص الثومية اللي يخليك تنام نومة هنية بدون شعور بغثّة أو حرقان. 

في مرحلة إعداد الوصفات حرص صديقنا فهد ان تجربته مع ثومية وَرْمَشا تكون لذيذة لما تاكلها، وان تستمر التجربة الإيجابية بعد الأكل. فهد الغفيص أصبح المعلّم الأول في تجربة ما بعد الشراء -والأكل- 

فهد هو اللي ابتكر الصوصات شخصيًا، قعد فترة طويلة لين ما يتقنها وكوّن تركيبتها وذاقها بنفسه 

عنده صوص ورمشا الخاص المكون من مايونيز وفلفل ابيض وأسود، و٤ مكونات اضافية سرّية يبغاك فهد تكتشفها بنفسك. 

لمن تروح مطعم متنوع في طلباته، أول شي لازم تختبره هو الطلب الأصلي.

شاورمتهم الكلاسيكية موزونة وخفيفة وأهم شي لذيذة. يستخدمون جودة عالية من الدجاج الأوكراني، الي يعتبر أجود أنواع الدجاج الي ممكن تستخدمه لمطعم شاورما. كله عشان يرضينا ويعطينا لقمة الشاورما المثالية. يا حظكم يا فخر الشرق.

تخيل معنا فطيرة جبنة عكاوي… لكن بوسطها شرايح شاورما! وهذا مب سر في المطعم، هذا طلب موجود في المنيو بكل وضوح. وتقدر تطلبه! سبحان الله. والحمدلله، والله اكبر.

صحن البطاطس هذا فوقه شاورما وصوص لذيذ. وصف بسيط. بس ذقه واحتمال تحس انه الذ شي ذقته بالمطعم. وضايفين فوقه زيادة فلفل حار مقطع مشوي عشان يعطيك لذعة ضرورية ما كنت تدري انك تحتاجها.

غير الشاورما، عندهم فطاير لذيذة خفيفة يعجنونها عندهم بالمحل. جرب السبانخ!

‎ 

كانت هذي تاسع لستاتنا في لستة "مطعم الأسبوع".

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب