فيه نقاش طويل متكرر مسبب لنا مشكلة، وهو: وش نأكل اليوم؟

هذا النقاش كان دافع لنا نبتكر نشرة توصل لك بشكل أسبوعي. الأكل مهم في حياتك لأنه أكثر من مجرد احتياجات تغذوية تحرقها في عملية الأيض. 

الأكل هو فعل اجتماعي، وتعبير ثقافي، وعلاج نفسي. الأكل يجمعنا، يفرّقنا، يشبعنا، ويونّسنا. 

الأكل هو العيشة، وما فيه أجمل من عيشتنا.

سلسلة محتوى نذكر فيها توصية لمطعم واحد من مدينة الرياض أسبوعيًا. 
تنقسم هذي المطاعم لثلاث أنواع حسب سوق مطاعم مدينة الرياض، بنعلمك عنها بعدين...
في كل لستة بنحدد مطعم، ونعلّمك من أي نوع هو، ووش أعجبنا فيه، وأخيرًا وش الطبق المفضّل منه.

‎ ‎ 

بدأ هذا المطعم سنة ٢٠٢٢ في مدينة الرياض، وتحوّل لوجهة مفضلة للجالية الصينية اللي ازدادت زياراتهم بشكل كبير للعاصمة، لدرجة متأكدين إنك بتصادف واحد إذا تغديت هذا الويكند في هذا المطعم.

في الصورة أعلاه تلقى (أحمد الصيني) يستمتع بوجبة الغداء بصحبة أصدقائه في مطعم دولان، حزّر أي واحد هو؟

هذا المطعم العائلي الصغير في حيّ الفلاح يقدّم أكل صيني يتميّز إنه من المطبخ الأويغوري.
يطبخ طعامه بطريقة تقليدية، ويقدم طبق "اللغمن" اللي يعد واحد من أقدم أشكال النودلز في العالم. 

هذي النودلز تنعجن يوميًا في مطعم دولان بشكل يدوي.

يتميّز هذا المطبخ بتنوّع الأطباق: تقدر تأكل لغمن أو سومن، أو رز البخاري -بيلاف- لحم، لكن اللي أسعد معدتنا كانت مأكولات من آسيا الوسطى مثل المنتو أو الفرموزا، حجمها كبير ومشبع.

إذا اشتهيت المنتو، أو الفرموزا أو الكومش ننصحك تكلمهم هاتفيًا تحجزها لأنها يمكن تخلّص عليك بعد زحمة الغداء.

المطعم موجود في تطبيقات التوصيل لكن بمنيو محدود نسبيًا، لذلك ننصحك تستمع بأطباقه الشهية بالطريقة التقليدية: بإنك تأكله محلّي.

الأيغور هم بدو عاشوا تاريخيًا في صحراء تكلامكان، اللي كانت نقطة عبور لطريق الحرير التجاري، لذلك الأثر الصيني على المطبخ الأويغوري كبير، نفس المكونات والبهارات، وحتى طريقة الطهي بالقلي السريع - ستر فراي -

‎ ‎ 

كانت هذي أول نشراتنا في لستة "مطعم الأسبوع".

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب

نشوفك في العدد الجاي١