الطايف مدينة في غرب المملكة العربية السعودية تقع في منطقة مرتفعة عن سطح البحر وهذا اللي يخلّي جوها عليل. وش عندك في الويكند؟ ليه ما تروح الطايف؟ ليه ما تجرّب الشاهي الطايفي في الطايف؟ ليه ما تمسك خط للطايف؟ الطايف مدينة ما تقدر تنزل لها.. عشان تروح لها لازم تطلع فوق، جسديًا وذهنيًا. 

الطايف هيّ عروس المصايف.. أجمل وصف انقال عنها هو انها قطعة من الشام أخذتها الملائكة لتطوف حول البيت الحرام، وتاريخيًا كانت هيّ مصيف ملكي لملوك مملكتنا الحبيبة، كان المؤسس طيّب الله ثراه يقضي صيفه في قصر شبرا، والملك فيصل رحمة الله عليه يقضي صيفه في بيت الكاتب. 

الطايف ماهي بحديثة عهد على السياحة، من قديم الزمان وكل العرب يسافرون لها عشان يزورون سوق عكاظ، الفعالية اللي ما زالت مستمرة بعد ما تم إعادة احياءها قبل عشر سنوات؛ والطايف أثرت المشهد الفني في السعودية، هي اللي ألهمت العميد الموسيقار طارق عبدالحكيم انه يلحن أجمل المقاطع الموسيقية في الأغنية السعودية، وهي ردّت صدى صوت ابتسام لطفي يوم غنّت: لا تطل بالله بعدك. 

وكأن الطايف تقولك: يا سعودي، ياللي عندك إجازة مدارس، ياللي ودك تسافر، ياللي رحت للطايف وأنت صغيّر لا تطل بالله بعدك.. فليس يحلو العيش بَعدك. 

شكر خاص لعبدالله الكناني ووائل مرقص على صناعتهم لخط الطايف، هذا الخط الجميل اللّي جمّل عناوين اللستة.

في هذي اللستة بنأخذكم في جدول يومي لليلة من ليالي الطايف، نسّقها ورتبها لنا مخرجنا الفذ فيصل، ووثقها بفيديو رهيب بننشره بكرا. نبدأ من القهوة، قد سمعت عن المقهى النحاسي؟ 

اسم المقهى الحقيقي هو كوبراري وهو مأخوذ من كلمة Cup و Library لأن عندهم مكتبة تقدر تاخذ منها كتاب تقراه وأنت تشرب قهوتهم اللذيذة أو تستعيره منهم بعربون يرجعونه لك بعد ما تعيد الكتاب٬ وإذا بغيت تقدر تحضر أحد جلسات القراءة اللي يقيمونها في المقهى وتناقش الكتاب مع الكاتب نفسه.

أكثر ما يميز المكان هو تصميمه الكلاسيكي الجميل٬ فكرته يخليك تحس انك في بيت ريفي ويهيئ لك أفضل جو للقراءة٬ صاحب المقهى واللي صمم المكان مع عائلته يشبّه المكان بأنه يشبه ديكورات مسلسل Anne على نيتفلكيس. وبالنسبة لمسمى (المقهى النحاسي) قال صاحب المكان انه يوم حط اسم المقهى على قوقل صار يطلع لهم بالعربي بهذي الترجمة الغريبة ومن بعدها لزق فيهم الاسم بدون قصد.. وكذا تكسب الأشياء أساميها. 

المقهى النحاسي موجود في الحي الملكي٬ حيّ الخالدية، سمّي هذا الحي بالخالدية نسبة للملك خالد رحمه الله، وهو حيّ راقي فخم مليان تحف معمارية، اذا بتتجوّل فيه احرص تلبس نظّارة شمسية: لأن انعكاس الشمس على قطع الرخام الفاخر اللي تجمّل القصور قد يكون عالي شويّ.  

يصلح للتمشية برجلك أو بالسيارة٬ ولا تخاف إذا سمعت صوت أغاني وأنت ما شغلت شي٬ هذا صوت حي الخالدية٬ حيّ من كثر ماهو فخم وراقي فيه موسيقى تصويرية خاصة به.

ممكن تقول ان مطعم أهلا و سهلا هو نسخة مطعم ماما نورة لأهالي الطائف. لكن هل ماما نورة عندهم نافورة بوسط مطعمهم؟ إذا لا أيهم اللي فعلاً أحسن؟ ما ودنا نزعّل ماما نورة بس يا حظ أهل الطايف في هذا المطعم: المكان كبير و نظيف و كله نوافير بأنواع مختلفة. الكبيرة و الصغيرة و المصخرة و المشجرة و ثريات. و التصميم رخامي كأنك في قصر شامي مصغّر. 

مالك هذا المطعم ضابط سابق في العسكرية٬ لذلك نظام المطعم زي نظام مطابخ الميز. وش هو الميز؟ كلمة أوردية معناها الطاولة لكن عندنا في السعودية معناها المطبخ اللي ياكلون فيه العساكر في عملهم. عندهم قائمة كبيرة جداً من المأكولات من ضمنها المفاطيح و كباب الاسكندر و أنواع كثير من الحلى.

في الطايف إذا بغيت تلعب بولينج٬ بلياردو٬ تنس٬ سوني٬ بلوت تقدر في أي وقت تقريباً لأن قيمز سكوير فاتح لين ٥ الفجر٬ وأنت هناك لا تفوتك قهوة ميرلو وخذلك كوب قهوة من عندهم، مقهى ميرلو هو مقهى سوّاه الفنان السعودي صالح اليامي.. ولهم ثلاث فروع. 

اذا اشتهيت تلعب بلوت في الطايف لازم تعرف أن أسامي أشكال الورق تختلف هناك، الهاص يسمّونه لال. 

من أكبر المطاعم في الطائف و يشمل كل أفراد وطبقات المجتمع٬ سواء كنت عزابي لحالك؟ مكانك موجود. تبي تروح مع الشباب و تشوفون مباراة ديربي الهلال ضد رونالدو؟ موجود. وإذا كنت رايح مع أهلك؟ فيه منطقة عائلية كبيرة وأماكن مخصصة للأطفال من ضمنها منطقة خاصة للرسم. قد يكون أميز طلب عندهم هو الوليمة النحاسية، وهو الطلب المحلي المميز اللي يقدم بصحن نحاسي يعلوه ثلاث طبقات من تحت إلى فوق: رز، عرايس٬ ومشاوي كِندة المميزة. 

طريق الهدا أو مايسمى قديماً بدرب الجمّالة قد يكون أقدم طرق الجزيرة العربية من درب البخور٬ الطريق هذا يعود لـ١٠٠٠ سنة وكان مسير قوافل الجمال المحملة بالبضائع التجارية٬ وأنت طالع هناك بتشوف بسطات شاهي على جنب وباعة فواكة وخضروات من البساتين المجاورة للهدا، وقف عندها وخذ لك كوب شاهي أو تفكّه قبل ما تبدأ جلسة العلاج النفسي في مطل الحلواني٬ تمش في المطل٬ طلق رجلينك٬ ودوّر ورد طايفي ثم قطّف الوردة حبّة حبّة: تحبني.. ما تحبني.. تحبني.. ما تحبني.. 

من عام ١٩٩٩ وهذا المطعم يقدم أفضل شاورما بالنسبة لكثير من سكان المنطقة٬ صحيح ان اسمه بيت الفطاير وطبعاً مشهورين بالفطاير. لكن على حسب مخرج كلماشي الفذ فيصل عندهم ألذ شاورما بالعالم من دون ثوم لدرجة أنه ياكل منه كل أسبوع.

قالوا أهالي الطايف عن المطعم: "من أقدم الشاورما اللي على الفحم في السعودية." و"تبقى افضل شاورما بالطائف عيشهم لذيذ و الشاورما لذيذة"