حرب التسالي

تاريخ النشر 2023-02-15

تقليديًا شوارع الرياض مليانة ثلاثة أشياء: صبّات، واختناق مروري، ومحلات التسالي. 

محلات التسالي هذي تقدّم وجبات رخيصة ولذيذة تناسب ميزانية المراهقين وشهواتهم الغريبة في الأكل. دجاج؟ مقلي. بطاطس؟ مقلي. حضن دافئ؟ مقلي. 


ليه إسمها تسالي؟ ما ندري، في مصر يسمّون محلات المكسرات تسالي، لكن عندنا المحلات هذي ما تبيع مكسرات، تبيع أشياء مختلفة تسلّيك. 

ليه اسم اللستة هذي حرب التسالي؟ لأنك ما تدري عنها، بس فيه حرب حقيقية مخفية عنك بين محلات التسالي، هذي المحلّات يتنافسون عليك أنت ويوميًا يطورون منتجات جديدة تناسبك. مثل سباق التسلح اللي صار قبل الحرب العالمية الأولى لكن بدال الطوربيدات وبنادق الترباس الأسلحة هي كومبو زنجر وساندوتش تورتيلا. 



معلومة: محل التسالي الطبيعي عنده أكثر من ٣٠ صنف، وممكن تلقى محل عنده ١٢٠ صنف. 


قبل ما نبدأ، لازم نتكلم عن أهم معلم للتسالي في الرياض، شارع التسالي في حيّ السويدي:



حي السويدي من أكبر أحياء الرياض واللي أكبر منه هو قلوب سكّانه، اللي ساكنين فيه متصالحين ومتعايشين بين بعض، بس أنتبه تمشي في شوارعهم إذا كنت غريب، لأنك ما راح تسلم من ذباتهم مثل: رقبتك القصيرة تخلّي شكل جسمك كأنه علبة مرهم، أو حواجبك الكثيفة كأنها شعر صدر أو أن اذانيك الصغيرة تسمع السالفة بكرا، ما عليك منهم، تجاهلهم وكمّل مسيرتك نحو هذا الشارع. 

شارع التسالي هو منطقة إقتصادية صغيرة في الرياض، في محيطه يوجد ١٢ مدرسة وهذا سبب كافي لنجاح أي مطعم تسالي. 

المعادلة سهلة: طلاب مطفرين وخيال واسع في اختراع الوجبات يساوي انفجار اقتصادي لسوق التسالي. 

وهذا الشيء المميز في عالم محلات التسالي هو المنيو! المنيو كائن حي يتفاعل مع الزباين، طريقة اختراع الوجبات هي عملية جماعية الكل يشارك فيها تنتج لنا منيو فيه أصناف عديدة، 

عشان كذا، اذا رحت هناك لا تستحي، أطلب الساندويتش زيّ ما أنت تبيه. (بس بدون مخلل، أغلب محلّات التسالي ما عندهم مخلل)


من هذا الشارع جبنا لكم ٣ مطاعم: 


المطعم الأول

بوفيه فهد

هذا المطعم هو أبو محلات التسالي في المنطقة، اكبرهم مساحة وعمرًا وأوسعهم صدرًا، حنّا في كلماشي لاحظنا أن اسم فهد ما دخل في مطعم الا وزيّنه، مثل كبدة حاشي فهد في الروضة، وشاورما فهد في الريّان. 

ما نعرف سبب تسمية المطعم ولكن الي نعرفه بأنه هو أشهر فهد في حيّ السويدي، عندهم في المنيو٨١ صنف، كل صنف يقول الزيت عندي.   

عندهم عدّة فروع لكن فرعهم الأميز هو اللي في شارع التسالي، داخل هذا المحل تقدر تشوف عبر القزاز نظرات الغيرة من المحلات المجاورة لهم اللي تنافسهم. 


المطعم الثاني

بوفيه سلطان

هذا له أكثر من ١٥ سنة هنا، فيه ناس تزعم بأنه كان مقصف وتحول لمطعم لأنه يبعد أمتار قليلة عن مجمع تعليم البنات في شُبرا، ما قدرنا نتأكد من هذي المعلومة بس اللي متأكدين منه هو أن طالبات مدرسة إثنان وثمانون الثانوية ومدرسة ثمانية وتسعون المتوسطة والمدرسة مئة وسبعون الإبتدائية شاركوا في صناعة الاثنين وسبعين صنف في منيو بوفيه سلطان، ولا وش يبرر الأرقام الكثيرة هذي؟ 

من ٧٢ صنف، فيه صنف واحد يثبت نفسه وبقوّة بينهم وهو دجاج التندوري.. جرّبه دبل دجاج! 


المطعم الثالث

تسالي الشهري

هذا التسالي هو الأكثر زحمة في عصريّات السويدي، رغم أنه فتحة وحدة إلا أن طاقته الإستعابية كبيرة وسعة بال الموظفين أكبر، 

ممكن تلقي الشيف يقلي نقانق دجاج ويأخذ طلبك و يسولف مع زميلة عن أسعار العقار في حيدر اباد، بنفس الوقت. 

 اذا رحت لتسالي الشهري وطلبت زنجر الساعة ١٠ الصبح، غالبًا فيه ثلاثة يفكرون بوجبتك في مدرسة قريبة، ورابعهم منحاش وواقف وراك بالطابور. 

انتبه تأكل طلبك جوّا المحل لأنه جدًا صغير، ولأنه ممكن يجي لك واحد يقول لك ان صوت مضغك مزعج كأنة دقّة سنترال قديم. 


الحين بنطلع برّا السويدي، ونروح شمال الرياض، هيّا بينا! 

المطعم الرابع

لذة منون

في حيّ المصيف المخيف قرب شارع ابن سينا بتلقى كومة من السيارات موقفة بنص الطريق، سيارات مختلفة كثير بس مضمونها واحد: ناس ينتظرون تورتيلا الدجاج من لذة المنون. 

هذي تسالي قديمة كان اسمه شراع القدس، شافوا السوق تغيّر وقررا يغيرون إسمهم لشيء جذّاب للشباب أكثر وترندي وقرروا على "لذة المنون". 

أطلب منهم ساندويتش نقانق وبطاطس صغير مع كتشب ومايونيز ورشّة كمون. 

اذا رحت لهم توقع يتأخرون عليك شويّ بالطلب لأنك بتصير واحد من سبع سيّارات يخدمهم شخص قديم يناديك: يا سنايدي.


المطعم الخامس

محارة البحر

لا يغرك إسم المطعم، هنا مافيه سمك وصيادية، هنا فيه نفس المنيو اللي موجودة في أي تسالي ثاني، سلسلة مطاعم محارة البحر هي محل التسالي اذا قلب شركة محترمة. خدمتهم سريعة و يشاع عنهم انهم أول من حط الجبن في جامبو الربيان، عندهم ثلاث فروع في الرياض وعندهم اختراعات غريبة زي: ساندويتش محشي حبّات سبرينق رول، وكلوب ساندويتش الإمارات. اختراعاتهم جريئة، بس مب مثل جرأتك وأنت تأكلها. 


لازم تأكل ماعندهم التورتلا والتكّا، واذا ما أكلت صوص الرانش حقهم فأنت ما رحت لهم. برضو، عندهم فالوذة، وهي حلى فارسي/سِندي عبارة عن سلطة فواكه مع حليب مكثّف وآيسكريم. 

المطعم السادس

فروج الراية

قد سمعت عن مطعم تسالي صحوح الأسطوري؟ هذي مب قصة يتروادها طلاب ثانوية المعتمد بن عبّاد، هذا محل حقيقي، بس غيّر إسمه لفروج الراية. 

مشهورين بدجاجهم المنقوع، وأعواد النقانق وأيّ شيء مقلي تقريبًا. 

الخدمة عندهم عالية الجودة، إذا كان يعرفك فريق المطعم فهو بيخاطر بغرامة الـ عشرة آلاف وينزل بنفسه يأخذ الطلب من سيارتك. أبطال حقيقيين، تضحيات حقيقية. 


تكلمنا في هذي اللستة عن ٦ مطاعم تسالي،عشان يصير أسهل عليك تلقاها مجمّعه في رابط قوقل ماب، 

هذي لستة ٣١ من كلماشي، وأول لستة تحت رعاية الراعي الجديد نينجا،

نينجا هو التطبيق المفضّل لكلماشي لأن عندهم وعد رهيب:  يوصلون لك ٣٠٠٠ منتج في ٣٠ دقيقة. 


شكرًا نينجا! وشكرًا لوقتك في قراءة هذا النص! 


شارك هذي اللستة

التعليقات


اذا فتحت المدوّنة صعب أوقف قراءة.

قبل عام واحد - أسامة الزهراني

والله ان حسابكم بطل شكرا لكم

قبل عام واحد - العنود عبدالله

ابطال والى الامام

قبل عام واحد - مناف بن قيس
عطنا رأيك

تبي تقرأ لستات ثانية؟

القهوة تقول للشاهي: يا عمّي

مطابخ تجمّل بكل عزيمة

يا حلوك في رمضان