إذا كنت من سكّان الرياض، فالمطاعم تتنافس عليك من كل حدب وصوب. كل هذه المطاعم تشتري أكلها من السوبّرماركتات، فليه ما تصير ذكي وتروح تشتري الأكل مباشرة من هناك؟

تبي تقول "بس لازم أطبخه!"، غلط... اليوم، فيه خيارات كثيرة للأكل الجاهز من السوبر ماركتات في مدينة الرياض.

في هذي اللستة من كلماشي، بنستعرض لك السوبر ماركتات اللي أعجبتنا ورحنا بنفسنا نجرب منتجاتها عشانك. نضمن لك أنّك بتلقى وجبات لذيذة بتكون خيارك الأول في يوم رتمه سريع.

ملاحظة: تجربتك قد تتغيّر لمّا تروح لاقتراحاتنا في اللستة؛ تشكيلة المنتجات تختلف بحسب المكان، والوقت، واليوم.

سلسلة لولو هايبرماركت بدأت في أبو ظبي على يد مؤسسها، الهنديّ يوسف علي، واللي لُقّب بملك السوبرماركتات! توسع من أبو ظبي إلى الهند، وماليزيا، ومعظم دول الخليج العربي.

‎ 

لولو يتخصّص بنكهات آسيا الجنوبيّة، و عشان كذا مطبخهم يقدّم ألذ أكلات السوبرماركتات في هذي اللستة!

مبدئيًّا، تمنّينا نجرّب كل شي عندهم، بس اللي جرّبناه وننصحك فيه هو أكل السخّانات: صحون الرز مثل البرياني اللّذيذ، المقالي مثل السمبوسة الهنديّة الحارّة (سمبوسة الجبن: ريال / حبة | سمبوسة الخضار: 60 هللة / حبّة)، وجائزة أفضل طبق بالنسبة لنا ذهبت لصالح الشيش طاووق العربي (10 ريال / سيخ). قطع الدجاج كبيرة وراهية ومطبوخة بشكل مثالي! يبي لنا رجعة نجرّب باقي الأصناف...

تأسّست أسواق التميمي في 1979م بمدينة الخبر، على يد التاجر عبدالله التميمي.

من الثمانينات وهم يتميزون بشيء: تنوّع منتجاتهم المستوردة؛ بسبب شراكتهم مع سوبّرماركت أمريكي! عشان كذا -بالنسبة لجيل معيّن- الاسم الأشهر والوحيد لهذا السوبّرماركت بالنسبة لهم هو Safeway. اليوم، تملك أسواق التميمي 40 فرع حول المملكة.

غير مخبزهم المنقذ، بتلقى عندهم وجبات جاهزة متنوّعة؛ زي أطباق الرز والنودلز من مختلف مناطق العالم. قد جرّبت نودلز بروبيان الديناميت؟ تلقاه عندهم.

قسم المأكولات الجاهزة عندهم ما له موقع معيّن في مختلف الفروع؛ يعني يبيلك تدوّر أو تسأل الموظف إذا مستعجل.

يوفّرون ساندوتشات جاهزة وسلطات، ويبهرونك بقسم الفواكه المقطّعة. مايكروييف التسخين يبيلك تسأل وينه؛ لأنه مخفيّ وراء كاونتر المخبوزات.

ننصحك بسلطة المكرونة اليونانية (17.95 ريال / طبق) واللي تجي مع الخضار، وجبن الفيتا، وزيتون الكالاماتا، وأحلى شيء فيها أن طعمها صار ألذ في ثاني يوم!

في 2005م، تأسّست شركة أفران الحطب على يد أصحابها عمار ومعاذ الدعجان.

أفران الحطب بدأت كمخبز بسيط يبيع المخبوزات زي أي مخبز، وتطوّر عبر السنين وأضافوا أصناف ومنتجات أكثر، لين ما وصل التطوّر للتوسّع من مجرّد مخبز ومكان لبيع المقبّلات الباردة لسوبّرماركت فتحوه هذه السنة اسمه الحطب ماركت.

يميّزهم هو أن أغلب منتجاتهم ومكوّناتهم محليّة وسعوديّة 100%. عندهم تنوّع في المأكولات؛ من الساندوتشات السريعة، للسلطات، وصولًا للتغاميس والرقائق بنكهات متنوّعة وصحيّة وبجودة عالية تنفع تنقنق عليها بالدوام.

من الأكلات اللي أعجبتنا عندهم:

سلطة دجاج الكاتسو (13 ريال)، سمك الصياديّة (22 ريال) ومكرونة الفيتوتشيني واللّي بتجيك بخيارين: الدجاج (25 ريال) أو الفطر.

سبينيز هو سوبّرماركت إماراتي تأسّس في الستّينات الميلادية. في موقعهم، ذكروا قصة أوّل زبون لهم: الشيخ راشد بن سعيد آل مكتوم، نائب رئيس الإمارات سابقًا. وش اشترى؟ دبس رمّان...

اليوم، سبينيز عندهم 65 فرع في الإمارات، وافتتحوا فرعهم الأول بالرياض عام 2024م.

‎ 

يتميّزون أنهم من السوبّرماركتات القليلة اللي توفّر طاولات في منطقة الأكل.

ننصحك بساندويش الدجاج بالمايونيز ديجونيت، مع الخس والطماطم بخبز الباقيت (23 ريال). أفضل شيء في سبينيز أنهم يسخّنون الساندوتش في فرن محترم؛ لأن المايكروويف هو وسيلة تعذيب لأي ساندوتش طازج...

وعلى طاري التسخين، ترى كميّة الخضار اللي يحطونها في الساندويش راااااهية! اطلب منه يشيلها قبل ما يسخّن لك الساندوتش، إلّا لو كان جوّك طماط ذبلان...  

تأسّست بِقَالة ترولّي بالكويت عام 2010م، واليوم صار لها 88 فرع بالكويت، و25 فرع بالرياض!

صح أنّها فعليًا مب سوبّرماركت، لكنّ تشكيلة أكلهم الجاهز وجودتها تخلّيها خيار مثاليّ يدخل في هذه اللّستة. يسوّون أكلات جاهزة خاصة فيهم تحت اسم "قودنس"، ولهم شراكات مع بعض المطاعم مثل كاتسو ساندو.

المؤسف أن -ما شاء الله- الطلب على أطباقهم عالي! نسبة أنك تلقى الأرفف فاضية من الظهر جدًّا واردة...

ننصحك بساندوتش حلّوم سبايسي، وساندوتش فاهيتّا الدجاج مع خبز الشيباتا (13 ريال).

سوّينا قائمة بأهم سوبّرماركتات الرياض الحديثة والقديمة، وتغدّينا منها لعدّة أيام، كلّه عشان نحدّد وش الأطباق اللي يمدي تأكلها وأنت متطّمن أنك بتوفّر وبتأكل أكل يستاهل.

ولله الحمد، خلال جولتنا اكتشفنا وجبات بنرجع لها من جديد. بنفس الوقت، لاحظنا شيء مب منطقي: مو كل سوبّرماركت يوفّر ملاعق و شُوَك لسبب مجهول!

تأكّد أنك تجيبهم معك، أو رح مطعم في نفس المجمّع واطلب منهم ملاعق.

تبي تشوف قائمة سوبّرماركتات هذه اللستة على جوجل مابز؟ اضغط على هذا الرابط!

شكرًا لكم، كان هذا المنشور أحد أعداد لستة من كلماشي.