وش تأكل بعد الواحدة فجرًا؟

تاريخ النشر 2023-02-15

الرياض كانت مدينة فتية، تنام بدري وأغلب المحلات تسكّر الساعة ١٢، لكن الوضع تغيّر والآن الرياض صارت مدينة في مرحلة المراهقة، ما تنام، تطلع بالليل وما ترجع إلّا الفجر. إذا كنت جوعان وسهران، وش تتعشى؟ 


في ٢٠١٤ فتحت محطة ساسكو المطار، ورغم إنها كانت بعيدة عن كل الأحياء المكتظة بالسكان إلّا انها كانت دائمًا مزدحمة بالسهارى اللي يفضلونها على كودو المطار.. الحين مب لازم تسافر عشان تأكل الفجر، في ٢٠١٩ طلع قرار يسمح للمحلات والمطاعم بالعمل ٢٤ ساعة إذا نفذوا بعض المتطلبات البسيطة زيّ تركيب الكاميرات للحفاظ على الأمن. 


خيارات الأكل بعد ١ الفجر كثيرة، في هذي اللستة ركزنا على الأميز منها، وحاولنا ننوّع أماكنها الجغرافية، واضفنا الفعاليات الليلية المفضلة لمدينة الرياض. قراءة ممتعة! 


المطعم الأول

فايف قايز

خيارات البرجر في الرياض كثيرة، بس مافيه زيّ فايف قايز. ليه؟ هل لأنهم كريمين ببطاطسهم؟ أو لأن كل المنتجات اللي عندهم طازجة وما يعترفون بالفريز؟ ما ندري، لكننا ندري انه لذيذ. ولذاذة فايف قايز ميزتها انها مب بس وأنت تأكله، حتى بعد ما تأكله وجوده في معدتك بحد ذاته تجربة لذيذة.. يسكّر الساعة ٤ الفجر، منتب نايم جوعان في مدينة فيها فايف قايز. 

فريس يايا، الطبّاخ غير الماهر عندنا في كلماشي يحبْ فايف غايز جدًا، وهذي هو طلبه المفضّل منهم:

برقر فريس يايا: تشيزبرقر، مخلل، هالبيونو، بصل مشوي، فلفل بارد مشوي، مسطردة، كتشب. 


المطعم الثاني

مطعم تشيلي ويز

نعرفكم على المطعم النشمي هذا، ليه نشمي؟ جاينا من الأردن الحبيبة. ليه ممكن تثق بالمطعم هذا تالي الليل؟ ثلاثة أسباب: 

أولًا، اسم المدير التنفيذي له طعيمة الطعيمة يعني مجال المطاعم مجاله من الطفولة، ثانيًا، شوربة التشيلي اللي يقدمونها هيّ بمثابة وصفة طبية انك تنام سعيد، جرّبها مع السباغيتي عندهم، أخيرًا الشباب في مطعم تشيلي-وايز كريمين جدًا بالجبن. ما تصدقنا؟ شف الصور. 


الفعالية الليلية الأولى:

خذ لفّة في شوارع الرياض الوسيعة

هذي الفعالية هيّ واحدة من أغرب الفعاليات اللي يحبونها أهل الرياض، الساعة ٣ الفجر، في ليلة دوامات، الدايري ليه زحمة؟ 

فيه تفسير مؤمراتي يقول اننا نعيش في لعبة مأتمتة وهذي السيّارات مافيها بشر إنما مجرد روبوتات تدور حولينا، وسيارات الفورد هي الفايروسات، وتفسير واقعي يقول انه السعر الرخيص نسبيًا للبنزين والفراغ عند الشباب يخليهم يسوّون هذي الفعالية. بكلتا الحالتين الفعالية ممتعة، خاصة إذا كان فنّانك المفضّل توّه منزّل البوم جديد. 

عاجل: مخاوي الليل نزّل البومه الجديد خالديات الاسبوع الماضي


المطعم الثالث

برجر باب عزيز

حيّ السويدي يستاهل لستة كاملة عنّه، خصوصًا محلات التسالي في شارع التسالي، لو الود ودنا جبنا خبير انثربولوجيا ومؤرخ حروب لتأريخ حرب التسالي اللي صارت هناك في بداية الألفية، لكن مهب موضوعنا، موضوعنا هو المطعم هذا اللي يقفّل الساعة ٣ الفجر: إذا ما ذاقت عينك النوم يالذيب ورحت فأنت بتأكل أنواع مختلفة من المقالي، أميزها بالنسبة لنا هي برغر عزيز بالبيض، أو اذا تبي تغيّر من المقلي فعند تورتيلا اللحم المشوي. 


المطعم الرابع

ماكدونالدز

ماك! الحل الأسهل لجواعى آخر الليل، مهما كان جوعك شديد ماك موجود. الغريب في فروع ماكدونالدز الرياض إنها خلقت فضاء عام جديد للسهارى، يعني مثلًا لو تصف طابور في درايف ثرو ماك ومعك سيّارة صينية فأنت بتستقبل ايردروبات كثيرة، تقدر تتجاهلها أو ترد عليهم بأشياء عشوائية ..وهذي فكرة فعالية! 

السعوديين أثرو على ماك بقد ما ماك أثر عليهم.. اولًا شف وشلون نسميه، ماك، بدون اسمه الكامل، كأننا نمون عليه، وكأنه جزء من ثقافتنا ومن هويتنا، وهذا الكلام صحيح. تدري لو تسافر الآن لكولومبيا وتطلب بيق تيستي وش بيجيك؟ بيجيك نسخة البيق تيستي السعودية، مب نسخة بيق اند تيستي الأمريكية! تكلّمنا أكثر عن هذا الموضوع في آخر حلقة من منتجات غزت العالم. لا تفوتك!


الفعالية الليلية الثانية:

ناظر النجوم في مطل صلبوخ

يبعد أقل من ٤٠ دقيقة من فرع ماكودونالدز في حيّ الياسمين، هذا المطل اللطيف المجهّز بالجلسات هو مكان جيّد ممكن تناظر فيه النجوم لبعده عن التلوث الضوئي النابع من الرياض، تقدر تلقى أماكن أفضل عبر خريطة التلوّث الضوئي هذي، استمتع بمشهد النجوم هذا الويكند خصوصًا ان القمر مب مكتمل.. بس انتبه تعدهم! يجيك ثالول. 

المطعم الخامس

نقرشة وقرمشة

آخر الليل، أنت تعشيت، ليه تتعشى ثانية؟ مهب منطقي. عشان كذا فيه هذا المطعم أو الكشك في حي الرمال. نقرشة وقرمشة هو مطعم يقدّم نقانق، مو هوت دوقز، يعني أشياء تنقنق عليها. زيّ البطاطس، المنتو، والبليلة. تدخل عندهم آخر الليل وبتشوف الصوصات المختلفة معلقة بالجدار تصارخ بإذنك: أمسكني، أسحبني، وأضغطني على بطاطسك المقلية. 


المطعم السادس

فروج الشفا

فروج الشفا، بس مب فرع الشفا، فرع التخصصي.. عشانه أزيّن. هذا المطعم التركي عنده شاورما كلاسيكية خفيفة وعنده منتجات مختلفة زيّ المشاوي، البروست وبرجر البوفية الأصلي، أطلبه بالجبنة والتبولة وأكبس على جوعك بعصير برتقال كبس. 

هذا هو المطعم المفضّل لصديق كلماشي الشيف مارادونا، يقول عنّه انه مطعم مخضرم وفريق البحث والتقصّي في كلماشي يتفق. 

الفعالية الليلية الثالثة:

جرّب مشهد السهر الجديد بالرياض

لاونجات الشيشة انتشرت مؤخرًا في مدينة الرياض، مكان جيّد إذا ما جاك النوم لأنها تفتح ٢٤ ساعة، لا تشيّش هناك عشان الشيشة مضرّه بالصحة بس استمتع بالمشهد، واستمتع بالمشروبات المختلفة اللي يخترعونها في هذي اللاونجات، الشيء اللي منتب مستمع فيه هو الموسيقى اللي رغم انها عالية بالصوت إلا انها في نفس الوقت واطية بشكل مختلف. 


هكّر مرسول!

مرسول يشتغل ٢٤ ساعة طول اليوم، تقدر تطلب الحين، ولا تتفق مع مندوب مرسول يجيك بعدين، في بداية اليوم أو نهايته. 

شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

وش ثاني أفضل شاورما بالرياض؟

أغرب المطاعم في الرياض

جنّة الأطفال مطاعمهم