مطابخ تجمّل بكل عزيمة

تاريخ النشر 2023-02-15

هل عندك مناسبة قريبة؟ زواج أو تخرج؟ أجل هذي اللستة تصلح لك، جمّعنا خمسة مطابخ رز من الرياض: وهذي مجرد أمثلة من المطاعم الشعبية اللي تتميّز فيها مدينة الرياض. 


للصحون المدوّرة اللي تتوسّط سفرنا رمزيات كثيرة، زيّ الكرم، والثراء والغيبوبة المضمونة بعد ما تأكلهم، 

لكن تذكر دائما وأنت تفترس الذبيحة احترس


قدام صحن الذبيحة أنت تحت عرضة حالة غرائزية غريبة تخلّيك تلاهث بين اللقمة والثانية، خذ نفس، وتذكّر انه بعد تناول الذبيحة بساعات تتضاعف الدهون الثلاثية في جسمك ويرتفع الكوليسترول وقد نقل لنا الإستشاري خالد النمر قصّة شخص كاد يموت أثناء تناول المفطح. 


إذا كانت (الدهون الثلاثية) كلمة مشهيّة بالنسبة لك، فلا يفوتك الإختيار الأول، بس قبله: الكاركتير.

المطبخ الأول

الكندي للمندي

مطبخ الرز هذا تقدر توصفه بكلمتين: أصلي عشان مندي اللحم عنده، وعالمي لأنه محطة دائمة للجولات السياحية في الرياض، 

فتح في ١٩٨٥ وحاليًا عنده ٣ فروع واول فرع له كان في الوزارات فتحه صالح بامجبور، وهو حضرمي الأصل وولد في السعودية، 

على قدم المكان إلا انه دايمًا يحافظ على جودته عنده دجاج فحم ممتاز، وتيوسهم عيال ناس.


المطبخ الثاني

مكتوم باخلعه

مكتوم باخلعه هو واحد من أكثر المطاعم شهرة في الرياض، يحضّر لحم مندي بالطريقة الحضرمية مع خبز بر مشرّب بالمرق. 

المكان شعبي وصغيّر ومزدحم بالعادة، لكن شهرته زادت بشكل جنوني في السنوات الأخيرة لدرجة ان بعض المحنكين يقولون عنه ما يستاهل، وحنا نقول ان المحنكين ما يفهمون. 


هذا المطبخ يحوّل أي عزيمة لعزيمة سعيدة، حتى لو كانت عزاء. 


المطبخ الثالث

مطابخ النفود

في ديكور داخلي شعبي بشكل مبالغ فيه هذا المطبخ موجود، أصحاب هذا المطعم يتنمنون انه الخرفان والتيوس ما يتحالفون ضدهم لأنه في هذا المطبخ تصير مذابح يوميه لهم وتتحوّل لأشهى الأطباق الشعبية. 

مطابخ النفود عنده رز مندي مبهّر صح ولحمة مندي مقرمشة، ودائمًا يحاول يطوّر من نفسه: مؤخرًا فتحوا محل يقدم تجربة شعبية ايضًا لكن على مستوى عالي في شمال الرياض: مطعم عسيب. 

لكن فرعهم الأصلي في حيّ الروابي هو عبارة عن صابونة كبيرة، لأنه يبيّض وجه كل من يتعامل معه. 


آداب تناول الذبيحة:

احترم الذبيحة وأنت تأكلها، احترم تضحيتها لك ولا تتكلم، حاول تستمع فيها بصمت. 

دوّر بشت التاجر، وهي قطعة لحم ممزوجة بنسبة معقولة من الشحم، تسمّي بشت التاجر لأنها خفيفة مثل البشوت الصيفية غالية الثمن. 

لا تقطع لأحد، شكرًا لأخلاقك الحميدة. لكن كمية الباكتيريا اللي تنقلها لاحبابك عبر هذه الحركة عددها هائل. 


المطبخ الرابع

مطابخ المنجف

هذا المطبخ له صولات وجولات مع عزائم أهالي الرياض، واحد من أقدم المطاعم في الرياض وترسّخ بذاكرة أهلها. إذا عشت في الرياض في الثمانينات أو التسعينات فغالبًا كلمة مطابخ المنجف كانت تجيب لك سعادة خاصة مختصّة، لأنه كان من المطابخ المميزة بطريقة الطبخ الحجازية للرز. 


تقدر تطلب ذبيحتك على سليق معهم وتستمتع بعزيمة غربية. 


المطبخ الخامس

مندي الرواف

للأمانة اللي كتب هذا النص كتبه وهو فيه تخمة من مندي روّاف، هذا المحل ما بدأ حوّل مصطلح أسر منتجة، لمرجلة منتجة. 

بدأ كمطبخ سحابي قبل لا يصير فيه مطابخ سحابية، كان روّاف بنفسه يشمّر كتوفه ويحضّر أطباق المندي واحد ورا واحد في إستراحة.  


اليوم هو محل، لذيذ وعملي، ويقدم صحن مندي بسكوت ينكتب فيه قصايد. 


تقدر توصل لكل المطاعم الشعبية هذي، زي الكندي للمندي، مع خدمة جب لي من مرسول، 


شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

الرياض مدينة المخابز

كلاسيكيات الرياض

جدول الصيفية في أبها