جدول يوم كامل في الخبر الشمالية

تاريخ النشر 2024-05-04

أول مدينة بالمملكة وصلها الازفلت

أول مدينة في شبه الجزيرة تخططت تخطيط أمريكي 

أول مدينة وصلها أول سكة حديدية من الرياض لها


الخبر، حبيبة الكل كأنها محمد الشلهوب

المدينة اللي سبقت كل مدن المملكة في تطورها.. بس ليه، ليه هي مميزة لذي الدرجة؟


أي تجمع سكاني يجي معه الحاجة للتخطيط الحضري والعمراني، اللي مرتبطين بتخصصات كثيرة مثل الإدارة والسياسة والقانون والاقتصاد وعلم الاجتماع والهندسة والبيئة، يعني مرتبطين بكل شيء بحياتنا.. وهذا اللي فازت فيه الخبر.

بعد اكتشاف النفط احتاجت أرامكو مكان يخلي موظفينهم حولهم، وتوفر لهم كل سبل الراحة اللي تشبه نمط حياتهم السابق في دولهم، فقررت أرامكو إن المكان المناسب لسكنهم هو مدينة الخبر، وبدت بتخطيطها بالأسلوب الأمريكي اللي يسمى بالتخطيط الشبكي، وصارت الخبر "مدينة الشركة" وهو مفهوم يطلق على المدن اللي تصممت في أساسها لخدمة العاملين في شركة معينة، لكن الخبر تحولت بعدها لمدينة تضم الجميع موب فقط موظفين أرامكو.. وبسبب تخطيطها المبكر والجيد، صار التضخم السكاني موب قاعد يأثر على وصول الفرد للخدمات، ولا صار عندهم أزمات مرورية حتى بعد نموها السكاني الكبير.





ولأن تخطيط الخبر رهيب، بنخطط لك جدول تقضيه رجلية بالخبر الشمالية، القلب التجاري النابض للمنطقة الشرقية، اللي تاريخها المعاصر مرتبط بشكل وثيق مع قصّة الدولة السعودية، والعوائل والقبائل العربية. ورغم إنها مدينة حديثة نسبيًا، إلا إنها مرتبطة بشواهد من الحضارات حول العالم واللي نشوف آثارها بالأشكال المتنوعة من الطراز المعماري، وأبرز هذي الأشكال هو حجر "Breeze block" أو زي مايسمونه الشيبان حجر المناور، اللي بتشوفه بكل مكان وبكل بيت قديم، ويُقال إن أول من جابه هي شركة الكهرباء عشان تبرد على العدادات بالبيوت، عشانه يسمح للهواء بالدخول لها بطريقة هندسية مميزة.


من سمات أهل الخبر إنهم: هادين، رايقين، يحبون يبّكرون في نومهم، وبداية يومهم.. ومن كثر هدوؤهم، يفطرون في وسط الحراج.


مثل مقهى الفيشاوي في القاهرة، يجمع هذا الفوال كل أهالي الخبر، الغني والفقير، الموظّف والوزير، كلهم حول طبق فول وخبز تميس ريحته تفطّر الصايم في رمضان. الفول والقلابة عندهم ولا غلطة، ننصحك تاكلهم محلّي لأن حلاتهم في حرارتهم. في درايشهم الوسيعة بتشوف يوميًا عمل درامي عنوانه:

وش يصير في الشارع السابع من الخبر الشمالية؟ 

المميز في هذا الفوّال إن الفول بيجيك بدون ملح، ليه؟ لأن أغلب زباينه من كبار السن، وهذا اللي خلاه يستغني عن الملح في أطباقه، بس موجوده كخيار على الطاولة.. تطبيق فعلي لأهم قاعدة تسويقية: افهم الفئة المستهدفة.


*ملاحظة اجتماعية صغيرة: تعلّم اللهجة الزبيراوية واجلس سولف مع الشيّاب الزبيراويين، تراهم وسيعين صدر.


كمّل مشي، هضّم فطورك، رح شف الفن بعيونك:

الرسام الكوري اللي يشتغل في الخبر الشمالية في معرض اسمه Faisal Art Gallery، "كيم" فنان ألهمته المنطقة الشرقية في كثير من أعماله الفنية، اللي واضح فيها التلاقي الكبير ما بين بيئة المملكة والفن والطابع الآسيوي في ريشته.

من الواجهة الزجاجية للمعرض، كل يوم بتشوف "كيم" جالس على كرسيه ويتأمل لوحة قدامه ويرسم إلى مالانهاية، هذي الرسمات اليومية هي اللي يعتمد عليها في تجارته، وأيضًا يستقبل الطلبات الخاصة ويروح للناس في بيوتهم عشان يرسم لهم.

المرسم تجربة عظيمة تستحق تخصص لها وقت من رحلتك، لأنها موب مجرد زيارة، هي تأمل لكيف تشوف مدينة الخبر بعيون غير عيون السعوديين والعرب، بعيون كوري مُتيّم برأس تنورة.


شبعت عينك من فنّه؟ تعال تغدى من غداء أهله. 

مطعم التلال أو جينقوجاي

أشهر/أقدم مطعم كوري بالخبر، وجباته دسمة بس سعراته الحرارية قليلة بشكل ما يُصدق، أطباقه متنوعة بس لا تروح عينك لأبعد من طبق الـ BIBIMBAP.. المصطلح BIBIM يعني "الخلط" و BAP يعني "الأرز المطبوخ".. عشان كذا هو خليط ما بين عناصر غذائية صحية كثيرة مثل الخضراوات، واللحم مع الأرز الأسيوي المطبوخ بالبخار. ورغم إننا خلصنا الصحن كامل، بس للحين ما ندري كيف نوصف طعمه، مع كل لقمة تاخذها تتحمس تكتشف وش ممكن يكون طعم اللقمة الجاية.

طيب ما لاحظت اللوحة عند واجهة المطعم؟، ما تذكرك بشيء؟.. هذي اللوحة من رسم صديقنا الفنان الكوري "كيم"!، فارفع راسك للتحفة الفنية بالجدار، ونزل راسك للوحة الفنية في صحنك، وارسم فيها بملعقتك.

​​مطعم إيطالي فاخر، من النوع اللي يوقف فيه واحد بالشارع عشان يفتح لك الباب ويرحّب فيك.

اشتهر المطعم في الماضي لما كانوا موظفين أرامكو يزورونه مع عيالهم كل ويكند، وللحين ممكن تصادف واحد من الموظفين معه أحفاده، اللي جايبهم عشان يتذكر الأيام الخوالي بعد ما تقاعده.. بس ذي المرة ما نبيك تطلب سباغيتي، ولا بيتزا، ولا كارباتشو دى مانزو.. هذي البديهيات اللذيذة بنغنيك عنها وبنقول لك سر في المينيو محد ينتبه له: جيلاتو المانجو، اطلبه، كله، ادفع، اطلع، وبترجع لنا تكتب تعليق تشكرنا.

هل تعلم:

يُقال إن تسمية الخبر جت من ثلاثة أشياء، وهم:

- كلمة خبر تعني شجر السدر والآراك، بسبب إن ساحل المنطقة كان مليان من هذي الأشجار، وحي الراكة دليل لهذي النظرية لأنه أحد اسماء شجرة الأراك.


- الخبر من خبراء، يعني الغدير: مِياه راكِدة، قَليلَة العُمْق، يُغادِرُها السَّيْل، وقيل نَهْر صغير.


- الخبر من الخبرة، ومعناها "الجماعة". بسبب إن قبيلة الدواسر -واحدة من أوائل القبائل اللي سكنت الخبر- كانوا عبارة عن جماعات صغيرة متفرقة في المنطقة الشرقية.



صح اسمه سقراط، بس ما يتفلسف بالمينيو، قائمته بسيطة جدًا، برجر أمريكي، بديكور أمريكي، لدرجة يعطيك شوكة وسكين لو طلبت وجبة.

سقراط هو أقدم مطعم برجر بالشرقية اللي مستمر من عام  ١٩٦٩ وللآن. كان فود ترك بأرامكو، وتوسّع وفتح في الخبر الشمالية، ويعتبر هو أول من ابتكر البرجر بالبيض في السعودية.

أكرم -الطباخ- عنده لزمة اسمها "ربع ساعة" اللي بيقولها لك حتى لو الطلب بياخذ ساعتين، ومع إنه يدري إنك تدري، بس ودك تسمعها بكل مرة.



فيه محلات معجنات كثير بالخبر، ومعجنات أكثر في السعودية ككل.. بس وش يميز معجنات منصور البلاع؟، بتشوف لأول مرة بحياتك خباز فلبيني.. يخبز ألذ Pandesal ممكن تذوقه، وبما إن مخك قال وش هو الـ Pandesal: هذا الخبز واحد من أشهر أنواع الخبز في الفلبين اللي نشأ في فترة الاستعمار الإسباني، واسم الخبز جاي من كلمة اسبانية معناها Salt bread. قوامها طري جدًا، وفوقها فُتات صغير من الخبز يشبه شكل الملح.



أحيان ودك تكتشف المدن خارج حدود قوقل ماب وترشيحات الناس بتيك توك، تبي تعرف المدينة بعيون ناسها موب بعيون سيّاحها، تبي تعرف قصصها وأزقتها وأسرارها، والجمال اللي متخبي جواها. وبكذا جاء مشروع تنفّس، عشان يحل هذي المعضلة السياحية في المملكة، والخبر بشكل خاص. جايين يعلمونك مين هي الخبر، وش علومها وأخبار ماضيها، عشان تعيشها قبل تشوفها. 

مثل ما طبخ أمك له نَفس مختلف، الخبر لها نَفس مختلف مع فريق تنفّس.

تقدر تحصل حساباتهم هنا




هذا المحل بتدخله وتشك كيف محد يعرفه، ليه موب حقين التراثيات ما خلصوا بضاعته، ليه موب شباب وبنات الفن المعاصر ما أخذوا منه أفكار وقمصان وأقمشة. المحل اللي اسم على مسمى "أصيل"، بتحصل فيه مقتنيات نادرة وغريبة توصل لحقبة حرب الخليج، ملابس، دبابيس، خرائط، أكواب. ولو كنت طالب في جامعة البترول، بتنسبط على قمصان نادرة جدًا للجامعة بكل المقاسات.

المشرفين على المحل أخوان رهيبين، لأنهم موب بس يجيبون القطع عشان يبيعونها، هم يعرفون قصصها ومن وين جت وليه تمتلك قيمتها الكبيرة بالنسبة لهم، فروحتك لهناك يعني رحلة مجانية تتعرف فيها على الثقافات من حول العالم.



قطرة من بحرهم

اللستة هذي جزء بسيط من كم كبير من القصص والتجارب الفريدة، في مدينتنا الحبيبة الخبر.

عشان كذا ما تكفيها لستة وحدة!، وجايينكم بلستة ثانية فيها جدول لنهاية الأسبوع بالخبر.


شارك هذي اللستة

التعليقات


من مواليد وسكان الخبر وبصراحة ما عمري شفت وصف يوفي بحق الخبر كثركم واللستة تفووز طبعا اماكن الخبر ما تخلص يبيلكم لستات لا متناهية اهنيكم عالوصف 👏🏻

قبل شهرين - حنان السبيعي
عطنا رأيك

تبي تقرأ لستات ثانية؟

أكلات نحبها من شوارع الرياض

مشروبات صيفية لمحاربة شمس الرياض

وش تقرأ من معرض الكتاب في الرياض؟