تجي مدوّرة، تجي مربعة، تجي مثلثة، تجي بكل الأشكال الهندسية. وشّي؟ نستخدمها بالرياضيات عشان نفهم اشياء كثيرة مثل نظرية فيثاغروس والكسور الرياضية، وهيّ تقريبًا ألذ رسم بياني ممكن تشوفه بإجتماع عمل.. الإجابة هي البيتزا. 🍕

وحنا في الرياض نحب البيتزا، نحب البيتزا بكلتا حالاتها، بيتزا مطعم فاخر، بيتزا التوصيل السريع، بيتزا البيت، وبيتزا المقصف.  

البيتزات مختلفة، فيه الإيطالية الرقيقة، والأمريكية المتينة، فيه اللي زيّ الشوربة من شيكاقو، وفيه اللي تشتريها من محطّة. 

اللي يجمعهم انهم كلهم لذيذات.

في هذي اللستة بنتكلم عن خمس مطاعم بيتزا في الرياض، أسعارهم متفواتة بس جودتهم وحده، وبنرفق كل مطعم بيتزا بفلم السهرة، 

بيتزا مدينة نابولي شهيرة برقتها: وهذي البيتزا مشهورة بقصتها، كانوا أول فرن بيتزا يقدم البيتزا النابولية في الرياض، الزوجين سلطان ونجلاء فتحوا هذا المطعم في سنة ٢٠١٦ بعد ما تعلموا فن صنعة البيتزا في مدينة ماردونا الشهيرة.. 

عندهم فروع مختلفة لكن فرع السفارات بجلساته الخارجية هو أوسعهم صدرًا وأكبرهم حجمًا، وعندهم خطّة توسعية جاية وبيفتحون فرع جديد في مركز الملك عبدالله المالي. 

أغلب بيتزاتهم لذيذة واللي يجمّلها هو موسيقى البوب الايطالي اللي تسمعها هناك. بس اذا تبي تأخذ سفري، وش تشوف فلم مع هذي البيتزا؟ 

فلمنا الأول هو بارتون فينك، هذا الفيلم من سنة ١٩٩١ وكان من الأفلام المبكرة للأخوين كوين، هو أول فلم يفوز بثلاثية من جائزة كان: السعفة الذهبية و جائزة أفضل مخرج وجائزة أفضل ممثل، جون تورتورو. 

فلم هو فلم كوميديا سوداء حواراته مكتوبه صح وممتعة، تجاريًا الفلم ما لاقى نجاح كبير، وهذا يمكن يعني انه فلم محنكين: لكنه ممتع جدًا! 

الفلم من بطولة جون تورتورو، وهو ممثل بارع ظهر ايضًا في مفاجأة سنة ٢٠٢٢: مسلسل سيڤرينس على آبل تي ڤي.  

وش تعرف مطاعم جايه من حايل؟ هذا المطعم واحد منهم، جاء لنا في الرياض وعنده فروع في قرى الرياض، مشهور بالدلم، يحبونه بحريملاء، ويتشهونه بشقراء. 

 في كل فروعه هو مطعم بيتزا الحيّ، ومطاعم بيتزا الحيّ تختلف عن البيتزا الأمريكية والإيطالية، لأنها تقدم صيغة محلّية للبيتزا وأصناف مب معتادة مثل بيتزا التونة وعش البلبل. تدري ان عش البلبل بيتزا؟ في هذا المطعم البيتزا تفقد هويتها الايطالية، وتطلّع بطاقة أحوال سعودية. 

المميز في بيتزا الأسطورة هي سمّة ثاني من سمات مطاعم بيتزا الحيّ: الا وهي ان أصحاب هذي المطاعم عندهم ثقة عمياء في الإقتصاد العالمي لدرجة انهم يكتبون سعر البيتزا الكبيرة على لوحتهم. 

ودك تأكل بيتزا بطعم دموعك؟ هذا الفلم هو العلاج لأي بيتزا ناشفة، قصة مستقبلية سوداوية عن حياتنا البشرية، بعدما تشوفه بيجيك توتر كلما كلمت سيري أو اليكسا. تجاهل التوتر هذا، واستمتع بمشهد للبشرية وهيّ تحاول تعيد اكتشاف نفسها بعصر التقنية. 

الفلم من إخراج سبايك جونز، وقدّم فيه اداء اوسكاري خواكين فينكس الا انه ما فاز فيه لأنها كانت سنة ليوناردو ديكابريو. 

هذا أجدد فرن بيتزا في مدينة الرياض، وتحديدًا يقع في عرقة. اصنافه كثير بس اميزها بالنسبة لنا كانت بيتزا "لوف هاندلز" وهي بيتزا لحم وفلفل أسود، وايضًا بيتزا البطاط، أو زي ما سمّوها بالمنيو العربي: بيتزا بوتيتو. 

أصناف المطعم هي من ابتكارات رائد المطاعم عيسى الثاقب والخبّاز علي البقشي، علي هو واحد من أشهّر خبّازين المملكة، وهو واحد من شركاء النجاح في مقهى وكف اللي بدأ معهم هبّة جديدة اسمها الكوكيز الحساوي. 

نتوقع وال بيبر يبدأ هبّة جديدة لكن ما ندري أيّ اصنافه هي اللي بتنجح، اذا بنتمنى صنف واحد ينتشر بكل مكان بيكون مخلل فلفل شقراء الحار. 

هذا الفيلم هو متاهة من الأعمال الكلاسيكية الأوروبية، هو معالجة سينمائية من المخرج التشيكي ميلوش فورمان لمسرحية اميدوس الشهيرة اللي كتبها سنة ١٩٧٩ بيتر شافر بعدما الهمته مسرحية قصيرة من سنة ١٨٣٠ كتبها الشاعر الروسي الأشهر اليكساندر بوشكن. 

وزيّ ما انت تتناول البيتزا، هذا الفلم يتناول قصّة المؤلف الموسيقي موزارت والمنافسة بينه وبين المؤلف الموسيقي الايطالي ساليري، تقديريًا، لازم تطلب ٤ حبّات بيتزا كبيرة عشان تخلّص الفلم. 

بعيدًا عن الأكل وبعيدًا الأفلام،

خلونا نتكلّم عن الواقع: الاسبوع الماضي قاموا ملايين من البشر والأرض تهتز من تحتهم، 

تحوّلت البيوت اللي تحميهم لأنقاض تبتلعهم، زلزال تركيا وسوريّا راح ضحيته أكثر من ١٨ ألف إنسان 

والمعاناة مستمرة، عندك فرصة تساعدهم: اطلق مركز الملك سلمان للإغاثة والأعمال الإنسانية حملة لجمع التبرعات اللي في أقل من يوم واحد ٣٤٥ ألف سعودي جمّعوا مبلغ مية مليون ريال.. وش ضرّك لو تصير واحد منهم؟

من هنا 

مصر معروفة بأنها دولة خلّاقة، انتاجها كثير ومختلف، حتى في السينما. فلم هوليوود ناجح؟ اكيد بتلقى منه نسخة مصرية. طبق شعبي رائج؟ اكيد بتلقى منه نسخة مصرية. زيّ بيتزا شيخ الفطير. 

البيتزا هيّ طبق شعبي رائج عند المصريين، وهذا المطعم في حيّ السليمانية يقدمها بطريقة مشابهة لطريقة تقديمها في شوارع مصر الشعبية.. وهذا نوع مختلف من البيتزا: يستخدمون خضراوات معلبة ونوع البيتزا الأفضل عندهم فيه خمسة أنواع لحوم بقري مختلفة.

"البِزَهْ" زيّ ما يسمّونها عمال المطاعم ما تقدر تطلب منها الا حجم واحد: كبير، والسعر يختلف حسب الكمّية اللي فيها. 

عشان شيخ الفطير بيتزا مرعبة، بنحط هنا فلم رعب، وفلم رعب من نوع ثاني: رعب يضحك! 

فلم بيتل جوس هو فلم من ١٩٩٨ للمخرج تيم بورتن اللي متمرّس في صيغة الأفلام المرعبة.. وهذا الفلم هو رحلة مرعبة مضحكة وكأنها حلم لطفل في سادس أبتدائي. 

الفلم فاز في الأوسكار لجائزة أفضل مكياج وتصفيف شعر، لأنه بصريًا مبهر وخلّاب، تقدر توقف بأي لحظة من لحظات الفلم وتتأمل بالمشهد وتسأل نفسك: وشلون سوّوها؟ 

البيتزا هي أكلة غربية، بس من هذا المحل جتنا من الشرقية.. أول فرع لهم كان في الظهران سنة ٢٠١٨، وفي فرعهم بالرياض عندهم شجرة زيتون جميلة في نص المطعم.. بس ما نتوقع ان بيتزا الزيتون عندهم منها. 

عندهم أصناف مختلفة من البيتزا، ويقدمون بيتزات مختلفة من حول العالم. زيّ الأصفهاني اللي مستلهمه من المطبخ الفارسي، وبيتزا جنوب أفريقيا، ونيويورك، ونابولي.. حتى عندهم بيتزا بلحم النعيمي. 

وميزة المطعم انه بيتزتهم توّها قايمة من النوم، وتتمغط. وميزة ثانية للمطعم انه يعطيك على جوّك، تبي تقسّم البيتزا أنصاف؟ تقدر! شكرًا للمطاعم اللي تعطينا جوّنا. 

اذا اخترت هذا الفلم لفلم السهرة فأنت بتسهر ستة سهرات مختلفة بنفس اللحظة..

فكرة الفلم هذا انه يوثّق ليلة واحدة، وخمس قصص منفصلة من خمس مدن مختلفة في أوروبا وأمريكا. 

الفلم مدته ساعتين و٩ دقايق، مافيه ولا لحظة مملة، أجواء المدن الكبرى في الليل ممتعة، ومختلفة. 

والممتع اكثر انك تشوف ليلة في أطراف الأرض، وأنت تأكل أطراف الجبن.