هلا والله!

أو مثل ما يقولون البرتغاليين إذا مانوا عليك "أُوي".

عيدكم مبارك بعد بعد بعد الزحمة، وبعد ما كان فطور عيدكم لحم بلحم، جاء الوقت اللي ترجع فيه للفطور الطبيعي؛ فطور قليل الكولسترول و خالي من المقالي.

‎ 

‎ 

‎ 

جواهر المقبل مصممة ديكور تائبة. تركت تصميم الديكور وركزت على بناء استوديو ابداعي، بس المطاعم دايم كان لها معزة خاصة عندها وعند أبوها - صاحب مطعم بيت التنور بالخبر - فقرّرت تمشي على خطاه وافتتحت مطعم أُوي (Oi) في  ٢٠٢٠ بالخبر.

وخاضت تجربة شيّقة في بداياتها: 

في رحلة البحث عن موقع أول فرع لها، واجهت تحديات كثير لأن أصحاب العقارات ما أخذوها بجدية. 

حكت لنا عن أحد المباني اللي كانت مهتمة تفتتح مطعمها فيه ما لقت عليه رقم تواصل، فقررت تحط لوحة (للإيجار) برقمها على أمل أن صاحب المحل يدق عليها يشكي من هذا التصرّف. المفاجأة كانت أن الوحيدين اللي تواصلوا معها هم أصحاب مشاريع يدورون محل زيّها…والعم صاحب العقار؟ ما درى عنها. 

بعدها لقت محل أفضل يتناسب مع آمالها في بناء مساحة مريحة وفيها طابع فنّي ومبدع لأنها في مبنى الفنانة القديرة (نبيلة البسّام) بس كان لازم تقنعها أول أنها راح تعامل المساحة بحب زي ما تسوّي خالة نبيلة.. 

من هنا بدأ أُوي: مطعم ومقهى يشبه جواهر مختص في أكل البرنش وأطباق بيتوتية تحنّ لها، وبعد خمس سنين من افتتاح فرع الشرقية، افتتحوا الرياض بمساحة هُنا، التخصصي.

‎ 

هذا المطعم مب هدفه يصير مثالي؛ بل يبي يصير مميز في أذهان الناس والأهم يكون مريح لزبائنه. في سوق الكل يدوّر الهبّة الجاية، أُوي يختار إسعاد زباينه في كل مرة. 

يحبون التجديد في كل مناسبة، بس هذا لا يعني أن ما عندهم أطباق محبوبة من أول مرة افتتحوا أبوابهم. 

رح المطعم بأي وقت وبيكون فيه شي لك. تبي وجبة خفيفة؟ اطلب تاباز. تبي تحلّي؟ خذ لك تشيزكيك. 

أخوياك جوعانين بس أنت شبعان؟ اطلب لك سلطة. ماتبي تاكل بس تتقهوى؟ اشرب v60. المهم، فهمت وش نقصد. صح؟

رغم أن المحل في هُنا مؤقت، نحترم أنهم اشتغلوا على نقل تجربة أُوي الأصلية للرياض من ناحية الأطباق والديكور… باختصار، تجي أُوي عشان تتغذى بصريًا..وبطنيًا. ونقدر نقول أنها ما تابت عن تصميم الديكور كليًا.

‎ 

استلهمته جواهر من طبق جربوه صديقاتها في أمستردام ولأنها تحبهم سوت نسخة منه. 

عبارة عن بطاطس الهاش براون مع الغواكامولي، اللحم المقدد والبيض.

سامي مب اسم اللي سواه؛ بل هي كلمة دلع لـ "ساندويتش" بالإنجليزيّة.  

من أول الأطباق اللي نزلت وللآن من الأكثر مبيعًا، عبارة عن كرواسون هش مع البيض المخفوق وشريحة ديك رومي وجبن الشيدر.

على وجبة الفطور بالعادة تنزّل الحلى مع المالح ولا بعده؟ 

أيًّا كان جوّك، خلينا نتفق أن الفرنش توست الكلاسيكي من أوي خفيف، وطري، وما يتفوت.  

يُقدّم مع التوت، واللوز المجروش، وشراب القيقب.

كانت هذي لستتنا الرابعة والعشرين ضمن لستات "مطعم الأسبوع" في مدينة الرياض.

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب