خلّص أول شهر من سنة ٢٠٢٥، وكان شهر رائع! أكلنا مطاعم كثير، وعلّمناكم عنها.

في هذا الشهر، صار عندنا منافس! ثمانية أطلقوا حساب اسمه معيشة ثمانية، وهدفه يعطيك محتوى يساعدك تعيش في المدن. فكّرنا نحارشهم ونسوّي حساب اسمه سبعة كلماشي.. بس قلنا ما يحتاج. تابعوا معيشة ثمانية على إنستجرام!

مطعم الأسبوع لهذا الأسبوع هو مطعم هندي أصلي يقدّم مأكولاته أولًا للجالية الهندية في مدينة الرياض.

‎ 

‎ 

‎ 

‎ 

قبل ما نعرّف عن المطعم، لازم تعرف معلومة: إذا تعتقد بإن المطاعم الهندية تشبه بعض، فأنت غلطان جدًّا!

الهند هي شبه قارة، فيها مطابخ مختلفة لكل منطقة.. مطعم كانا خزانا يعتبر مطعم هندي شعبي يقدّم الأكل بطريقة أهل مدينة حيدر أباد.

المطبخ الحيدرأبادي هو مزيج من أكلات جنوب آسيا، والمغول، والتركيّة والعربية. أشهر الأطباق عندهم هو البرياني.

مطاعم زي كذا ما ننصحك تطلبها سفري، الأفضل انك تجي وتعيش تجربة الأجواء الهندية هناك.

لأن المواقف أمام المطاعم محدودة للغاية، ننصحك تروح له بالمترو (أقرب محطة هي وزارة الدفاع على المسار الأخضر).

كھانا خزانہ هي كلمة هندية معناها "خزانة الأطعمة".
اسمه فعلًا على مسمّى، لأن المنيو حقه مليان وجبات مغمورة ودّك تكتشفها. بس حنا مانبيك تخاطر بجوعك، جرّب اقتراحاتنا المتواضعة في فقرة الطلبات المقترحة للمطعم!

‎ 

المطعم متواضع وزاهد جدًّا ومحافظ على طراز المطاعم الهندية القديمة، وصحونهم كأنها صحون البيت.

فيه شيء مميز عندهم في نهاية الأسبوع فقط، يقدّمون لك أطباق خاصة بالأيام.
مثلًا يوم الخميس عندهم دجاج الثوم الحار، وماستر تشيلي سمك أو دجاج، وطبق دجاج هونكونج الحار. أما يوم الجمعة فعندهم طبق الخيشدي ولد عم البرياني.

لكن لا تضيع بالطلبات! إذا رحت لمطعم حيدرأبادي، اطلب برياني حيدر أباد.

‎ 

‎ 

أطباق المطعم تقدّم بحرارة عالية؛ فلو ما كنت من عشاق الفلفل، ضروري تقولّهم إنك تبي الحرارة سعودية.. مب هندية، بيعرفون وش تقصد.

أما لو كنت تحس أنك شجاع: اطلب حرارة هنديّة، وإذا لسانك انلذع.. فعندهم طفاية حريق.

أكثر طبق يمدحونه زبائن المطعم.
يجي منه باللحم، وبالدجاج، وبالخضار، وتقدر تطلب كمية نفر أو عائلة.

ننصحك تجرّب اللحم، سيمفونية من التوابل ولحم الغنم مع رز بسمتي، ويقدّمونه مع صوص الفلفل اللذيذ، وسلطة زبادي وخيار إذا لسانك ولّع نار.

قطع دجاج تندوري مشوية مع مرق الدجاج بالزبدة، وعليها بيض مسلوق وكريمة مخفوقة.
يقدمونه لك مع خبز الشباتي.

دجاج مقلي حار ومقرمش!
ما نعرف ليه تسمّى كذا، بس يقولون لأنها كانت وجبة خفيفة للجنود الهنود في عام 1965م.

كانت هذي لستتنا التاسعة عشر ضمن لستات "مطعم الأسبوع" في مدينة الرياض.

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب