مقاهي الحيّ ترجعك حيّ

تاريخ النشر 2023-02-15

هل أنت من سكان الرياض؟ أجل بالأغلب مر عليك المصطلح هذا: "مقهى حيّ"، أو بالأصح: أنت اللي مريت عليه. 

أحياء الرياض امتلت بهذي المقاهي، وهي مقاهي صغيرة مكوّنه من محلات فتحة أو فتحتين تلقاها في كل زاوية من زوايا مدينتنا العظيمة. 


في هذي اللستة بنجمّع خيارات اعجبتنا من مقاهي الحيّ، وبنعلمكم قصصهم، ووش اللي يميزهم، وأهم شيء: ليه نحب قهوتهم. 



وش اللي يخليه مقهى حيّ؟ 

أولًا، انه المقهى يصير جوّا حيّ، وقبل ما تقول انه كل شيء بالرياض هو داخل حيّ اصلًا فحنّا نقصد تحديدًا انها تكون جوّا الحيّ ومو على شارع عام ومزعج. 

ثانيًا، انه يكون مقهى من فرع واحد فقط، لأن أصحابه يبون يركزون عليه وما يهمهم انهم يتوسعون قد ما يهتمون بتطوير تجربتهم الرئيسية. 

ثالثًا، انه يكون هادي، هادي جدًا. هادي لدرجة انك تقدر تسمع أفكارك فيه. هادي، أكثر من المحيط الهادي. بدون أغاني صاخبة أو زوّار مزعجين. 


المقهى الأول

مقهى باء في حيّ الرفيعة

رغم اننا ما نرتب الخيارات بناء على الأفضلية، إلا أن هذا المقهى هو بلا شك الأفضل. ليه؟ اولًا لأنه مقهى عائلي تشغله عائلة "باشميل" ومن هنا يجي اسمه: مقهى باء. دوّر رسومات لأفراد العائلة في جدران المقهى. الجو العائلي للمقهى تحس فيه من أول رشفة لكوب القهوة. لا اراديًا بترجّع ظهرك وراء، تحط رجولك على الطاولة وتقعد كأنك قاعد في صالة بيتكم. 

ثانيًا، لأنه ايضًا مخبز رائع فيه أنواع مختلفة من المخبوزات اللذيذة، قبل لا يكون مقهى كانت نفس العائلة تشغّل حساب انستغرام للبراونيز والكوكيز وكانت لذيذة جدًا، فريق البحث والتقصي عندنا كان يطلب منه كثير، ويستمتع به دائمًا. 

ثالثًا، للمقهى إطلالة ساحرة على وادي حنيفة، وهو مكان خلّاب تنهي فيه رحلة مشي طويلة أو تبدأها هناك خاصة بأجواء ديسمبر البديعة. 


المقهى الثاني

مقهى خلاصة في حيّ عرقة

في منطقة عرقة العريقة بالرياض على شارع الشخصية الأسطورية في تاريخ المملكة العربية السعودية مانع بن ربيعة المريدي يقع هذا المقهى الراقي جدًا، تصميم المكان من جوّا مستلهم من تاريخ السعودية انسجامًا مع الشارع اللي يقع فيه. 

للمقهى احساس تراثي مثير، وكأن ديكوره الداخلي يقولّ لك قصة سعودية بامتياز. 

واضح جدًا اهتمام أصحاب المقهى بأدق التفاصيل، أكواب القهوة الكرتونية ودّك ما ترميها من جمالها، وتعدد الخيارات في داخل المكان تضمن انك بتقعد مرتاح. تبي كنبة؟ موجود. تبي طاولة شغل خاصة بك؟ موجود؟ جلسات برا؟ موجود. 


المقهى الثالث

مقهى كيكستيرز في حيّ الملقا

صاحب المقهى شخص متمرس في القهوة، كان سابقًا باريستا في واحدة من أفضل محامص الرياض، إدمي، وبعد ما طلع منهم فتح مقهى الحيّ هذا مع أفراد من عائلته. لأنه من سكان حيّ الملقا حرص كثيرًا على أنه يقدم أفضل تجربة ممكنة لسكان الحي، عشان كذا اشتغل على كل تفاصيل المقهى: الهويّة، الفكرة، الديكور وأهم شيء: القهوة. 

اسم المقهى جاي من ركلة الكافيين القويّة اللي تجيك بعد ما تشرب قهوتهم اللذيذ.


المقهى الرابع

مقهى غمار في حيّ الصحافة

هذا مهب بس مقهى الحي، هذا مخبز الحيّ بعد. تبي تضمن ميّة لايك على منشورات بتويتر وانستغرام؟ رح عندهم اطلب ايّ شيء من المخبز وصوّره.. مهب بس شكله حلو، طعمه ايضًا حلو. 

المقهى هادئ جدًا وكأن الوقت يتوقف هناك، ونتوقع الباريستا عندهم ما يبي يصير باريستا.. نتوقع انه سريًا يبي يصير رسّام عشان كذا يبدّع مع زبائن الحيّ برسومات رهيبة في أكواب اللاتيه اللي يطلبونه. 

المقهى الخامس

مقهى عصفورة في تلال الرياض

في حيّ الملقا بمدينة الرياض توجد منطقة سكنية مسوّرة اسمها "تلال الرياض"، في داخل "تلال الرياض" توجد حديقة لطيفة بالمنتصف، في داخل هذي الحديقة اللطيفة يوجد مقهى اسمه عصفورة. الحين علّمني، مقهى موجود في مكان مثل هذا وشلون ما يكون هادئ؟  

مقهى عصفورة من الأماكن المميزة بالرياض اللي تساعدك تختلي مع نفسك وأفكارك، رح هناك، اطلب قهوة، راجع قرارات حياتك المصيرية أو استمتع بقراءة كتابك. ما عندك كتاب؟ مهب مشكلة، فريق المقهى يرمون كتب عشوائية على طاولتهم.

المقهى السادس

مقهى دي نونا في حي المحمدية

فيه شيء اسمه ملابس شتوية، مشروبات شتوية، طلعات شتوية، بس قد سمعت عن المقهى الشتوي؟ هذا هو. مقهى كامل مصمم ومفصّل عشان يناسب شتاء الرياض، مفتوح بشكل كامل على الشارع وبتصميم داخلي رائع مستوحى من المقاهي اللي تلقاها في شوارع المدن الإيطالية، من هنا يجي أسمه! دي نونا معناتها الجدة بالإيطالي. 

ليه دي نونا مكان رهيب؟ أولًا، عندهم بلاي-ليست أغاني كلاسيكية قوية. ثانيًا، عندهم أم علي بالتوت لذيذة جدًا. ثالثًا، قهوتهم مُتقنة ومضبوطة. 


شارك هذي اللستة

التعليقات


فيه بعد مقهى حي بحي الروضه جميل جدا وهادي ورايق وتحسون انكم داخل بيت مو داخل كوفي وكذا مكان سري تحسونه لانه داخل الحي مع البيوت مره مره رايق انصحكم فيه

قبل ٧ أشهر - REEMA

ايضاً (مقهى حي) في حي الروضة.

قبل ٨ أشهر - Mohammed
عطنا رأيك

تبي تقرأ لستات ثانية؟

دليل الغافل عن محلات الفلافل

يا حلوك في رمضان

كيف تأكل ثلّاجة بالصيف؟