الأطفال، كائنات بدون أيّ جدوى اقتصادية، مزعجين، مشاكسين، ودائمًا يذكّرونا بأهم نعم الله علينا: النضج. 

لكننا نحبهم، نحب براءتهم ونحب صفاوة قلوبهم.. مافيه طفل حقود أو حسود، إلا اذا منعته من اللعب بـ روبلوكس.

عندنا مسؤولية كبيرة تجاه الأطفال ألا وهي توفير طفولة سعيدة لهم، تذكّر دائمًا وأنت تتعامل مع أي طفل إن أي شيء تقوله أو تسوّيه بيرسخ في وجدان الطفل وذاكرته، حتى لو كان شيء صغيّر. يعني عادي يتحوّل ولد أخوك لقاتل متسلسل لأنك قلت له يوم من الأيام انك تعرف أسم امه. 

لستة اليوم مناسبة لك سواء كنت طفل، والد لطفل، أو شخص عندك طفولة متأخرة، لأن هذي اللستة تبحث عن أماكن مخصصة للأطفال بالرياض، وهي لستة هجينة بين مطاعم، تجارب، وألعاب! البس حفّاظتك واستمتع بوقتك. 

بياتو هو مطعم إيطالي له أكثر من عشر سنوات في الرياض، فاز في ٢٠١٨ بجائزة أفضل مطعم بالمملكة،  لنا حنا يالكبار هو مطعم عادي زيّه زيّ غيره.. لكن لأحباب الله الأطفال الصغار هو مكان رهيب لأن بعض فروعه تحتوي على ركن صغير في الزاوية اسمه ليتل ايتالي - ايطاليا الصغيرة -.. وفي هذا الركن يقدرون أطفالك يسوّون البيتزا الخاصة فيهم بالشكل اللي يبونه.. 

يقدرون يرسمون وجه مبتسم على البيتزا، يقدرون يوزعون الزيتون زيّ ما يبون أو يسوونها بدون أيّ خضراوات لأنه هذا هو قرارهم، وأنت تقدر توديهم هناك ينبسطون وأنت تنبسط بتغميسة الأرضي الشوكي أو الخرشوف مع الخبز المحمص، الطبق المفضل عندهم بالنسبة لفريق البحث والتقصي من كلماشي.  

الأستاذ تشكي من عائلة تشيز المحترمة هو واحد من أهم الجرذان في الكرة الأرضية، قبل لا يصير جرذي كان مؤسس المطعم ناوي يخليه ذيب، وكان الإسم المفترض للمطعم هو: بيتزا ذئب البراري. لكن المؤسس اللي سبق وأسس نظام للألعاب الشهير أتاري طلب دمية تنكرية على شكل ذئب البراري وتفاجأ لمّا وصلت له انه مهب على شكل ذئب البراري.. بس شكلها جرذي ومن هنا بدأت أشهر شخصية في عالم الأطفال. 

هذا الجرذي يثبت نفسه انه ذيب في كل ساعة، ليه؟ لأنه يوزّع شرهات على الأطفال ويرقص معهم في ساحة الرقص الخاصة فيه، إذا رحت تشكي تشيز بيستمتعون أطفالك وأنت بتستمتع بإستمتاعهم.

بيتزا الأناناس تسمّى بيتزا هاواي لكن بالحقيقة هي طلعت لنا من كندا من الخبّاز الكندي اليوناني سام بانوبوليوس في سنة ١٩٦٢، ما كان يدري ان اختراعه هذا بيسبب أزمات جدلية كبيرة بالعالم: ليه فيه ناس يحطون أناناس على البيتزا؟ 

سام بانوبوليوس استلهم الطبق من المطبخ الصيني اللي معتاد فيه الأطباق الحالية والمالحة مع بعض، لكن المصير عن بيتزا الأناناس انها تمثّل العولمة بصورة واضحة وصريحة: خبّاز كندي من أصول يونانية استلهم من المطبخ الصيني فكرة اضافة فاكهة جنوب أمريكية على طبق ايطالي انتشر بكثرة في استراليا. عالمنا أصغر من ما نتخيّل. 

تخيل معي التالي: الأمم المتحدة تسوّي اجتماع غير اعتيادي ويقررون أهم قرار في تاريخ البشرية: الأطفال بيمسكون زمام السلطة في العالم كله، وصلاحيات مجلس الأمن بتتحوّل من الدول الخمسة لـ روضة أطفال عشوائية في أي مكان من العالم، وش القرارات اللي يمكن يطلعونها؟ يمنع منعًا باتًا النوم قبل الساعة ٩ مساءًا؟ يتم إلغاء كل محاصيل الخضراوات من العالم واستبدالها بطريقة مستدامة لزراعة الكندر بوينو؟ 

المكان مول هو أقرب شيء ممكن نوصله للعالم هذا، هو مول نسبيًا يتحكم فيه الأطفال. قمّة الفوضى والعبث مع صالة المطاعم السريعة وسينما لهم. 

في قو قول يقدر طفلك يطلّع كريستاينو اللي بداخله، أو ميسي، أو اذا كانت طفلتك تحب الكورة تقدر تطلع البندري مبارك اللي جوّاتها، لاعبة نادي اليمامة وهدافة الدوري سعودي للسيدات. 

في سكاي زون يقدر طفلك يأخذ درس فيزيائي عن الجاذبية شخصيًا مع النطيطات والترامبولين المتوزع في كل الجهات. يقدر ينطنط بشكل عامودي، وبشكل عرضي، وبشكل قُطري. يقدر ينطنط زيّ ما وده وبشكل يخلّي اسحاق نيوتن يفخر به. 

في كافية سيراميك يقدر طفلك يتحول فوريًا لمايكل انجلو أو دافينشي، يطلق العنان لإبداعه ويرسم على السيراميك الأشكال اللي يبيها. جرّه عليها قطوة؟ ليه لا. صحن عليه بقرة؟ يلّا! كوب مرسوم عليه شجرة؟ وماله؟! 

في ليزر سترايك يقدر يصير طفلك مقاتل تكتيكي يهزم خصومه بأكثر الأسلحة تقدمًا، يقدر ينطلق بخياله ويحوّل الألعاب اللي يلعبها بالبلايستيشن لواقع يمسكه بيدينه. 

في المكان مول يقدر طفلك يمسك زمام الأمور، يصير هو رب العائلة.. وكل قرارتكم المصيرية بيدينه. يقدر ينطلق بخياله، ويسوي اللي يبيه. وأنت تقدر تأكل ببرقر بوتيك أو تشرب قهوة بستاربكس. 

بعد ما زار فريق البحث والتقصي هذا المكان رجع مكتئب، يقولون ودّهم يرجعون أطفال، ويعيشون طفولتهم هنا. دوميدو هو معسكر أو مخيم للأطفال موجود في شمال الرياض يشغلونه سيدتين سعوديات وهم أنجي وريما، هذا المكان هو أفضل مكان تربوي لأطفالكم يقدمون فيه ٣ وجبات مختلفة وصحيّة ولذيذة من طبّاخ خاص خبير في الأمور التغذوية للطفل. 

عندهم أنواع مختلفة من الألعاب مثل الحركية أو الفنيّة، المكان هذا ميزته الحقيقة انهم يهتمون بطفلك أكثر منك مثلًا ما يغصبونه يشارك بفعاليات ما يبيها، ويحولون التعلم لتجربة مثيرة وممتعة. يقدر طفلك هناك يتعلم فرنسي أو صيني، ويتعلّم مهارات يومية معقدة مثل تغسيل اليد. 

منطقة الألعاب هناك مقسمة لـ أربعة أقسام، كل قسم مخصص لعمر معيّن يناسب مهاراتهم وإمكانياتهم. مجرد ما تدخل المكان فيه هناك بيئة مسالمة و مرحبة للطفل و اغاني الاطفال الي يحبونها التعليمية تشتغل على مدار الساعة. بكل بساطة اكثر ناس ممكن تثق فيهم يعتنون بأطفالك. 

لكن فيه مشكلة وحده في هذا المكان: انك أول ما تحط عيالك فيه بتغار منهم وتتتمنى انك بمكانهم بس ملاحظة بسيطة: المكان بإشتراك شهري. 

خل كل شيء لهم لعبة.. بدال ما يفرشون أسنانهم خلّهم "يقاتلون التسوس الشرير".. بدال ما يرتبون غرفتهم خلّهم يشاركون في أولمبياد الترتيب. 

شاركهم أفكارك.. وأسمع أفكارهم.. خض نقاش معهم عن أيّ موضوع تبيه مثل الإحتباس الحراري والكرة الأرضية، الفرق بين البحر والمحيط، أو ليه الحيوانات ما يتكلمون. 

طلّعهم برّا، خلّهم يعيشون طفولتهم في حديقة، في ملاهي أو في بيت جدتهم. تذكّر وأنت تربيهم إنك قاعد تخلق لهم ذكريات طول حياتهم. 

بس أهم شيء: لا تقرأ نصائح تربوية كاتبينها فريق كلماشي، اسأل ناس مختصين وفاهمين وأبحث صح بالنت.. الشيء الوحيد اللي قد ربّوه فريق كلماشي هو بطونهم. 

هذي كانت لستة ٢٥ من كلماشي، انبسطنا جدًا وحنّا نكتبها، نتمنى انك انبسطت وأنت تقرأها، نشوفكم يوم الخميس الجاي.