سنة ٢٠٢٣ كانت مليانة أحداث وفعاليات مختلفة على المستوى العالمي: البشرية رسميًا نست فيروس كورونا، الهند صارت أكثر من الصين تعدادًا للسكان، وتطوّر الذكاء الاصطناعي لدرجة ما تدري انه اللي كتب هذا النص انسان أو آلة عايشة في سيرڤر نرويجي. 

في هذي اللستة بنستعرض ملخص لأهم الأشياء بالنسبة لنا اللي صارت في سنة ٢٠٢٣. 

سنة ٢٠٢٣ كانت سنة مختلفة للمطاعم، مطاعم كثيرة قفلت أبوابها وطلعت من السوق مثل مطعم سكاليني في حيّ حطين، سلسلة مطاعم جوني روكتس الموزعة حوالين الرياض ومصنع الشاورما. السنة كانت تحديدًا صعبة على المطاعم لأنها بدأت بشهر رمضان، لكن فيها إيجابيات، فتحت مطاعم كثيرة ومختلفة ومميزة زيّ: 

حيّ السليمانية هو تجمّع مهم للمطاعم في الرياض، فيه مطاعم تاريخية ومميّزة ويمر كل سنة بفترة تصحيحية عنوانها: البقاء للأقوى. في سنة ٢٠٢٣ دخل مطعم جديد واضح انه بيعمّر سنين.. اسمه شاورما عجيبة.. والعجيبة فعلاً هي الزحمة على هذا المطعم أول ما فتح، لمدة شهر كامل كانت الزحمة وكأنهم يوزعون الشاورما ببلاش. 

الكل يبغى يجرب هذي الشاورما وما ينلامون: اطلب من عندهم شاورما عربي بالخبز الأحمر، وبدون جبن فضلًا. 

المطعم اللي فتح خصيصًا لبر الوالدين، إذا بغيت تطلع طلعة عائلية مع الأهل في مطعم رايق وأكلهم زين لا تدور غير هذا المطعم، وقّتها على ساعة استجابة بس عشان دعاوي الوالدة لك.

المطعم جاي من جدة وميزته انه يسوّي الأكل العربي التقليدي زي مسخّن الدجاج والكشري بطريقة عصرية ويضيف عليها مكونات صحية وتحلّي الطعم.

برضو في سنة ٢٠٢٣ فتحت مقاهي كثير ولاحظنا تغير كبير بأساميهم: وقفوا المقاهي يتكلمون عربي فصحى ويسمّون من كلمات على ثلاث حروف وصاروا يطلعون أصوات غريبة، زيّ تشينو سيكا تشو. يرحمكم الله. 

مقهى تشينو فتح هذي السنة في حي حطين وأعجب الناس بديكوره الخشبي ومناقيشه اللذيذة. احسب حسابنا معك.

هذي السنة فتحت مقاهي كثيرة في حي الملك فهد من ضمنها و أميزها مقهى سيكا، اللي عندهم طاقم رهيب يبتكر مشروبات منعشة. اسألهم وش اخترعوا اليوم؟ 

تشو فاز هذي السنة بالمقهى اللي يفتح النفس بتصميمه اللي يعتمد على النباتات و وجيه أهل حطين النظيفة. سكّر الأيردروب. 

مقهى يستحق الشكر هذي السنة على عيدان التشوروز اللذيذة اللي يقدمها. طرمبة. 

في كل سنة تزيد المنافسة على جيوب المستهلك أكثر وأكثر وتحاول كل المنشآت تلقط التريند، أو مثل ما يسميها الماصخين الهبّة، هذا دليل للهبّات يمكن ما بدت في ٢٠٢٣ لكن الأكيد انها انتشرت جدًا خلالها: 

بدأت مع تيكا واي، واستمرت بمطاعم مختلفة زي تيك تيك تيكا، جست تشيل، والحين اكتب (تيكا) في أي تطبيق توصيل وشف كمية المطاعم اللي بتطلع لك. ميزته هذا التريند انه عطانا ساندويتشات رخيصة ولذيذة! 

الماتشا فعلياً كان موجود من ألف سنة في اليابان، لكن السعوديين اكتشفوه وبقوة في ٢٠٢٣. كل مكان صار يبيع ماتشا، تلقاها في الكيكات، المشروبات، الأكل، والدونات. 

البخاري طول عمرنا عارفينه: محل تدخله تطلب فيه رز ووحدة قياسه: نفر. وتطلب دجاج ووحدة قياسها: نص حبّة.

ويعطيك طلبك الرز في كيسة، والدجاج في كيسة وترجع تكبّه مرة ثانية على السفرة إذا جيت تاكل. 

 سنة ٢٠٢٣ جابت لنا شكل جديد للبخاري يجيك في صحون مرتبة تقدر تطلبها للدوام، وفكروا ثم ابتكروا طريقة تقديم جديدة: يحطونه في كيس! 

هذي أشهر الأفلام في ٢٠٢٣، اخترناها لكم وحنا متحيّزين لشهر ديسمبر عشان تقدرون تلحقون على بعضها في السينما. 

مندوب الليل هو فلم من إخراج الفنان علي الكلثمي اللي اشتهر ببرنامج خمبلة في بدايات برامج اليوتيوب في السعودية، والكلثمي رائد وسبّاق: برنامج خمبلة سوّا سوق محلي للمحتوى، الاعلانات اللي اخرجها سوّت سوق محلي للدعاية والإعلان، مع أول فلم له سوّا بداية فعلية للسينما السعودية. 

الفلم يحكي قصة فهد القضعاني شاب ثلاثيني بسيط عايش في الرياض ومعاناته مع ظروفه اللي حدّته على التخلّي عن مبادئه، ومع إن الفلم من بطولة الفنّان محمد الدوخي اللي أدّى الدور بكل إتقان، لكن الفلم كان فيه دور بطولة ثاني: مدينة الرياض. 

مشاهد لمطعم مقصود، مشاهد للمركز المالي، أم الحمام، وغيرها مشاهد كثيرة عطت الرياض شخصية تخدم القصّة. 

ناقة فلم سعودي نزل في شهر ديسمبير على نيتفلكس، من إخراج المخرج مشعل الجاسر اللي بدأ مع شركة تلفاز ١١ من يوم عمره ١٧، وكسب شهره كبيرة من برنامجه فليم على اليوتيوب، 

سبب فلم ناقة نقاش طويل وجدل كبير قال عنه الصحفي الكبير داوود الشريان انه "شحنة من التوتر المثير الحابس للأنفاس" ووصف فيه الممثل يزيد المجيول انه "لعب دوره بتلقائية غير مسبوقة"  فلم ناقة يأخذك برحلة سارة الشابّة العشرينية اللي لازم ترجع بيتها قبل ١٠ مساء. 

فلم أنميشن من إخراج الرهيب هاياو ميازاكي اللي ما يصنع أفلام، يصنع تحف فنية.

هاياو هو مؤسس ستيديو جيبلي اللي أنتج لنا كثير من الأفلام اللي تعلق في الذاكرة زي الأميرة مونونوكي وسبيريتد أواي، فلمه الأخير يتحدّث عن الطفل ماهيتو اللي خسر أمه في الحرب ويتعرف على طائر يتكلّم ويدله على بوابة توديه لعالم آخر.

من أقوى أحداث السنة في عالم الأفلام هو معركة شباك التذاكر اللي صارت بين فلم باربي وأوبنهايمر، أو على قولتهم: باربينهايمر. خل باربي على جنب، أوبنهايمر شفته؟

أوبنهايمر يحكي قصة واقعية للعالم روبرت أوبنهايمر اللي اخترع القنبلة الذرية في الحرب العالمية الثانية، بس حربه الفعلية كانت مع الوقت.

سنة ٢٠٢٣ كانت مليانة بالإنجازات الوطنية والأخبار السعيدة على المستوى المحلّي، هذا ملّخص سريع لأبرز الأخبار السعيدة هذي السنة:

• سماء الرياض نوّرت بخبر اكسبو ٢٠٣٠، الرياض احتفلت بـ٢٢ ألف لعبة نارية غير طائرات الدرون والإضاءات اللي ملت السماء احتفالاً بإعلان فوز المملكة باستضافة إكسبو الدولي ٢٠٣٠

• وعدنا مع الأرجنتين في ٢٠٣٤، رئيس الفيفا أكد استضافة السعودية لكأس العالم في عام ٢٠٣٤، اللي غالباً بنفوز فيه إن شاء الله اذا ما اعتزل سالم الدوسري. 
  

• إيزي إيزي… كاس عالم أوفرواتش لنا، هذي السنة فاز المنتخب السعودي بكأس العالم في لعبة أوفرواتش في مباراة نهائية حماسية مع المنتخب الصيني.
  

• علي وريانة تقهووا وقدعوا تمر في الفضاء، هذي السنة راحوا فيها علي القرني وريّانة البرناوي في أول رحلة تاريخية سعودية لمحطة الفضاء الدولية.
  

• السعودية من كثر ماهي سكّر ترشّحت لمجلس إدارته، في نوفمبر هذي السنة تم انتخاب المملكة عضواً في اللجنة الإدارية لمنظمة السكّر الدولية. (مالها دخل بالمرض)