دليل الجداوي في الرياض

تاريخ النشر 2023-02-15

في السنوات الماضية انتقلوا كثير من أهل جدّة للعاصمة الرياض، ورغم ان فيه اختلاف ثقافي كبير بين المدينتين الا ان مدينة الرياض زيّ كل المدن العالمية تتشكل ثقافيًا لتلبية رغبات سكانها، وفي هذي اللستة بنحاول نورّي أهالي جدّة وشلون تشكّلت الرياض عشان تناسبهم.. حيّاكم الله في لستة ٢٧ من كلماشي، دليل الجدّاوي بالرياض.

  قبل ما نبدأ نبي نأكد لكم اننا ما راح نقول النكت الشعبية المعتادة عن أهل جدّة، مافيه طرطشلي أو قمر الدين دبيازة، ومافيه جدّاوي ارتاح لبدوي وقال له: اسم أمي سحر، وأنت وش اسم أمّك؟ رد عليه البدوي: اقطع واخس! قام قاله الجدّاوي: حلو بس غريب وطويل شوي.

نمزح معكم، نحبكم، والرياض مدينتنا زي ماهي مدينتكم.. قبل لا نبدأ باللستة نشوف الكاركتير مع أحمد باوزير.


المطعم الأول:

عمدة المنتو

الفرموزا أكلة جتنا من آسيا الوسطى وتكمّل كل مائدة حجازية، بالنسبة في كلماشي أفضل مطعم يقدّمها بالرياض هو عمدة المنتو.

عمدة المنتو مطعم صغير بحيّ الروضة، وغير الفرموزا يقدّم مائدة حجازية متكاملة مثل المنتو، البفّات محشوة جبن ولا لحوم أو خضار واليغمش بصيغته الآسيوية.. مو صيغته اليمنية اللي للأسف مدينة الرياض خالية منه.

  

المطعم الثاني:

دندن

هذا المطعم هو واحد من أشهر المطاعم الاندونيسية في جدة، بس اللي ما يعرفونه أهل جدّة انه فتح في الرياض قبل لا يفتح عندهم.. كان عنده فرع صغيّر في سنة ١٩٨٨ ثم نقل سنة ١٩٩٧ لشارع حراء الشهير في جدّة، وصار معلم من معالمه.. اليوم في سنة ٢٠٢٢ رجع فتح بالرياض وتطوّر وتحوّل من مطعم شعبي لمطعم فخم.. بس أصالة مطبخة ما تغيّرت، للحين تقدر تأكل الساتي، والكادو كادو، والناسي قورينج والبالا بالا. معلومة بسيطة عن المطبخ الاندونيسي: اذا كان كلمة الطبق متكررة في اسمه فمعناته انه لذيذ.

المطعم الثالث:

مطعم ومطبخ الفتح

فتح أولًا في حيّ قربان بالمدينة المنورة سنة ١٩٩٩، ثم تحوّل لجزء أساسي من مطاعم المنطقة الغربية لأنهم متخصصين بالمطبخ الحجازي الأصيل.. أشهر طبق عندهم هو الرز الكابلي وهو طبق من أصول أفغانية يتكوّن من رز بخلطة "مفخخة" حسب كلامهم من البرتقال والورد والكادي والزعفران والخولنجان وعصير البرتقال، وعندهم سليق مديني بالحليب والهيل والمستكة والسّمن البرّي..

برضو عندهم بشكل دوري رز بالحمص بس تاريخيًا أهل الحجاز يأكلون الرز بالحمص في وقت العزاء فقط.. تقدر تأكله عزاءً على كل الرزيزات اللي أكلتها بدون حمص.


وش قالوا أهل جدة بعد انتقالهم للرياض؟

سألنا 🥰 أهل جدة 🥰 اللي انتقلوا حديثًا للرياض، وهذي اقتباسات منهم مع تعليقات مننا:

"غريب حب اهل الرياض لشاورما الدجاج عكس اللحم." -دحوم، ٣٠ سنة

تعليق كلماشي: لأنك ما ذقت شاورما ماما نورة يا دحوم.

"البسس (القطاوة) هنا عايشين حياة احسن من بسس جدة." -بيان، ٢٧ سنة.

تعليق كلماشي: وش تسوون في البسس بجدّة؟!

"اشتقت لبوفيه القريات في جدّة وبوفيه الأمانة" -عبدالله، ٣٥ سنة.

حتى حنّا يا عبدالله، حتى حنّا. ليت بوفيهات الرياض يستخدمون نفس صامولي القريات


المطعم الرابع:

توينا للمأكولات البحرية

البحر الأحمر هو أكثر بحار الكرة الأرضية ابهارًا بكائناته البحرية وشعبه المرجانية، %١٠ من أنواع الأسماك اللي فيه مهب موجودة بأي مكان ثاني حول العالم. هل اشتقت لأسماك البحر الأحمر؟ روح توينا اللي فتح حديثًا بالرياض، بشكل اسبوعي يجيبون أسماك البحر الأحمر الطازجة مثل سمك الناجل، الهامور، والحريد.. وثمار البحر زيّ جمبري البحر الأحمر.


المطعم الخامس:

العم خليل

العم خليل وهو شخصية محبوبة جدًا في جدة له قصّة تشبه قصص أفلام هوليوود، سافر أمريكا وتحديدًا تكساس وأكل في مطعم هناك في مقاطعة تايلور الصغيرة جدًا ومن يومها وهو مصاب بعدوى الباربكيو، يقول لنا العم خليل قصته مع إعلان قديم عمره ٣ سنوات لقاه في جريدة محلية هناك لواحد يبي يبيع فيها فرن باربكيو قديم، تحمّس العم خليل وقال لازم أروح أشتريه لكن البائع رفض بيعه إلا بشرط واحد: ان العم خليل ينظف الفرن تنظيف تام عشان يتأكد من جديته. بعد أيام من التنظيف تمت البيعة ورجع العم خليل بأهم أسرار الباربكيو الأمريكي الأصلي.

فتح مطعمه الاول في جدة. كانت البداية صعبة لعدم تقبل المجتمع لهذا النوع الجديد من الأكل. لكن بسرعة نال اعجاب و حب الناس بين اهل جدة. و فتح له مطعم مؤقت في بوليفارد موسم الرياض، و بعده فتح اول فرع رسمي له في الرياض.

 العم خليل هو فخر مدينة جدة. وفخرنا كلنا كسعوديين. انسان لطيف و يحب يعطي وقته للجميع و ذو اخلاق عالية و متواضعة. و بالنسبة لنا كل ما يقدمه المطعم لذيذ، خاصةً خدود البقر و بشهادة من فريق البحث و التقصي من كلماشي نعتبره الذ باربيكيو في السعودية. يا حظنا فيك يا عم خليل.

المطعم السادس

شاورما الرمال

قد سمعت عن الشاورما الفندقية؟ قبل ما يكون مطعم، كان فندق في نهاية السبعينات في جدة. ثم بعد ما كانوا كل نزلاء الفندق يطلبون نوع معيّن من الساندويتشات تحوّل لمطعم في سنة ١٩٨٦.  اشهر شي عندهم هو شاورما اللحم بخبز صامولي.. أهل جدة عكس أهل الرياض يفضلون شاورما اللحم على الدجاج.  رغم ان شاورما الدجاج حقتهم برضو لذيذة.

قالوا لنا إدارة المطعم عن شكوى رفعها واحد من الزبائن، قال لهم: أنتم ليه مانتم بالرياض؟ واليوم فتحوا فرعهم في السليمانية. 

في إشاعة انه عندهم اكثر مخلخل تخلخل في تاريخ المخلخلات، ما نقدر ننفي ونثبتها بس نقدر نقول لكم وبشهادة فارس طباخنا غير الماهر انه مخللهم هو اللي يكمّل شاورما اللحم الرائعة حقّتهم. 


نظريًا، تقدر تطلب مرسول يوصّل لك من جدّة للرياض، ولا تنسى تستمع بعروضهم الخاصة بكأس العالم 

شارك هذي اللستة

التعليقات


منتو اكسبرس وينكم عنه

قبل ٣ أشهر - خالد

بصراحة فقدت عيوش المدينة اول ماجيت مافي عيش حب فكل مكان وترى اهل الرياض حبوبين بس يبغالهم وقت .. الفرق اهل الغربية يدخلو فالواحد بسرعة من وقفة عند الكاشير

قبل عام واحد - صفاء
عطنا رأيك

تبي تقرأ لستات ثانية؟

جدول يوم كامل في الخبر الشمالية

دليل الغافل عن محلات الفلافل

اللستة المتكتكة