كيف تأكل ثلّاجة بالصيف؟

تاريخ النشر 2024-01-03

في دورة الكورة الأرضية على الشمس حنّا قرّبنا نتوسط فصل الصيف ☀️ ومب بس قرّبنا نتوسط، قرّبنا نستوي، ننشوي، وننطهي.  اليوم أوروبا تعاني من موجة حر قاتلة، وهذا لأن الأوروبيين ما تكيّفوا مع الأجواء الحارة هذي، عكسنا في السعودية، إذا وصلت درجة الحرارة ٤٤ وشلون يتكيّف الواحد؟  يشغّل مكيّف.  المكيّف بيعتني بالتكييف الخارجي، أما للتكيّيف الداخلي فالطريقة اللي نبرّد على نفسنا فيها هي اننا نأكل اسكريم، أو نشرب ميلك شيك أو أي عصير مثلّج يسرسح.  في هذي اللستة جمّعنا قائمة من ٣ محلات اسكريم، محل عصير، ويمكن محل ميلك شيك.. لازم تعرف ان هذا مب تشخيص طبي رسمي لكن إذا شلت اللوز قريب فهذي اللستة تصلح لك. 

المكان الأول

اسكريم ذكرى

من اسمه، المطعم قديم.. له في الرياض ٣ فروع وفرعه اللي موجود في حيّ الروابي يجاور الجدار بالجدار لباسكن روبنز ولكن باسكن ما يقرّب من زحمة ذكرى، صح اسكريم ذكرى مزدحم غالبًا وهذا لأنه من أنواع المثلجات اللي نصنفها عسكريم، طعمه قديم وسعره قديم.. الكورة الكبيرة بـ ١١ ريال بس. 


وفي خانات الذكريات حط ايدك على نكهة الشمام. لذيذة بس وجودها للأسف دوري، المميز فيها ان الشمام مهب جايك زيّ إتنا، حقيقي. بيجيك صناعي بس بس بتركيبة كيميائية مميزة، لأننا نتوقع انهم يحطون معها هرمون السعادة. 

المكان الثاني

جيلاتو إتنا

هذا المحل عليه نقاش واسع، هل يعتبر محل جيلاتو ولا محل يبيع مواد غذائية بالجملة؟ مثال: لمّا تطلب منّه نكهة الفستق فأنت بتاكل فستق حقيقي بدون أي وسيط.. الفرق بس ان الفستق حقهم بتاكله بملعقة مب تقشْمه.  ونظرية انهم بيع بالجملة تأكد نفسها عبر المنيو حقهم المتغيّر، تزامنًا مع محاصيل ثمار السعودية هم يبدعون بنكهات غريبة مثل سوريه الترنج اثناء مهرجان الحمضيات في الحريق أو مشمش تبوك إذا كان في موسمه.  إتنا صار محطّة رسمية لزوّار الرياض وأهاليها، يبرد عليهم داخليًا ويثلج صدورهم. 

المكان الثالث

التوت الشامي في السليمانية

تبي تبرّد على نفسك بطريقة طبيعية؟ خذ لك عصير رمان من هذا المكان وطافش فيه بفمّك. في فصل الصيف كل شيء بيرفع ضغطك، زحمة الشارع، العواصف الغبارية، وحرارة الأرض.. لكن كأس عصير الرمّان هذا بيتكفّل انه ينزل ضغط دمك ويغذّيك من الفيتامينات المفيدة زي فيتامين سي.

نعرفكم على صالح عربو، ابو علي. الوجه السموح هذا هو اللي شغّل المكان لمدة ١٧ سنة. رفض اننا نتكلّم معه قبل ما يضيّف فريق كلماشي كامل على عصير رمّان لذيذ جدًا.  أبو علي عنده روتين يومي يتمحور حوالين عصائره اللذيذة، وهو يوميًا بعد قهوته الساعة ١١ صباحًا، يحضّر ويوزّع جوالين كبيرة من العصائر الطازجة لأكبر المطاعم الشامية في الرياض، وبعدها يبدأ بخدمة الزبائن بنفسه مع فريقه الصغير.  اذا تكلّمت معه بتلاحظ عنه انه كثير الحمد لله، وقال لنا لمّا سألناه عن الشيء اللي يبسطه: هو الإخلاص بالعمل، لأنك اذا اخلصت نجحت. 

المكان الرابع

بوظة مروان

في فصل الصيف الأجواء ما تصير ممطرة بالرياض، بس قدام هذي البوظة الأجواء بتكون ممطرة وبغرازة في فمّك. 

عندهم فروع عديدة وفرعه الأخير في حيّ الوادي شمال الرياض،  أول محل لهم كان في النسيم، ويسوّي الايسكريم بالطريقة التقليدية الشامية، الطريقة التقليدية متعبة نوعًا ما بس تستاهل. نكهتنا المفضلة منّه هي بوظة راحة الحلقوم مع بوظة ماء الورد.  ليه؟ لأن بوظة راحة الحلقوم تتغطى ببسكوت بودرة اللوتس اللذيذة وبوظة الورد تعطّر فمّك كأنك شام هوا من الطايف. 

رسميًا خارج القائمة

ملك شيك هرفي

ميلك شيك هرفي واحد من ألذ الميلك-شيكات في طفولة كثير مننا، بسيط جدًا ولذيذ ويجي منه نكهات. 

هرفي يستخدمون في مكائن شركة تايلور، الأكبر والأكثر شهرة في قطاع مكائن الاسكريم، هذي الشركة هيّ اللي تشتغل مكائن ماكدونالدز ايضًا في أمريكا، وهي نفسها المكينة الشهيرة هناك بكثرة تعطلها لكن عندنا الحمدالله تشتغل دايمًا، بأي فرع وبأي وقت.. تقدر حتى تفطر ميلك شيك، اذا تبي. 

بس ليه ميلك شيك هرفي مب في القائمة؟ لأنه للأسف صاروا يقدمونه بكوب بلاستيك، ومن يومها وطعمه متغيّر علينا، فريقنا في كلماشي عندهم حل لهذي المشكلة، تابعنا على تيكتوك عشان تعرف وشو الحل.

شكرًا لكم ولوقتكم، نختم اللستة بفقرتين: اضحك مع غير البشر وهكّر مرسول

اضحك مع غير البشر

هكّر مرسول! مرسول ما يوصلك الأشياء لبيتك بس، برضو يرسلها. جرّب مرّه ترسل ايسكريم لأحد هدية يبرد على نفسه في هذا الصيف الحار. 

شارك هذي اللستة

التعليقات


باسكن عنده مسلك شيك جامد برضو .. ايضاً الماك فلوري بالاوريو حق ماكدونالدز يممممي

قبل عام واحد - امجاد

ميلك شيك فايف قايز الذّ ميلك شيك في العالم

قبل عام واحد - Musab Aljarman
عطنا رأيك

تبي تقرأ لستات ثانية؟

السعوديين يتقهوون أكثر من اللازم

دليل السفرة الاقتصادية لأبها

تجهيزات ساوندستورم