البقرة ما تمل من تناول العشب نفسه يوميًا، بينما الإنسان يمل من التكرار. وهذا الفرق الحقيقي بين الإنسان والحيوان. 

حنّا سيطرنا على النار، هم لا. بعض علماء الاجتماع يسمّون الإنسان العاقل بالإنسان الطاهي، لأن سيطرته على النار مكّنته من الابتكار وكسر التكرار. 

لكن ما تحتاج علم الاجتماع عشان تدري أنك أفضل من الحيوان، فيه دليل واحد واضح وصريح: أنت اللي تشوي البقرة، مهب هي اللي تشويك. 

المشاوي أو المشويّات هي نوع من أنواع الأكلات اللي ما يفضّل تأكلها جوّا البيت، لازم تأكلها بمكان ما فيه سقف زي حوش بيتكم أو شعبان وأودية نجد المتناثرة بكل مكان، عشان كذا حطّينا ٣ أماكن للنزهات البرّية متخبية في منتصف اللستة. 

قبل لا نبدأ، في مفاجأة سرّية بنعلن عنها يوم السبت، إذا كنت من سكان مدينة الرياض فأنت بتنبسط جدًا بالإعلان اللي بنسوّيه يوم السبت. 

من ٤٥ سنة والـ "باترون" كما يسمونه موظفين المحل الأستاذ أبو علي موجود في زاوية هذا المطعم التركي اللذيذ، 

على كرسيّه الخاص،، يستلم الكاشير ويأمر هذا وينهى هذاك في سبيل الجودة وخدمة الزبون، دائمًا مع أبو علي شخصين اثنين: أبو جميل وأخو أبو علي، اللي هو معلم المشاوي. شخص بشوش لطيف مبتسم دومًا، وبشاشته تترجم في مشويّاته. 

أبو جميل ماله علاقه بالمطعم لكنه صديق للـ "باترون" ويعامل زوّار المطعم وكأنهم زوّار في بيته. مطعم الشرقي يستخدمون خبز تركي لذيذ، إكمِك، الوجبة المتكاملة الموصى بها: صحن كيلو كباب مشكل. و أكّد عليهم يضيفون كباب دجاج (شيش طاووق و كباب لحم و دجاج و أوصال) يجي معاه سلطة بقدونس و مخللات جانبي مع فلفل حار. و صحن مزة باردة مشكلة (حمص،متبل، بابا غنوج). و زيادة ثوم على جنب.

أول شيء تلاحظه في هالمكان الصغير هو منطقة الشوي وظهر معلم المشاوي اللي تشوفه أول ما تدخل، هذا المحل صغير جدًا إلا إنه وسيع وشرح بقلوب العاملين فيه. 

كل مرة تمر فيها من شارع الإمام فيصل بن تركي، راح توقف، بدون تفكير وتتلفت وأنت تتساءل وش هالريحة اللي تناديك؟ بتلقى نفسك وصلت لباب محل مشويّات منيرة. اللي لاحظناه ان اهل الحي يعاملون المطعم معاملة القهوة، كل ما زانت الجلسة راحوا له وبشكل يومي ياخذون لك ساندوتش كباب يروقون عليه، إلا أن المحل كان يسمى "مشويّات سعد" لكن الآن صار مشويّات منيرة، سعد سابقًا.. ما بغينا نبحث بالموضوع أكثر وأكثر منعًا للإحراجات. 

حول الرياض وعلى بعد ٨٦ كم تلقى هالشعيب الرهيب، أشجاره كثيرة وأزهاره بديعة ولكن خلّك حذر وقت المطر من السيول والتغريز، هذا الخوف ما راح يمنعك من أنك تروق وتنبسط وتبعد الهموم وتستبدلها بالراحة النفسية والانبطاح أمام منقل الشوي اللذيذ. 

المعلم عبدالمجيد يشوي ما لذ وطاب من لحوم العجل والغنم يوميًا من ١٣ سنة في هذا المطعم اللذيذ، والبهار اللي يستخدمه له نكهة مميزة وخاصة فيه، والمكان نفسه مبني على شكل البيوت الحجرية اللي تلقاها في الأرياف حوالي نهر الفرات. 

ميزة المطعم الرئيسية عندنا في كلماشي إنه في نفس الحي اللي موجود فيه مكتبنا وكلما بغينا نتبخّر فتحنا الدريشة وشمّينا مشاويهم.

بالقرب من حديقة الفوطة يقع هذا المطعم الجميل، وأنت هناك فعلًا بتبكي على الأطلال.. مهب لأنها ضاعت، لأنها خلصت.  المطعم فيه طاقم عمّال يمثّل الوطن العربي بكل أقطاره: المصري و السوري و اليمني و المغربي وكلهم فرحانين بفوز منتخبنا، الشيء الوحيد اللي مب عربي هناك هو خرفانهم.. لأن خرفانهم نيوزلندية. 

-> في مطعم ثاني اسمه الأطلال لذيذ ايضًا في أم الحمام الغربي <-

على بعد ٨٨ كم من الرياض هذي المنطقة الوعرة والصخرية لها وادي جميل يستاهل تشد له الرحال.

المكان واسع وشرح وفي وقت الربيع أو بداية الشتاء يظهر الوادي بكامل جماليته، وبعد ما تحط رحالك فيه وتضبط العدة بتشوف إطلالة الوادي و شلالات الأمطار تقولك حان وقت المشاوي.

فاتح حديثاً من ٢٠١٠. 

بهذا المطعم راح تعرف ليش أكل المشاوي عبادة، لأن وبكل بساطة، بتدخل حالة من الخشوع وأنت عندهم من لذة المشاوي وصوت القرآن اللي شغال بالخلفية. مطعم وملحمة الأحمدي سابقاً، المحمدية حالياً، يذبحون ويصلخون، وبالعزايم يجمّلون حتى لو وحيد، ساندوتش الشيش طاووق تضمك وتطبطب عليك.

لحومهم تجي من مزرعتهم الخاصة عشان هذا اللي مخلي جودتهم ثابتة، وهذا المطعم نقدر نسميه المطعم القادح، مو لأنه شبابي، لا! لأنه فاتح فرعين بالملز على شارع عبدالله الهمذاني يمين ويسار منافسهم مشويات الشرقي. 

المطعم هذا كاتب اسمه غلط، تحليلنا للموضوع انه الشخص اللي فتح هذا المطعم كان مشغول جدًا بتحضير ساندويتشات مشاوي لذيذة جدًا لدرجة انه نسى حتى وشلون يكتب اسمه، حنّا نسمّيه مطعم النيّة الصافية والناس الطيبة، لأنه في أم الحمام الغربي وكل الناس اللي في أم الحمام الغربي طيبين. 

أول ما تدخل المطعم بتلاحظ انك شخص محبوب، كل عمال المطعم يتسابقون على خدمتك والترحيب بك.. يشهد للمطعم جيرانه حيث انه وكّل أجيال متكررة من المشاوي اللذيذة. 

يبعد قرابة ٨٣ كم من الرياض. هذا الشعيب الصخري يروحون له العوائل السعودية لاستغلال أجواء الربيع والشتاء، واستغلال شجر الطلح الكبير الي ممكن تجلس تحته وتستفيد من ظله، وما تلمس حطبها، وأنت جالس تحت شجرها تستمع بجريان الماء ومعك كوب شاي الحبق بعد ما شويتوا كباب أنت وأهلك.

هكّر مرسول!

وانبسط مع عروض كأس العالم لأن التوصيل يبدأ معهم بـ ١ ريال