الفطور بونجور

تاريخ النشر 2023-02-15

 

الكروسون هو مخبوزة من فصيلة البندقيات، والبندقيات هي المخبوزات اللي جتنا من مدينة البندقية الساحرة اللي بين ايطاليا والنمسا، كثير يشاع ان الكروسون فرنسي وهذي الصورة النمطية فيها حقيقة نوعًا ما لأنك تلقاه في كل مكان بباريس، 


اليوم شوارع الرياض مثل شوارع باريس، تقدر تلقى قهوة وكروسون بكل مكان، بعضها تضيّق الصدر، وبعضها لذيذة. ممكن تعتقد ان الكروسون في الرياض هي هبة لحظية، لكن فريق البحث والتقصي عندنا في كلماشي يقول لنا بأن في ٢٠٢٢ فتحت محلات كثيرة مخصصة تبيع كروسون وفي ٢٠٢٣ بتسكر محلات كثيرة منها، الحكم لك. 


في هذي اللستة بنوريك اللي نتوقع انه ماراح يسكّر منهم، ٦ محلات ومقاهي تقدم كروسون لذيذ، وسوبرماركت! 


المحلات في هذي اللستة ما جتنا من فرنسا، جتنا من رواد أعمال وخبّازين سعوديين من أنواع مختلفة، بعضهم تعلم في مدرسة كوردون بلو للطهي المشهورة، وبعضهم تعلموا في بيتهم من المعلم الأكبر: يوتيوب. 


المكان الأول

إيزي بيكري

وشي ريحة الزبدة؟ بتشمها اذا رحت هذا المقهى الصباح، لا يجذبك شكل الكروسونات المصفوفة في العرض لأنك عشان تطلب لازم 

توقف بطابورهم الصباحي. وطابورهم الصباحي يزدحم بسرعة! 

إيزي بيكري من أول المخابز اللي بدأت الهبّة، بدأو يبيعون عبر حساب الإنستقرام، ثم صاروا محل يزورونه الناس يوميًا. 

جرّب عندهم كروسون الطحينية والجبن السايل. فريس الطباخ غير الماهر يقول عنّه: لذيذ. 


المكان الثاني

باك

هذا المخبز توّه صغيّر في شهره الأول، لكنه بدأ يتكلم، وأول كلمة له كانت: كروسون! 

محل هادئ يشغلونه شباب لطيفين وبشوشين، ويحق لهم، لأن إطلالة المحل الشرقية تحمل يوميّا منظر يبهجك: شروق شمس الرياض على شارع أبو بكر المزدحم صباحًا ومساءًا. 

كروسون الزعتر عندهم لذيذ، يستخدمون فيه جبنة الفيتا وعندهم مخابئ سريّة: أماكن معزولة يمين ويسار المدخل تقعد فيها وتشرب قهوتك مع أفكارك وتفكّر: ليه الناس تحب الكروسون رغم انه سنديوتشة هوا؟ 


المكان الثالث

مخبز تي إف

نضمن لك بتطلع من هذا المخبز وأنت مستعجب من جودة مخبوزاتهم، خبّاز المخبز طلال فهد كان مهووس بالخبز من يومه صغيّر، كانت هواياته وتطوّر فيها بشكل ملحوظ من كورسات اليوتيوب، من الكروسونات عندهم جرّب الحلاوة الطحينية بالهيل وعندهم غير الكروسون فوكاشا لذيذ يتميّزون فيها. 

المكان أجوائه دافئة حتى لو كنت بعز الشتاء، اذا رحت عندهم خذ طلّة جوا مخبزهم، بتشوف وشلون يأخذون موضوع الخبز بجدية عالية، وباحترافية مطلقة لدرجة انك تبي تقول: ياليتني خبزه بين يديهم. 


فى اليوم 12 سبتمبر 1683 فشلوا العثمانيين في غزو فيينا عاصمة الإمبراطورية النمساوية، وكانت مدينة ڤيينا آخر محطة توقّف فيها التوسع العثماني.. فيه إشاعة عن أصل الكروسون تقول انه صنع لذكرى هذا الحصار نفسه حيث استعصى على الجيش العثمانى اختراق قلاع وأسوار فيينا القوية، فحفر العثمانيون نفقاً من تحت الأسوار بالليل وحين اقتربوا في الحفر من أسوار المدينة صادف أن كان فيه خباز في المدينة قايم من النوم مبكّر ليجهز مخبزه، فانتبه للأصوات وبلّغ حاكم المدينة. يشاع ايضًا ان الكرسون شكله هلال كناية بنصر الأوروبيين على العثمانيين المسلمين، وفيه بعض الفتاوي المتنعته تحرّم أكل الكروسون. حنا ما نؤمن ان الكروسون حرام، لكن نؤمن ان الخباز هذا فتّان، والفتّان يدخل النار. 

هذي المعلومة غير مؤكدة، بس الأكيد أن الكروسون تعني الهلال باللغة الفرنسية: وعشان كذا الترجمة الحقيقية لكلمة كروسون هي هلاليات، والهلاليات كثير: هلاليات بالزبدة، وهلاليات بالبندق، وهلاليات بمدرج الملز. 


المكان الرابع

مخبز إيكو

مخبز الحيّ هذا: حيّ. توّه جديد وعمره ثلاث أشهر والمحلات اللي بجنبه ما زالت معروضة للتأجير، اذا ودك تصير جارهم. 

المخبز تحت قيادة الخبّاز محمد باز اللي يخبز الخبز بالمخباز منذ ١٩٩٧، عجبتنا القافية في مسيرته المهنية! 


الخبّاز محمد بدأ وعمره ١٩ سنة في فندق الماريوت بالقاهرة، وفي ٢٠٠٠ انضم للفور سيزون القاهرة، وفي ٢٠٠٣ جاء السعودية وبدأ يخبز بجدة ثم الرياض. سؤال، تبي تجرب الكروسون الفندق بحشوة البندق؟ رح لمخبز إيكو. (برضو عجبتنا القاقية)


المخبز نفسه كروسوناته متنوعة، كثيرة ومختلفة، تشوف المنيو وتجيك أزمة وجودية صغيرة عنوانه: وش أبي آكل الحين؟ 


المكان الخامس

مخبز اروانه

متى آخر مره قمت من النوم مشتهي تسوّي شيء بشغف؟ ما راح نعطيك كورس تدريب حياة.. بس بنعلّمك عن قصة حياة راكان الهندي، مالك وخبّاز مخبز اروانه:  ترعرع منذ الصغر في المانيا بحكم طبيعة عمل ابوه في السفارة هناك، ثم بعد ما رجع السعودية ما حصل الخبز الي كان يأكله هناك! هل بكى؟ هل أكل لوزين وسكت؟ لا، قرر يغيّر الموضوع بيده وفتح مخبز رهيب مره في حيّ الواحة.


ولكن عشان يفتح مخبز رهيب زي اروانه لازم يدرس الخبز، رجع المانيا درس أصول الخبز ثم لحقها بدورات في لندن ثم فتح المخبز في سنة ٢٠٢٢. 


الي علمنا عن هذا المكان كان صديقنا مدون المطاعم المخضرم سليمان المحيميد، وبعد ما رحنا كان التعليق اللي عندنا: يا حظ اللي يقوم بدري في حيّ الواحة، لأن هذا المخبز يفتح بدري عشان يلحق يقدّم مخبوزات طازجة يومية ومتنوعه وبرضوا يسوون منتجات موسمية مثل مخبوزة دينماركية بليوسفندي أو القشد. 


المكان السادس

كارفور

غالبًا الي يدخل كارفور عنده هدف واحد ثابت، تدخل، تأخذ صامولي من مخبزهم و ٤٥ شغلة ما تحتاجها، زيّ البرقوق المستورد أو مخلل القواقع.. 

كل المنتجات الموجودة في كارفور تاله مول هي نفسها اللي موجودة في كارفور الشانزليلية، لكن بدال الصامولي عندهم أخوه اللي دارس برا: الكروسون. 

كل هذا بفضل الرئيس التنفيذي مارسيل فونييه يوم قرر بأنه يبيع كروسون أكلتهم الشعبية في فرنسا لجميع العالم في السوبرماركت ب

جودة ممتازه وبسعر ملائم للجميع، نضمن لك اذا شريت كروسون من كارفور بيكون طعيّم، وبسعر اليم، وبتعيش بنعيم!


شارك هذي اللستة

التعليقات


وين croi beakehouse عن اللسته !!! الافضل بلا منازع المخبوزات خفيفه و لذيذة 👌🏼👌🏼👌🏼

قبل ٥ أشهر - نوف !

حرام إيكو بيكري يكون في هذي القائمة، الكرسون عندهم سيء كله زيت وعجين، في المقابل إيزي بيكري وBAC هم الأفضل في اللسته

قبل ٧ أشهر - الباحث عن أفضل كرسون في الرياض

ياسلام احلى لسته صدقاً احب هالانواع من اللستات👌🏼😍بنمشي عليها ونشوف ولاتنسون تضيفون كروي بيكري مكان يستحق الذكر👍🏻

قبل عام واحد - Amani Abdulaziz

مخبز اروانة جودة رائعة وأسعار معقولة 👌✨والأجمل رائحة المخبز الشهية 😍♥️ 🍞 🥐

قبل عام واحد - Fatima

نبي لستة للصامولي

قبل عام واحد - غلو

جرّبت ايكو بعد اللستة هذه، رهيب مرة!

قبل عام واحد - سوسو

جوي وأجوائي هاللستة 🫶🏻

قبل عام واحد - رنا
عطنا رأيك

تبي تقرأ لستات ثانية؟

أفضل ١٥ مطعم في مدينة الرياض

دليل الجداوي في الرياض

ليه نحب السعودية؟