الكيكة أكلة ما قصرت معنا، حاضرة بكل مناسباتنا السعيدة بس مب لازم تحتري المناسبة السعيدة تجي عشان تاكل كيكة. 

تقدر تاكل كيك وأنت تتابع فلم أو ناشب بالزحمة أو تسلم البحث النهائي لدور الميتوكندريا في الخلية، المهم ان الكيك ماله مناسَبة مناسِبة، الكيك هو المناسَبة المناسِبة،  بس السؤال الأنسب هنا: من وين تاكل كيك في الرياض؟ تابع اللستة عشان تعرف.

هذي اللستة تم تحضيرها بملعقتين صغيرة معلومات عن محلات الكيك في الرياض، ملعقة كبيرة معلومات تاريخية، رشة فكاهة، وثلاث أكواب كبيرة من المصالة. 

محل الذواق للكيك هو أكثر وجهات الرياض الكلاسيكية، فتح عام ١٩٧٨ وتجددت داخليته أكثر من مرة إلا انه ما زال محافظ على عراقة المكان، لكن أول لحظة لك جوّا الذواق بتلاحظ فيه بعض التسريبات: المحل يقوطر فخامة، 

مختصين بالأشياء الفخمة مثل: الحلا والشوكولاتة والأجبان الفاخرة، عندهم بعد لاونج خاص للسيجار الكوبي. اذا هو فخم، فهو ينباع في الذوّاق. 

الذواق عندهم ميزة رهيبة: تقدر تشرح لهم كيف تبغى كيكة أحلامك ويخلونها كيكة واقعك، بيخلونك تجلس مع الفنان حقهم وأطلق العنان لخيالك وهم عليهم التنفيذ، والطعم؟ لا تشيل هم لأن شعارهم مثل ما قالنا أ. فيصل مدير الفرع: "الذواق للذويقين". 

إذا دخلت المحل بتشوف على جدارهم لوحة كبيرة معلق عليها مقالة من صحيفة عرب نيوز عام ٢٠٠٣، المقالة تتكلم عن المحل والطباخ الفرنسي الفنان فيليب سيقوند اللي هاجر فرنسا وجاء للرياض مخصوص عشان يسوّي كيكات عالمية باحترافية المطبخ الفرنسي، الطباخ فيليب يسوي كيكات زواج من كبرها يضطرون ينقلونها مفككة ويركبونها في القاعة. حسب علمنا هذا اجراء معتاد يسووّنه الناس اذا يبغون يكسرون رقم قياسي لأكبر كيكة في العالم، بس انت تبي تسوّي كيكة عرسك، ليه تحسبها بالمتر؟ 

الذواق عندهم ألذ اكلير وبأنواع كثيرة، وهم أول من سوا مارون قلاسيه في الرياض وهي عبارة عن حبات كستناء (أبو فروة) مغطاة بالشيرة.. ودنا نمدحهم أكثر وهذا مب اعلان، لكن يمكن يلاحظونا ويرسلونا اشياء مجانية للمكتب. 

اذا نبي نقترح لهم يرسلون لنا شيء فبنقترح التالي: كيكة الكونكود الأسطورية، هذي الكيكة كانت في وقت ما الأشهر في مدينة الرياض، فخمة وفاخرة ومميزة بشكلها وكأنها محرك طائرة الكوكنورد النفاثة، أفخم طريقة للنقل الجويّ، بنتكلم عنها أكثر في اللستة. 

وبرضو مرة وحدة اذا بيعطونا هديّة نبي ٣ كيلو كافيار، علبة سيجار كوبي، جبنة مونشيقو الإسبانية. نمزح معهم، وبنمدحهم لأن كيكاتهم تستاهل. 

مب بحيّ الندى، هذا المحل سمّي سكر الندى على اسم صاحبته الرهيبة ندى، اللي من يومها هاوية و مبتكرة لوصفات الكيك وقررت تحوّل شغفها مع أسرتها لعمل تجاري. 

سلسلة سكر الندى بدأت من جدّة ووصلت للرياض ورايحة قريبًا للشرقية، في كل توسّع لمدينة جديدة عندهم قاعدة: ما يفتحون فرع جديد إلا إذا انتقل فرد من أفراد عائلتهم لها، أو فيه أحد عايش هناك. 

زرنا فرعهم الجميل في ثلاثين العليّا وقابلنا أ. نسيبة، مديرة فروع الرياض وابنة ندى نفسها اللي تهتم بكل تفاصيل المحل بشغف ينتقل عبر الوراثة.. علمتنا أ. نسيبة عن بعض أسرار المحل، مثل كيكاتهم الصيفية زي كيكة تشيزكيك بالمنقا و كيكة البرتقال، أو كيكتنا المفضلة الشخصية.. الكرنشي تشوكلت كيك. يَم.

عندهم بعد كيكات منتب لاقينها في المنيو لكن تقدر تاخذها بالطلب المسبق، زي: كيكة الغابة السوداء اللي هي كيكة ندى المفضلة.

بعد بحث دقيق ومطوّل بإستخدام تقنية حديثة اسمها قوقل اكتشفنا التالي: أول من بدأ في خبز الكيك هم قدماء المصريين الفراعنة: كانوا يخبزون كيكة دائرية غير منفوخة مثل الفطير (بس ما يشلتتونه). كانت بكل بساطة خبزة يضاف لها مكونات حالية زي السكر و العسل والفواكه. 

ومع الزمن تطور الكيك للابتكار اللذيذ الي هو عليه اليوم.. و بعدما اكتشفوا الفراعنة الخميرة هذي الخبزة انتفخت، ثمن انتخفت بطون البشرية كلها. متشكرين أوي يسطا.

الكيكات ما زالت تتطور وتطلع منها اكتشافات كثيرة وبأسماء مختلفة وترتبط أحياناً بأحداث تاريخية، جبنا لكم ٣ كيكات مرتبطة قصتها بالتاريخ:

كيكة الكونكورد اخترعها الطباخ قاستون لونوتر عام ١٩٦٩ اللي كان طباخ في الخطوط الفرنسية، قاستون سوّا هذي الكيكة احتفالاً بالحدث التاريخي اللي هو إطلاق طيارة الكونكورد الأسطورية.

 الكونكورد طائرة ركّاب غير حربية لكنها أسرع من الصوت، لو تشوف شكل الطيارة بتلاحظ ان مالها ذيل وتشبه الطيارات الحربية أكثر من المدنية، الكونكورد قللت وقت السفر إلى النصف تقريباً لكن بعد حادث شهير مميت في ٢٠٠٠ توقّفت الطائرة تمامًا في سنة ٢٠٠٣ للأسف، لكن كيكة الكونكورد ما زالت باقية وتحلّق.

عام ١٨٣٢ كان الأمير بالنمسا كليفنس فون مترنيش جايينه ضيوف مهمين في القصر وبغى الأمير انه يبهر ضيوفه بحلى مميّز، المشكلة ان طباخه الرئيسي اللي يعتمد عليه كان مريض ومب مداوم ذاك اليوم،

 لكن الطباخ المتدرب فرانز زاخر اللي كان عمره وقتها ١٦ سنة أنقذ الموقف وسوا هذا التارت الأسطوري، ابن زاخر خذ الوصفة وفتح فندق اسمه زاخر هوتيل ويضل هذا الحلى طبقهم المميز حتى اليوم، أنت وش كنت تسوي يوم عمرك ١٦؟ 

الشعب النيوزلندي وشقيقه الشعب الأسترالي يحبون يتناقرون في مواضيع دقيقة مرة، زي مين اللي اخترع هذي الكيكة: الأستراليين ولا النيوزلنديين. ما يعنينا الموضوع لأنهم يبعدون آلاف الكيلومترات عنّا بس ودنا نقولكم قصتها: 

پاڤلوڤا قبل ما تصير كيكة كانت راقصة باليه مشهورة ونجمة كبيرة الكل يعرفها في سنة ١٩٢٦، ذاك الوقت كانت في جولة زارت فيها أستراليا ونيوزلندا، الراوية النيوزلندية تقول ان طباخ فندق في ويلينقتون سوا هذي الكيكة تكريماً لها واستلهم شكل الكيكة من لبسها حق الباليه، أما القصة الأسترالية تقول ان الكيكة تم اختراعها في فندق في پيرث وسموها على اسم الراقصة بعد ما أحد الزباين وصف الكيكة انها "خفيفة زي پافلوفا" 

هذا المحل هو الأشهر في الرياض، واللي صار جزء من كلاسيكيات الرياض الجديدة، رائد الأعمال ريان الحميد أسس تشنك مع ٢ من خواته وافتتحوا مؤخرًا آخر فرع لهم في سدرة بمنطقة غرناطة هذا الفرع هو تحفة معمارية من تصميم المتألقة شهد العزاز. 

المميّز في كيكات تشنك هيّ الكيكات الموسمية اللي يصممونها خصيصًا عشان تناسب مواسم الهدايا مثل: يوم الأم واليوم الوطني. كيكات تنفع تأكلها، بس لازم تصوّرها.

كيكهتم الأشهر هي كيكة السولتد كراميل والفشار، ولأن الفشار يحتاج فلم، ننصحكم تشوفون فلم مات ديمن وبين آفليك الجديد اللي قصته عن الصفقة المصيرية اللي سوتها شركة نايكي مع مايكل جوردن وغيرت وضعهم تماماً. 

قد جربت تشيز كيك بالزيتون؟ ولا حنّا، محد قد جربها لأن هذا الطلب موب موجود عند توت وزيتون.. ليش اسم المحل توت وزيتون؟ ما ندري. بس ندري ان هذا المحل عندهم ألذ تشيزكيك في الرياض. تخصصهم بالتشيزكيك خلّا مافي منهم ثاني.

كيكاتهم خفيفة مثل السحاب، وتشيز كيك التوت المشكّل هي الأشهر عندهم.. بس عندنا لكم سؤال: هذا محل فطور ولا محل كيك؟ 

في كلماشي عندنا موقف اتخذناه مع التشيز كيك، وهو: التشيز كيك نواشف. تأكلها مع الفطور، تغطها بخبز تميس، تشرب معها شاهي، مهب حلا. والدليل؟ المحل اسمه التوت والزيتون، جزء لا يتجزأ من أي مائدة نواشف. 

من أشهر محلّات الكيك في اللي بدأت من شرق المملكة، تميّزت وبرزت سلسلة بيت الكيك في فروعها الستة بالرياض. 

لو ما لاحظت سلسلة بيت الكيك تغيّرت في السنة الأخيرة، غيّروا فروعهم، شعارهم وألوانهم لكن بقت كيكاتهم. 

كيكة الجالكسي العريقة اللي تقدر تعاملها كمخدّة من كثر ماهي طريّة أو ايرباق سيّارة تحميك من أيّ حادث. هذي هي أحد أبرز إنجازات عبدالعزيز الشعيبي مؤسس هذي السلسلة، اللي قال لنا ولده  شعيب الشعيبي تعليق رهيب: زي بيق ماك في ماكدونالدز، زي شاورما ابعه في ماما نورة، زي الفرابيتشنو في ستاربكس، بيت الكيك عندهم كيكة الجالكسي وهي المفضلة عند شعيب خصوصًا والشعب عمومًا. 

بدأ هذا المشروع المميز مع أسماء وأختها بإسمها المميز لاما، أسماء تحب تسوي كيك وفتحت هذا الحساب سنة ٢٠٢١ عشان تقدر تمارس هوايتها بس ما توقعت النجاح التجاري الكبير اللي لاقته. اذا شفتهم تقدر تمزح معهم بأشياء كثيرة: إلا الكيك. ما يمزحون بالكيك. 

 سألناهم ليش سميتوا المحل كلاي واللي تعني صلصال باللغة الانقليزية؟ قالوا لأنهم أيام حجر كورونا كانوا يلعبون بالصلصال كثير عشان يسلّون نفسهم وخبز الكيك يجيب لهم نفس الشعور. الاسم جداً منطقي ومناسب لمحل كيك، الحمدلله انهم ما كانوا يلعبون كيرم.

كلاي عندهم أكثر كيكة حميمية ممكن تطلبها، حجمها بالكثير لشخصين. تجي بعلبة رهيبة تشبه الفلين حق البرجر بس مصنوعة من قصب السكر، تنفع هديّة، تنفع للمناسبات اللي بين شخصين.. أو شخص واحد إذا ودك تكافئ نفسك بكيكة لذيذة تشبّع. 

ليليانو مخبز منزلي و حساب انستقرام من رغدة هاوية صنع الكيكات اللذيذة.

 بدأ الحساب عام ٢٠١٤ وحتى الآن ورغدة موظفة عندها وظيفة كاملة و تبيع كيك على جنب لأنها تحبنا و تبينا نذوق كيك لذيذ: زي النيكد كيك (الكيكة العارية) وهم من أوائل الحسابات اللي بدأو فيها. إذا دخلت حسابهم بتشوف أفكار رهيبة وحلوة للكيكات زي الكيكة الطفولية الجديدة كيكة أفلام الكرتون اللي كنت تحلم تاكلها وأنت تشوف توم وجيري وأنت صغير. 

وحدة من الكيكات كان فيها زي المراية بس منب متأكدين يمكنها تنوكل.. أو انها مراية سحرية تجاوب على سؤال واحد بس: مرايتي يا مرايتي، من أحلى وحدة تأكل كيكة في هذا الكون؟ والإجابة هي: أنتِ. ٠٥١٢٣٤٥٦٧٨

بين فترة و فترة ينزلون براونيز كلاسيكية لذيذة ننصحكم فيها. بالعافية!