أجواء الاحتفالية تختفي تدريجيًا من سفرتنا وتستبدلها سواليف ترجع لنا كل سنة من رمضان زيّ ان المسلسلات ما تروّي عطشنا للدراما ورمضان يمشي بسرعة ولا فطوركم دفعة ولا دفعتين. هذي السواليف والعادات تتكرر سنويًا لدرجة تخلينا نشك ان حياتنا اليومية في هذا الشهر الفضيل هي مجرد حلقة من حلقات مسلسلات رمضان. إذا ما عجبتك مسلسلات رمضان، بتعجبك المطاعم هذي عشان تتسحر عليها.

قبل ما نبدأ، ودنا نشكر تطبيق مرسول على رعايتهم لنا، بفضل رعاية مرسول حنّا ما نسوّي إعلانات للمطاعم، يعني تقدر تتأكد ان كل الأطباق والمطاعم اللي موجودة هنا دغدغت بطننا قبل لا نتكلم عنها.

المطعم الأول اللي نقترح تتسحرون عليه هو مطعم إقتصادي لأبعد درجة.. حتى اسمه مصنوع من ثلاث حروف بس..

ليه سموه كذا؟ ما ندري، بس نحمد ربنا انهم ما يأكلون من البرغر قبل لا يجيبونه لنا.. البرغر يجي مع بطاطس غصبًا عليك، وبدون إضافات غصبًا عليك، وبدون خيارات غصبًا عليك. والنتيجة؟ غصبًا عليك البرغر لذيذ. بدون فلسفة. بدون لغوصة. بدون حوسة.

المطعم الثاني اللي نقترحه يقدم بيتزا. تبي تقول البيتزا تعطش صح؟ حنا نقول لا. البيتزا كاربوهيدرات زيّها زيّ الكبسة. وش اللي يخلي البيتزا تعطش والكبسة لا؟ تحيّزك الوطني للكبسة.

نعرفكم على بيتزا ڤامبا، بيتزا شكلها هندسيًا مثير لأنها تجيك مربعة، وعندهم نوعين من البيتزا: الدترويتر (على طريقة شياكقو) و البيتزا الكلاسيكية. البيتزا حقتهم ما تجي بدون فعالية خاصة فيها، علبة البيتزا تتحوّل لطاولة تقديم صغيرة. هل الحركة هذي مفيدة لك؟ لا. لكنهم يسوونها وحبّينا نعلمك عنها.

المطعم الثالث هو مطعم يكذب عليك. بس الكذب هذا مبهّر صح ولذيذ. بيتوتي هو مطعم جاء الرياض من جدة واكتسح المشهد الآسيوي في مطاعم الرياض..

بس ليه هذا المطعم يكذب علينا؟ لأن الصينيين ما ياكلون هالكمية من السكر بأطباقهم، فأفضل وصف للمطعم هذا هو انه امريكي. زيّ الأكل الصيني اللي ياكلونه مونيكا وتشاندلر. هذي طلبات المفضلة فريس يايا المفضلة:

لحم السيشوان مب صيني بس لذيذ

لحم المانقوليان مب صيني بس لذيذ

دجاج الليمون مب صيني بس لذيذ

دجاج تسو ..يرحمه الله.

المطعم الرابع مطعم يكتم الأنفاس، مو بس يكتمها: يكبسها، يضغطها ويقلبها. زيّ كبسته، مضغوطه ومقلوبته. نتكلم عن مطعم الكاتم.. مطعم بدأ في ١٩٩٩.

وش تتسحر منه؟ تجاهل الكبسة، تجاهل المقلوبة، تجاهل السليق، تجاهل كل شيء وتوجّه لمضغوط الحاشي بالعنبر. ليه؟ لأن رز العنبر اللمّاعي ينتثر في قلبك.. ولحمة الحاشي الطريّة تشكك بعمر الحاشي اللي قاعد تأكله... هل أنت قاعد تأكل ناقة قاصر؟

المطعم الخامس هو مطعم عالمي موجود في أربعة دول بس: الولايات المتحدة، لبنان، الكويت، والسعودية. يعني مهب محل عالمي مرّه بس يستاهل يصير عالمي.

وشلون ينفع للسحور؟ أطلب قصدير الدجاج من عندهم.. فيه ٢٥ حبّة، ماراح تندم قدام القصدير وبتقول: ياليت كل القطع لي. وبتخلّص، بنفسك، كل قطع الدجاج وتشوف انعكاسك على القصدير المزيّت وتقول: مرايتي يا مرايتي... مين ألذ دجاج في هذا الكون؟ بطنك اللي بيرد.

حتى الآن اقترحنا لك تتسحر صيني، دجاج مقلي، رز عنبر، بيتزا، وبرقر.. بتزعل علينا.. بتقول كل هذي تعطش. حنّا نقول ايه، وفوق كذا المطعم السادس اللي نقترحه هو مطعم سمك. ليه نقترح سمك؟ لأنه رمضان ماله قيمة إذا كان سهل علينا، إذا تبي رمضان يصير سهل عليك: أفطر موز، تسحر موز، وخل وجبتك الخفيفة بين هالوجبتين.. موز!

وش اللي يخليك تتسحر سمك؟ غير إحتساب الأجر: السمك لذيذ. والسمك في أسماك دلة طازج يذكرك بسمك جدّة وثول. والسمك يجي مع تشكيلة لذيذة من ثمار البحر والطحينة وشطتهم الخاصة. ننصحك بعد ما تتسحر عليه: اشرب موية كثير بعده، بس انتبه لا يرجع السمك حيّ.

شكرًا لوقتك! خلّصنا لستة السحور، وعدنا الخميس الجاي في لستة جديدة عنوانها: يا حلوك في رمضان.

في كل لستة، بنعلمكم عن طريقة جديدة تقدر تهكّر فيها تطبيق مرسول، وإذا ودّك توصلك اللستة على الإيميل، عب معلوماتك هنا!