يتربع هذا المطعم على عرش مطاعم المشاوي في الرياض، رغم انه حديث نسبيًا الا انه توفّق مع الزبائن لأنه دائمًا مزدحم، 

وذلك لأنه يوفّر مشاوي لذيذة، جلسات مريحة، وطاقم عمل متمكن يسعد انه يخدمك. 

اسم "ساروجة" جاي من سوق ساروجة وهو حي قديم في مدينة دمشق، أو دلع لإسم سارة.. محنبْ متأكدين. 

مطاعم المشاوي بالعادة تتعامل مع الملاحم بشكل مباشر، بس ساروجة غير.. مطعم ساروجة هو بالأساس ملحمة كبيرة، تخدمك إذا تبي اللحم بأوفر الأسعار وألذ الأنواع. 

فيه شيء مميز بفروع ساروجة: انها مرقمة برقم الفرع، فرعنا المفضل؟ الفرع رقم ١.. في حيّ السليمانية على طريق الأمير ممدوح. هناك لهم فرعين على بعد خطوات بسيطة من بعض واحد للعوائل والثاني للأفراد. في الغالب الفرعين زحمة.. لازم تنتظر وتاخذ لك رقم كأنك بتحدّث مقدم على تمويل شخصي. 

فروعهم منتشرة في الرياض، الفرع الأول بالسليمانية والثاني حوله، الثالث بالنزهة والرابع بالربوة. 

ولسبب ما.. الفرع الخامس بحفر الباطن. 

أي وجبة عشاء في هذا المطعم هي تجربة ملحمية بامتياز.

جودة اللحوم اللي يقدمونها طازجة ونظيفة مع أسعار مناسبة وخدمة ودودة. كل المواصفات اللي تحتاجها من مطعم مشاوي. 

في كل طاولة تلاقي قوارير بلاستيكية لزيت الزيتون والأهم منه قارورة دبس الرمان تحلّي كل لقمة تأكلها.

بسيط صح؟ هذا الطلب الكلاسيكي.

نفر مشاوي مشكّل يحتوى على أسياخ من كباب لحم وكباب دجاج وأوصال وشيش طاووق. 

أول ما يوصل لك ابدأ بالتفتيش على الأوصال والشيش.

ريشهم جودتها عالية وطرية ونظيفة، حتى الأجزاء المحروقة منها لذيذة. 

تدري ليه يسمونها ريش؟ لأنها تطير من الصحن أول ما توصل الطاولة. 

الكلمة اللي نخاف نكررها إذا جينا نتكلّم عن هذي المشاوي هيّ الطراوة.

لكن افخاذ الدجاج كانت مفاجأة، لذيذة وطرية بشكل غير متوقع. ليه ما يسوّون مخدة من أفخاذ الدجاج؟

وبما إن الجو بدا يزين والمشاوي تحلى مع الجو الزين، شيك لستتنا السابقة "حان وقت المشاوي" 

تكلمنا فيها عن ٣ مطاعم مشاوي عريقة و٣ أماكن رايقة تتنزه فيها.

‎ 

كانت هذي خامس لستاتنا في لستة "مطعم الأسبوع".

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب