البروستد، أو إذا كنت مستعجل: البروست هو من الأكلات المفضلة لسكان الرياض، خاصة المستعجلين منهم، وكل أهل الرياض مستعجلين. 

البروستد هو من الوجبات السريعة، في التحضير والطلب والاستهلاك، سعرها مناسب لكل فئات المجتمع، وفيها تجارب تذوقية مختلفة بنفس اللحظة: هذيّ الوجبة تقرمش، هذي الوجبة طريّة، هذي الوجبة حارة، وسعر هذي الوجبة يبرّد قلبك. 

اقتصاديًا للوجبة منافع كثيرة، لكن أهمها الطاقة حقتها كثيرة لدرجة إن الجسم يخزّنها ويصير عندك مستودع طاقة كبير في جسمك اسمه بالعاميّة: كرشة.

الباحث في التاريخ الاجتماعي منصور العسّاف له عدة تغريدات وثريدات في حسابه تتكلّم عن افتتاحات المطاعم في السعودية، قال فيها إن البروست دخل الرياض في الستينات عن طريق شركة المطاعم الأهلية اللي عرّفتنا على أسمح وجه أمريكي: كولنيل ساندرز.

طريقة تحضير الوجبة كانت تتم بآلة عجيبة وجديدة في الرياض اخترعها الأمريكي لويس فيلان عام 1953 وميزة هذي الآلة إنها تجمع القلي العميق مع الطبخ الضغطي وتعطيك دجاج مقلي مقرمش من برا وليّن من جوا وبوقت زمني قليل.

اسم الآلة: بروستر، نفس اسم الشركة اللي أسسها من ذاك الوقت وقائمة إلى اليوم، حتى عملية الطبخ هذي سمّاها: بروستنق، حطها بصيغة الماضي عشان توصف الدجاج المطبوخ فيها وتصير: دجاج بروستد.

هذي كانت بداية شعلة الحب بين الرياض ودجاجها المقلي الذهبي: البروست. الحب اللي بدأ من مطعم واحد لكن اليوم ما يوسعه مطعم واحد ولا مطعمين، لو بتتعشى بروستد اليوم بتلقى في الرياض خيارات ما تخلّص وعشان كذا كتبنا لستة سابقًا بعنوان: ديربي الكوليسترول، ننصحك تقراها وتشوف آخر نتايج الديربي.

في هذي اللستة بنكمّل على ديربي الكوليسترول وبنذكر مطاعم بروست مهمة في الرياض ما ذكرناها في اللستة السابقة.

بس قبلها ودنا نقولك شي:

رغم كثرة الأخبار وتكرارها حول القصف على المدنيين، وقتل الأبرياء، والاضطهاد والظلم والجوع اللي يواجهه الشعب الفلسطيني بشكل يومي مو من ٧ أكتوبر فقط، لكن من أكثر من ٧٥ سنة، مهم جداً اننا ما نعتاد عليها ونكون دائماً واعين بأن خلف أرقام القتلى قصص وحكايات وأمنيات بحياة كريمة.

مركز الملك سلمان للإغاثة والأعمال الإنسانية أطلق الحملة الشعبية لإغاثة الشعب الفلسطيني في قطاع غزة

وفي ثواني بسيطة السعوديين جمعوا ملايين الريالات نصرة لأخوانهم المستضعفين في غزّة. 

هذا رابط الحملة وهي الطريقة الرسمية الوحيدة للتبرع داخل المملكة، ادخله ولا تستهين بأي مبلغ تقدر عليه.

هذا المطعم له زباين عندهم ذكريات جميلة فيه، يوم كانوا يجونه وهم بزران مع آبائهم، يوم كان الشارع اللي فيه المطعم كلّه أراضي فاضية وكأنه مطعم على خط سفر برّا المدينة، اليوم هذولي الزباين يعلقون في زحمة طريق الملك عبدالعزيز وهم رايحين للمطعم مع عيالهم، لكن أول ما يوصل يرجع له المشهد القديم اللي ما تغير.

يمّيز هذا المطعم هو إن عندهم أقدم معلّم بروستد في الرياض: عويس. أو زي ما يسمونه بعض الناس: أبو عثمان، اللي يعتبر هو روح المكان، وتلقاه بالمحل في أي زمان، ما عدا رمضان (يأخذ إجازة ويروح لتركيا).

"أنا ٤٠ سنة آكل بروستد يوميًا، وما مليت منه"

- أبو عثمان

عويس يشتغل في المطعم من يوم ما افتتح للحين، ومع إنه عايش في الرياض مع أسرته و عياله، لكن بالنسبة له زباين المطعم هم عائلته الثانية، إذا رحت المطعم وما شفت عويس في المطبخ اعرف انه جالس مع زبون يسولف معه ويسأله عن أبوه وإلّا إخوانه اللي من زمان ما شافهم.

الكوخ القديم مطعم رهيب، ولا تستغرب إذا شفت له زباين مخلصين وما يأكلون بروستد إلا منه، تلقاهم طاحوا بدوّامة الإدمان على الوصفات المختلفة اللي يتميز بها المطعم. زي شرايح البطاطس المقلية اللذيذة، أو ثومهم المركّز اللي ما يلعبون فيه بالمايونيز أو يضيفون له بيض، وأخيرًا سمكهم المقلي اللي بدل ما يسبح بالبحر، يسبح بالزيت. 

السمك المقلي يقدر يصير بروست! إذا طلبت وجبة سمك مقلي من الكوخ القديم بتجيك حبّتين سمك صغيرة مقلية، وإذا كنت محظوظ بتجيك سمكة واحدة ثقيلة كبيرة. 

الرياض مدينة مزدحمة لدرجة إن لوحة محل ممكن تكون موقف سيّارة، هذا اللي بيجي في بالك إذا شفت مطعم بروست لاين في حي الروضة والزحمة اللي عليه في الليل، بس في الواقع فيه قصة وراء اللوحة، السيّارة اللي تشوفها على اللوحة هي سيّارة ابن المالك يوم كان صغير وبعد ما كبر عليها واستغنى عنها صدف إنهم كانوا بيغيرون اللوحة، ومن هنا جتهم هذي الفكرة اللي خلّت المحل علامة مميزة في الشارع.

بروست لاين مطعم عائلي تأسس عام 1986، وفي هذا المشوار الطويل مروا بفترات تغييّر يحاولون يواكبون فيها السوق، جرّبوا يبيعون شاورما، جرّبوا يبنون فرن وسمّوا الفرع هذاك "بيتزا لاين" لكن مافي شي صمد زي فخرهم: البروست. بوصفتهم اللذيذة اللي تخلّي الناس تجي له من أقصى الرياض.

رغم مساحة الفرع الكبيرة إلا أن مقدمة تقديم الطعام تشكّل %30 من المطعم، والباقي كله مساحة تحضير وتتبيل قطع الدجاج اللذيذة. 

حاليًا، مطعم بروست لاين يقدّم صنفين بس: البروست وفيليه الدجاج. وما تحتاج غيرهم، لكن تحتاجهم كلّهم. خذ لك صحن بروست محلّي وصحن فيليه دجاج سفري تنقنق عليه وأنت في السيارة، وإذا زاد؟ ليل الشتاء طويل ما يكفيه عشاء واحد.

شركة الراجحي الغذائية اللي تملك مطعم القنديل الذهبي من 2021، فتحت 6 فروع جديدة في أول شهر من هذي السنة بس، وتوجههم في التوسع مركّز على المولات، يعني إذا رحت مول يوم من الأيام وشفت فلم في السينما واحترت وش تتعشى بعدها، شيّك إذا فيه فرع للقنديل الذهبي في المول لأنه بيكون قفلة رهيبة لليلة زي كذا.