مع كثرة فرص العمل الجديدة بالرياض مؤخرًا، شفنا ناس من حول المملكة ينتقلون للعاصمة. ومع الانتقال لمدينة جديدة، فيه أشياء كثير تحتاج تسويها من قائمة المهام الطويلة… مثل إنك تشتري أثاث، وتلقى أقرب فرع بارنز، وتكتشف أفضل طريق للدوام.

لكن من أهم الأشياء هي إنك تلقى مجتمع في مدينتك الجديدة؛ فيه ناس يلقون مجتمعهم بهواياتهم، وفيه ناس يلقونها باهتماماتهم.

بس إذا كنت من أهل المدينة وتدوّر مجتمع متعلّق ببطنك، تعال نعرّفك على مطعمك المفضل.

‎ 

‎ 

‎ 

في فترة ما كان حلم كل شاب وشابة افتتاح فود ترَك، بدأ الشيف محمد الصايغ أعماله بالمدينة المنورة بشاحنة سماها "كويك بايتس" كان يقدّم أكلات مكسيكية سريعة مثل الكيساديلا والتاكو. 

وبعد تجارب ناجحة وخبرة في السوق قرر يفتتح مطعمه الأول في ٢٠٢١ للأكلات المكسيكية اللي تتناسب مع أذواق السعوديين (يعني حرارة الأكل تناسب الأغلب)، وسماه (فويقو) اللي معناها (اللهب) بالأسباني.

هذا المطعم ممتاز للمجموعات؛ لأن مثل العرب، المكسيكان معروفين بالجمعات العائلية الكبيرة على وجبة هنيّة.

‎ 

‎ 

فويقو يعرف كيف يخدم عملائه، لدرجة ان فيه طلبات تُعرف بين الموظفين بإسم الزبون مثل طلب (مها). لما سألنا الشيف محمد وش مكونات هالطبق السري، قال انه سأل طاقم المطبخ نفس السؤال وكانت إجابتهم: هذا سر بيننا وبين الزبونة.

المطعم ما يستحي من الألوان الجريئة. بتلاحظها بألوان الجدران، والإكسسوارات، وحتى صحونهم. و في فرع المدينة عندهم باب عسيري عمره ١٠٠ سنة.

قصة أسطورية: في السنة الماضية استقر محمد في الرياض ٦ شهور عشان يركّز على فرعه الجديد. وكانت خطته أن أول ما يرجع المدينة بيشتغل على صيانة وتطوير الفرع. ثاني يوم بعد رجعته، جاه اتصال علمه أن الفرع احترق. الحمد لله كان الموضوع بسيط، والكل سليم. بس عشان يبررون لأصدقائهم سبب إغلاق الفرع مؤقتًا سووا منشور أسطوري يثبت انهم يشوفون الجانب المشرق من كل شيء وكتبوا "Rise from the Ashes"، أي "خرجنا من الرماد".

كأنه مسخّن..بس مكسيكي. هذا الطبق عبارة عن لفائف صغيرة مقرمشة مغطسة بالبيريا تجي مع صلصة كزبرة جانبية.

وبتوصية من مديرة التسويق والعلاقات العامة: اطلبها مع جبنة!

أحلى ما في البوريتو إنه يجمع لك كل المكونات الحلوة في المطبخ المكسيكي في لقمة وحدة: بروتين، رز، فاصوليا، ساوركريم وقواكامولي. يمديك تختار أي نوع بروتين تفضّله، بس ننصحك بالستيك.

نرشّح هذا الطلب لما ما تتقاطع أذواق اللي طالع معهم، لأنه بيرضي الكل.
الطبق يجمع ثلاثة أنواع بروتين: لحم ودجاج وروبيان، مع خضار وصلصات مختلفة، ويجيك معه تورتيلا على جنب. يعني كل واحد يقدر يسوّي له فاهيتا على كيفه!

كانت هذي لستتنا السابعة عشر ضمن لستات "مطعم الأسبوع" في مدينة الرياض.

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب