هذي المساحة طوروها هيئة فنون الطهي بعد جهود طويلة امتدت ٥-٦ سنوات لتجميع وتوثيق الأطباق المحلية لكل مناطق السعودية. بعدها استعانوا بهالمعلومات لتطوير بوتيك ومقهى إرث.

خلال ٢٠٢٤ افتتحوا في ٣ مدن: المدينة المنورة، جدة، والرياض. وفيه خطط لفتح أكثر من ١٣ فرع حول المملكة. ٦٠٪ من المنيو متغيّر على حسب المنطقة..هذا يعني أن منيو الرياض -للأسف- ما فيه منتو ويغمش 🙁. 

هذا المطعم للسياح وأهل البلد. لما سألنا الشيف الرئيسي لفرع الرياض (منيرة الحضيف) وش تتمنى تكون تجربة زوار المطعم، قالت: أملها أن السعودي يجي ياكل و يستمتع بطعم مثل ما كان مشتهيه بالضبط. وإن السياح يجربون أكل سعودي راقي بأبهى حلّة.

بتلاحظ تنوّع في زوار المطعم: إذا جيت بفترة الغداء بتلاحظ موظف جايب مستشار الشركة البريطاني اللي جاي زيارة سريعة للرياض وعوائل ياكلون أكلاتهم المفضلة. أما إذا جيت فترة المساء، بتشوف سياح مرّوا على المطعم صدفة بعد تمشيتهم في الديرة مع أكياس "أهلًا وسهلًا" وبتشوف سعوديين عازمين ضيوفهم الأجانب. 

الحلو إنهم ما أعادوا ابتكار أطباقنا الشعبية -فأم ضي راضية عنهم- ووصفاتهم تقليدية أصيلة و يتفوقون بالتقديم العصري للأطباق والخدمة على أعلى المعايير. الأطباق لذيذة ببساطتها، وأنت تاكله تحسّ إنه أكل نظيف ولا يحاول ينافس بقيّة المطاعم. 

على طبيعتنا المضيافة، إرث يرحبون بك بقهوة سعودية وتمر. ومع الوجبات يقدمون لك قرصان مع صلصتين جانبية: طحينة بالعسل وجبن. كل من زارهم مدح لطافة الموظفين اللي مب بس يخدمونك بالطلبات، يخدمونك بمعلومات عن كل طبق يتقدّم لك؛ مثل أصوله والبهارات المستخدمة وغيرها. 

هذا المكان مب بس مطعم. أول شي بتقابله لما تدخل المبنى هو أرفف البوتيك اللي عارضين فيها مجموعة منتجات محليّة: حلويات مثل المعمول والكليجا والسمسمية، وعطريات مجففة وطازجة مثل النعناع والدوش المديني، واللي على قولة مدير المطعم الأكثر مبيعًا: فُرَش أسنان بالمسواك. بعد البوتيك فيه مساحة مخصصة لتعليم الطهي السعودي وبعدها تدخل على صالة المقهى. 

هو أشهر طبق عندهم، ومن الأطباق اللي موجودة في كل الفروع. اللي يميّزه نكهاته العطرية مثل المستكة والكادي ويقدّم مع لحم الغنم وصلصة جانبية بالطماطم. 

ما يبيلها إقناع: كبيبة حايلية أصيلة مبهرّة صح، تجيك مع قطعة ريّش. 

هذا الحلى هو فطور الملك سلمان المفضّل. وهو عبارة عن عجينة مخمّرة نفّاشة تنطبخ ويرّشون عليها شيرة مبهرّة بالهيل، والزعفران، واللومي، والتمر. 

شاهي مثلّج بالورد الأزرق والخزامى لونه غريب لكن طعمه خفيف. يعني تستمتع فيه ولا يخرّب عليك تجربة باقي الأطباق.