أكلات نحبها من شوارع الرياض

تاريخ النشر 2023-02-15

هذي لستة بعشر أكلات نحبّها في الرياض، وشّي المعايير اللي تخلينا نحبّها؟

أولاً، تصير الأكلة بصيغتها المجردة لذيذة، أيّ، لوجرّدناها من كل اللي حولها زيّ المكان، الجوّ العام، طوفان صور الإنستقرام عليها.. تبقى لذيذة. 

ثانيًا، تصير قيمتها بطعمها مهب بسعرها، ربي رزقنا الأكل عشان نأكله مهب عشان نشخّص به ولا نورّثه،

مهب حاطين تيراميسو مطعم "مامو" معك في القبر، الا لوّ أكلته قبل لا تموت بشوي. 


كباب ابو غالي

هذا المطعم الصغير حول البطحاء عمره ٣٠ سنة ويقدّم سندويتشات كباب صغنطوطة،

علّمنا عنه معاذ خليفاوي، مقدّم برنامج بودكاست السوق في إذاعة ثمانية، وأدمنا الكباب زي ما حنّا مدمنين البودكاست هذا. 


وشّ اللي يخليه مميز؟

أبو غالي موظف دوام كامل ويشغّل هالمطعم الصغيّر هو وابنه غالي ست ساعات يوميّا فقط، بس هذي مهب ميزة صح؟ صح.

الميزة الله يطوّلنا بأعماركم هي بـ وظيفة أبو غالي الصباحية:


أبو غالي يعمل في ملحمة لبون، وهو مدير النحر هناك أيّ: هو اللي يختار الذبائح بنفسه في أفضل ملحمة بالرياض حسب تصريح شخص مهم لنا رفض يصرّح بإسمه. 


وشّ نحب من كباب أبو غالي؟

كل شيء .. وإذا قلنا كل شيء فـ نعني كباب اللحم وكباب الدجاج، لأن مافيه طبق ثاني. 

برضو، شطتهم رهيبة. 


بيتزا شيخ العرب

تحب مصر؟ تحب الكشري؟ أجل رح لمطعم البيتزا هذا. مطعم صغيّر يبعد عن حديقة المنفوحة دقيقتين مشي ويقع في مكان نحب نسمّيه مصر الصغيّرة. 


وش اللي يخليه مميز؟


كشري صدقي. لا يزعلون علينا المطاعم الثانية بس شيخ العرب هو الكشري الصدقي، الشطة الحارة اللي معه والدقة وكل شيء لذيذ. ماندري صراحة اذا الشطة هي الدقة بس الأشياء اللي تجي معها واضح انها أصلية. وإذا أكلت عندهم في المحل بيعطونك الكشري مع ملعقة معدنية مربوطة بحبل بالجدار. 


برضو كمّياتهم استهبالية، زي ما عهدنا مصر الشقيقة  ١٠٠ مليون شخص، فصحن الكشري يمكن فيه ١٠٠ مليون حبّة رز.


وش نحب من شيخ العرب؟

اتوقع واضح.. كشري. 

بس اذا خلصت كشري خذ لك فطير مشلتت ورح در بحديقة المنفوحة، واشتر عصير قصب أو منجا من المحلات المجاورة وخذ نفس وقل كلام عميق كأنك ماشي على نهر النيل مثل


كنت فين يا لحمه لما كنا جزارين؟

كنت فين يا خشب لما كنا نجارين؟

كنت فين يا سمك لما كنا صيادين؟

كنت فين يا لا لما كنا نقول آه؟


كبابي الرائع

مهب جملة خبرية، هذا مطعم حقيقي في حيّ المربع.

المطعم لذيذ لكن له اتكيت خاص فيه وجزء من التجربة: لازم يهاوشك الباكستاني اللي قاعد فوق الصاج يشوي ما لذ وطاب من الكباب التشابلي ولازم تبلع الجبروت حقك وتقول له سم، لأن اللحمة تستاهل وحارة جدًا زيّ دم الباكستاني. 



وشّ اللي يخليه مميز؟

الكباب التشابلي هو أكلة شوارعية من بشاور، تنوكل مع الخبز أو الرز، لازم يكون رز بشاور عشان المنطقية الجغرافية، لذيذة بكل حالاتها. 



وشّ نحب من كبابي الرائع؟

نحب كل شيء عندهم ما عدا أخلاقيات المهنة عند اللي يبيع، عندهم سلطات وحاجات وفعاليات وتفاريح تونّس، وعندهم شطة من النوع اللي تصارخ في اذنك. 


خير الجياد للأجبان


تحب الكنافة؟ تحب الجبنة؟ تحب الكعك المخبوز؟

اخلطها مع بعض وتطلع لك ألذ قطعة حلى موجودة بالرياض: كعك كنافة


وش اللي يخليه مميز؟

تبي تروح لهم عشان الكعكة، بس تبي تبتل تروح لهم عشان الجبن. 

جبنهم طازج ويسوّونه بنفسهم. عندهم عكّاوي ولا أروع  وكل المنتجات اللي تتخيّل انها ممكن تطلع من بقرة.


وش نحب من خير الجياد؟

تبي حالي؟ جرّب كعكة الكنافة.. كنافة جوّا ساندويتش..واضحة أتوقع.

تبي مالح؟ جرّب الجبنة والزعتر بالكعكة العصرونية - بس لا تتوتر، عادي تاكلها بأيّ وقت في اليوم.


ذا فيلا التايلندي في العروبة

يشاع أن الأزمة الدبلوماسية بين تايلاند والسعودية مهب منبعثة من الألماسة الزرقاء كما هو معلن بل من غيرة الشعب التايلندي الشديدة اتجاه المطعم هذا، المطعم هذا فتح من ٤٠ سنة يوم هاجر تايلندي من بانكوك لأم الحمام. 



وشّ اللي يخليه مميز؟

قليل المطاعم اللي تقدّم المطبخ التايلندي باسلوبه التقليدي في السعودية، بالغالب اللي نلقاهم هم نسخ امريكية من المطبخ التايلندي المعقد؛ ليش تثقون فينا؟ لأن واحد من فريق البحث والتقصّي عندنا راح لتايلند يوم عمره ١٤


معلومة جانبية: فتحوا مستشفى الملك خالد للعيون قدام المطعم لأن ما فيه أحد يصدق اللي يشوفه.. مطعم تايلندي لذيذ للدرجة هذي



وش نحب من المطعم؟

الباد تاي

على كلام موظف موارد بشرية في مستشفى التخصصي المجاور للمطعم: "هذي أزيَّن باد تاي بالسعودية" نثق في هذا الموظف لأنه يحب الأكل التايلندي أكثر مننا. 

وبرضو شروبة التوم يَم الحرّاقة، والكاري الأخضر اللي ممكن تأخذه مع أي بروتين. 



مستر برياني

عمارة ذهبية كبيرة كأن الرئيس الأمريكي السابق دونالد ترامب هو اللي مصممها، هذا المطعم هو جزء من سلسلة مطاعم منتشرة بالرياض كان اسمها انديان ستايل وغيّروه بعد ما اكتشفو انه البرياني هو الذ شيء بالهند وعندهم. 


وشّ اللي يخليه مميز؟


عندنا نظرية بسيطة اتجاه البرياني ومبنيّة على أدوات بحث استقصائية وتذوقية: أولاً، برياني أم مؤسس كلماشي هو ألذ برياني بالعالم

ثانياً، البرياني له صيغة جديدة وهي خليجية بإمتياز، طريقة التحضير ما تختلف كثير والبهارات نفسها، بس مهب نفس البرياني اللي ينذاق بالعالم: هذا المطعم يضبط البرياني الخليجي بإمتياز. 


وش نحب من مستر برياني؟


برياني وتشكن تكّا مسالا، ممكن تطلبهم مره مره حار، أو ممكن تطلبهم مره مره مره حار.. تراه يفرق وادلّع يا كايدهم. 


وش نحب من مستر برياني؟

برياني وتشكن تكّا مسالا، ممكن تطلبهم مره مره حار، أو ممكن تطلبهم مره مره مره حار.. تراه يفرق وادلّع يا كايدهم. 


باب توما

باب توما، فخر حيّ السليمانية، مطعم سوري ولا غلطة، أكلات شامية بالمنهج، لذيذ خفيف، طريف ونظيف وعندهم عصاير بهلوانيّة فهلوانية. 


وشّ اللي يخليه مميز؟

دايمًا الفروج المشوي يزعلنا، يخيبّ ظننا ويفشلننا، لأنه يا مهب طري بما فيه الكفاية، أو مهب مبهّر زين.

باب توما مهب مزعلك أبدًا، أي، تفرِّج يا عاشق الفروج وباب توما يفرِّجها عليك. 



وشّ نحب من باب توما

فروج مشوي مسحب - فروج مشوي محشي - بطاطسهم اذا كان حار وجديد، ضروري تطلبون البطاطس جديد 

بوظة بوظة بوظة 


بيادر القدس

اللّهم فلسطين وأهلها 

اللّهم فلسطين وأكلها


مازلنا في السليمانية، بس هالمرة بنطلع من الشام لفلسطين، وتحديدًا القدس، عاصمة فلسطين الأبدية.

مطعم بيادر القدس، مطعم اللي يعطيك أمل مع كل لقمة تزور فيها فلسطين الحبيبة


وشّ اللي يخليه مميز؟

أطلب أيّ طلب واستمتع ببوفية مفتوح من الشوربات والسلطات وشاهي وقهوة مجاناً، برضو اعرف وشّي أطباق اليوم لأنها تتغير باستمرار وبشكل ممتع 

ملاحظة: مطعم بيادر القدس هو مطعم غداء بإمتياز، مهب مطعم عشاء

اللهم انا بلغنا اللهم فأشهد



وشّ نحب من بيادر القدس؟

نحب مقلوبتهم ونحب خروفهم المحشي والمسخّن

برضو عندهم سلطة نابلسية باردة لذيذة


حلويات ديكان


في حيّ الوزارات بالمنطقة الهندية اللي تحتوي على جالية هندية كبيرة، فيه هذه المنشأة الصغيرة اللي اسمها حلويات الدوسري،

وحنّا متأكدين ان الدوسري ما قد طبّها.. وهذا من محاسن التستر التجاري: مخبز حلويات حيدر أبادية في وسط الرياض



وش يخليه مميز؟


أكيد مهب الزحمة، أكيد مهب النقص الحاد بالمواقف، وأكيد مهب ريحة السمك المنبعثة من محل السمك المقابل له. 

اللي يميزه ببساطة هو الشاهي، المخبز، الأكل، ووناسة الناس اللي حوالينك وهم يوصخون أصابعهم بالشيرة


وشّ نحب من حلويات الدوسري؟


الصدق ما ندري، ما نعرف أساميهم، نقول لهم يشكلّون لنا مخبوزات ونشرب شاهي ويعطونا شيء نغطغطه بشيء لذيذ جدًا

برضو عندهم زي هريسة مشمش لذيذة


بيت الحمص

شكرًا لأنك صبرت علينا وعلى مصالتنا، ان شاء الله انك استمتعت في اللستة وتعرفت على مطاعم جديدة

بس اللي حنا شاكين فيه انك منتب رايّح لأي واحد منهم.

ليه؟ لأنهن بعيدات عنك وأنت ساكن في برجك العاجي بشمال الرياض تأكل من مطاعم يا توها جاية من الكويت يا نسخ من مطاعم الكويت، عشان كذا بيت الحمص اقتراحنا الأخير: مطعم رهيب بحيّ المروج، شمال الرياض


وشّ اللي يخليه مميز؟

بيت الحمص شعارهم هو: "الحمص لعبتنا" لكن بالحقيقة الكلام هذا غلط، الحمص مهب لعبتهم، هم يأخذون الحمص بشكل جدي جدًا.

برضو المكان لطيف، الجلسات الخارجية حلوة بالشتاء والعاملين بالمكان خدومين. 


وشّ نحب من بيت الحمص؟


الحمص، بس للتأكيد: يفضّل تجيب الخبز معاك من أقرب مخبز لأن خبزهم خبز مفرود لبناني مهب خبز عربي

برضو الفتّة لذيذة مع ان موظف استشارات عالمية جرّبها وقال عنها ثقيلة، لكن اكتشفنا ان موظف الاستشارات العالمية هذا ما عمره أكل فتّة بحياته. 


هكّر مرسول مع الجو الزين! تدري مرسول متوفّر عندهم متاجر منوّعة زي رحلات السنيدي أو شاي الوزّة؟ تقدر تضمن الكفتة بضغطة زر. 

شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

كيف تأكل ثلّاجة بالصيف؟

وش صار في ٢٠٢٣؟

السعوديين يتقهوون أكثر من اللازم