غريب! فيه مجموعة مطاعم غريبة في مدينة الرياض ودنا نعلمكم عنها. 

كان معيار الغرابة عندنا هو: أن المطعم غريب بشكل طبيعي، مب مصطنع أو مخترع، مب حيلة تسويقية يحاولون يتميزون فيها عن المطاعم غيرهم. 

في هذي اللستة بتلقى مطعم غيّر جنسيته، صاروخ شاورما ينقاس بالمتر، ومقهى يقدّم كلاسات رقص شرقي. 

علمًا بأن الأشياء الغريبة مب مره غريبة، في الرياض قد حققنا رقم قياسي في سنة ٢٠١٨ وكان لتجمّع من ناس عددهم ١٤٨٦ واحد يجربون أكل وهم مغمضين، تم تنظيمه في جامعة الفيصل. 

عشان تجرّب شيء مختلف، لا تصير ممل، اطلع غيّر جوّ، تعرّف على أماكن جديدة وثقافات مختلفة،

في النهاية ما تدري، يمكن أفضل مطعم في حياتك للحين ما رحت له، ويمكن أكثر أكلها تحبّها توّك ما جربتها. وإذا ما عجبك، على الأقل بتطلع بسالفة تقولها لأخوياك. 

هذي اللستة فيها مطاعم إن شاء الله إنك بتسولف عنها. 

المطعم يزدحم كل ويكند ويقلب لحفلة كاريوكي صاخبة للتجمع الفلبيني هنا، الشعب الفلبيني هو أكثر شعب في العالم يحب الكاريوكي، وتقريبًا كل بيت فلبيني فيه آلة كاريوكي.

رَح، غنّ، وجرّب أكلهم ولا تخاف أبدًا: اذا رحت وصار لك شيء ففيه ممرضة هناك ممكن تنقذك. 

هذا المطعم اسمه أطايب شامية، بس ما يقدّم أكل شامي، بدأ بتقديم الشاورما لكن ما ضبطت معهم واحتاجوا إنهم يتغيرون. الشيف ياسين، من تونس، قال: ليش ما نسوي أكل تونسي؟ وقالوا قدام. وصار هذا المطعم الرئيسي للجالية التونسية في الرياض ودائما ما يكون مزدحم بالمساء.  

المطبخ التونسي غريب عليك، منتب عارف وش بتطلب. اسألهم! عندهم ساندويتشات لذيذة يجيبون خبزها من سوبر ماركت مانويل، وبرضو عندهم سلطة أمك حورية وهي طبق شعبي من تونس سمّي بهذا الاسم لأنه في امرأة جليلة اسمها حورية كانت تحنّي شعرها ويصير جزري اللون. 

المطعم تأسس في ٢٠٢٢ مع الشيف التونسي: ياسين واسمه أطايب شامية لكن هذا الوضع ما راح يكمّل. مع ازدياد الجالية التونسية في الرياض بيغيرون الهوية ويثبّتون هذا المطعم. 

فيه مطعمين تونسيين أيضًا بيفتحون في الرياض قريبًا فلازم أطايب شامية يتجهزون للمنافسة. 

فوز نادي الأهلي المصري في دوري أبطال أفريقيا كان له أثر غير متوقع: فَتَح مطعم بالرياض! 

سطلانة في الأصل أغنية مصرية نزلت في أبريل العام الماضي، لكنها انتشرت بقوة بعد انتشار مقطع للاعبين وهم يرقصون عليها. 

هذا المطعم اسمه سطلانة عشان الأغنية هذي، وأيضًا عشان "الأكل حيسطّلك" على قولة مصطفى اللي قابلناه في فرع المطعم بالسليمانية، أما بالنسبة لجملة: بابا الشُغلانة، هذا لأنهم احترفوا في شُغلانتهم لدرجة إنهم صاروا البابا حقها.

باختصار هويّة المحل كلّها مبنية على هبّة مصرية انتهت.. على جدار المطعم فيه رسمة للاعبين الأهلي وهم يرقصون على الأغنية، والمطعم مثل ماهو جريء بتسميته، جريء بساندويتشاته اللي ما يستحي منها: ٨ مكونات في صامولية واحدة. جربه على ضمانتك يسطا. 

في مجمع شرفات الندى المرموق فيه هذا المطعم اللي أسسته واحده من أجمل أرواح مدينة الرياض: ألفت العامري. 

ألفت العامري رجعت من أمريكا في ٢٠١٦ وهي مولّعة بستايل الهيبيز..وفتحت المحل شهر ٣ في سنة ٢٠٢١. 

ألفت العامري تحس إنها هيّ المحل، والمحل هيّ. المكان مكانها، والضيافة ضيافتها، المنيو شخصيتها والطلبات فكرتها. وسوّت نموذج غريب في التجارة: مشروع يعبر عنها. 

المكان فعلًا يعكس شخصية ألفت الغريبة. نكهات غريبة من الدونات، كونسبت غريب.

ويتغيّر المكان حسب الموسم بالكامل، حتى ريحة المكان تتغيّر بتغيير شموعه. 

هذا المطعم يقدّم كلاسات كل جمعة وسبت وأحد زي كلاس الرقص الشرقي، أو كلاس الحرف اليدوية.

مطعم يبيع كل شيء، شاورما، كلوب ساندويتش، وبخاري. مطعم الأكلات الطازجة هو أجدد إضافة في حي الرائد غرب مدينة الرياض. 

وصار في المطعم أكبر انتقالات معلمين الشاورما الموسم الأخير: المعلم سند اللي استقطبوه من السويدي جنوب الرياض. 

المكان نفسه غريب، المنيو كبير كأنه محل تسالي، بس معقّد.. الكاشير عندهم بانجليديشي اسمه مسفر والمعلم يمني اسمه سند. 

 حرفيًا عنده كل شيء وعنده شاورما بحجم ذراعك الأيمن. 

شكرًا لكم، كانت هذي لستة من كلماشي.