صباح الخير يا الرياض

تاريخ النشر 2023-11-30

الصباح رباح، وكل شي في الصباح تزيد فيه البركة. لو رحت الدوام بدري بتكتشف إن إنتاجية ساعتين شغل في الصبح توازي ٤ ساعات شغل في المساء، ونفس الشي في الأكل؛ وجبة الفطور تعطيك نشاط وطاقة طول اليوم، عكس الغداء اللي يكسّلك، ويخليك تنسدح في أي مكان بمكتبك.

بس السؤال: وين تفطر؟ كل مطعم في الرياض له طبق يتميّز فيه، بس غالبًا ما يطلع المينيو عن هذي الأطباق:

فول، فلافل، كبدة، شكشوكة. في هذي اللستة جمعنا أفضل مطاعم الفطور مع مراعاة التنوّع في هذي الأطباق.

في سوق الجوالات بحي المرسلات فيه محل واحد حاز على قلوبنا، عندهم صيانة فورية للجوع ومشاكل الشهية، ضمان مدى الحياة على جودة الطعم، ومنتجاتهم مُدعّمة بشريحة سميكة من التميس.
الزحمة على مطعم فولك تنافس زحمة المحلات اللي جنبه إذا نزل آيفون جديد -إذا ما كان أزحم بعد-، وهذا ما يدل إلا على إن الفول حقهم تأكل أصابعك وراه، إذا رحت هناك لا تنسى تطلب فول طاوة واسمع كيف يبقبق من الحرارة على طاولتك، وكِله قبل يبرد عشان بطنك ما يبقبق.

هذا المطعم اللي على طريق مكة المكرمة في حي المعذر معروف من أكثر من ٢٠ سنة بين أهل الرياض لكن بِاسم مختلف: كان اسم المطعم كبدة سعد، وبعد ما احترفوا فن طبخ الكبدة أعطوا نفسهم ترقية وصاروا سفراء الكبدة موب في الرياض؛ لكن في نجد.


من ضمن مهمات المطعم الدبلوماسية إنهم يعلمونك من البداية إنهم راعين كبدة، أول ما تدخل المطعم بتسمع جنبك طشطشة الكبدة على الصاج، وتقدر تنوّه الشيف بالكميّة اللي تفضلها للفلفل.

في حي المربع مقابل مركز الملك عبدالعزيز التاريخي بتلقى بوفية صغيرة بلوحة متواضعة وبسيطة، لكن عليهم فلافل وحمص تخلّي المكان خمس نجوم بالنسبة لك، أبو بشار يسوي أحلى فلافل من أول ما فتح في سنة ١٩٧٧ إلى يومك هذا.

إذا احترت وش تطلب في هذا المطعم، أبو بشار اختصرها لك بلوحة معلّقة في المحل: تأكل صحن مشكل درجة أولى من أحلى معلّم معمولة، تأكل صحن خلطة أبو بشار راح ترجع وتأكل باستمرار، تاكل صحن فول الشام طعم وريحة يا سلام، حمص مع فتة وسلطات ما بتنساها كل الأيام.

بوفية الموائد اسم معروف في عالم سندويتشات الفطور، مهما كان الاسم على اللوحة... سلّة الموائد، طعم الموائد، أو في هذي الحالة: الموائد الفاخرة. تعرف دائماً إنك بتأكل شي لذيذ بدون فلسفة، لأن حلاوة المطعم هذا في بساطته. و برأينا هو اللي فرش الطريق لمطاعم جديدة طبقت فكرة البوفيات لكن بهوية بصرية حديثة.

اللي يشتغلون في بوفية الموائد الفاخرة نفسهم من سنين ما تغيروا وشغلهم محترف وسريع وما تفرق معهم الزحمة لأنهم متعودين عليها، وإذا بغيت تبدأ صباحك صح خذ من عندهم ساندويتش الشكشوكة مع جبن وشطة، يوم بهذي البداية العظيمة صعب يخرب.


المطعم اللي قبل متخصص بالسندويتشات، بس هذا المطعم متخصص بنوع ثاني من الفطور: الصحون.

صحن كبدة، صحن شكشوكة، صحن تونة.


مطعم أزهار من المطاعم الكلاسيكية والمشهورة في شمال الرياض، ومشهور أكثر باسمه السابق: أزهار المرسلات، اللي ما كان في حي المرسلات، كان في حي المصيف. 


اشتهر هذا المطعم في البداية باسمه الظريف ولحقته على طول سمعته بالأكل اللذيذ، وما نكذب عليكم إذا قلنا هذا يمكن أكثر مطعم يضبط الأكل المصري في الرياض، وبشهادة زباينه اللي أغلبهم من مصر، ومن أول ما تدخل المحل بيوضح لك معاييرهم العالية في الجودة والنظافة.

المنيو وأصناف الطعام فيه مختلفة عن اللي متعودين عليه بحكم إنه مطعم مصري، زي الكبدة الإسكندرانية وهي كبدة بقر أو جاموس مع ثوم وليمون وبهارات، أو ورقة الكبدة وهي شرايح من الكبدة تنطبخ مع الخضار. تقدر تطلب هذي الأنواع على صحن أو في ساندويتش.


هذي كانت لستة مطاعم صباحيات الرياض، اللي بتساعدك ترتب ساعات نومك، وتقوم من صباح الله خير عشان تبارك فيها يومك!


شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

مين المسؤول عن الفول؟

سحور ما يعطش زيّ مسلسلات رمضان

تجربة اليابان في الرياض