الصيف في السعودية يخلي كل أحد يفكر.. أنت تفكر برصيد إجازتك، أهلك يفكرون برصيد حسابك، أخوياك يفكرون هل قاعد تفكر معهم ولا لا، زميل العمل يفكر يسبقك، ومديرك يفكر كيف ما يخليك تفكر.. إنك تسافر.

قرار السفر الداخلي لمدن المملكة صعب جدًا.. لا موب صعوبة سيئة، صعوبة حيرة.

لأن جغرافية المملكة تخلي كل نص ساعة تقطعها بالطيارة توديك لعالم ثاني مختلف في ثقافته وفعالياته وطقسه، جوّك شاطئ وناس هادية ورايقة روح شرق، جوك حفلات وفعاليات بحرية وأدرينالين لا تطالع إلا غرب، جوك اكتشاف وسفرة راقية وجوها عليل، العلا شمالك.

بس تبي مكان ما درسوا بكتبهم عن فصل الصيف، ولا يعرفون جملة "حار جاف صيفا دافئ ممطر شتاء"، لا تروح بعيد، وجّه للجنوب.

في عسير ما عندهم مشروبات صيفية لأن ما عندهم صيف، ومن كثر الأمطار المظلات في البقالات موجودة جنب كراتين المويه لأن كلهم أساس الحياة هناك.

كل صيفية يقولون سافر أبها، بس قد قالوا لك كيف تعيشها؟.. في هذي اللستة بنعلمك كيف تصير عسيري في أبها، وين تسكن عندهم، وين تاكل اكلهم، كيف تتمشى زيهم، وين يتقهوون مع ربعهم، ووش آخر فعالياتهم.. في آخر اللستة بتعرف كيف تصيد جدول الجنوبيين، خطوة بخطوة.

مطابخ ومحانذ علي رمزي هي محطة لمسافرين السعودية والخليج، والوجهة الأولى لأهل أبها في مناسباتهم، لأنه حنيذهم موب خيار حنيذهم مطلب.. بس قبل نسولف عن علي رمزي، وش هو الحنيذ؟

معلومة سريعة، ذُكر الحنيذ في القرآن في سورة هود: 

﴿وَلَقَدْ جَاءَتْ رُسُلُنَا إِبْرَاهِيمَ بِالْبُشْرَى قَالُوا سَلَامًا قَالَ سَلَامٌ فَمَا لَبِثَ أَنْ جَاءَ بِعِجْلٍ حَنِيذٍ ٦٩﴾ [هود:69]

الحنيذ من أشهر الأكلات الشعبية في جزيرة العرب خاصةً في تهامة، ويعتبر الحنيذ طريقة طهي مو أكلة زي ما يعتقد البعض.. طريقة الطهي تكون بإنك تحط حطب متجمّر داخل حفرة تحت الأرض أو في تنور مغلق بشكل كامل بدون دخول أي هواء ولمدة ساعات، وتكون طريقة توزيع المقادير فيها كالآتي: طبقة من نبتة المرخ فوق الجمر، بعدين ينحط اللحم فوق المرخ وينحط طبقة مرخ ثانية فوق اللحم، ونبتة المرخ معروفة كمُتبّل للأكل ويعطي اللحمة نَفس وطعم لذيذ خاصة إنها تفصل ما بين اللحمة والجمر. تسبح لحمة الحنيذ ما بين طبقتين من المريخيّين اللي بياخذونك للفضاء من كثر ما اللحمة ذايبة ولذيذة و"جوسي".

اشتهيت حنيذ صح؟ طيب قبل تركض لمطابخ علي رمزي خذ معك حافظتين وصحن كبير فاضي، الحافظتين نزلهم معك للمطبخ والصحن خله في السيارة، بنقول لك بعد شوي ليه. عندهم جلسات عائلية وخاصة، لكن أبها مليانة جبال ليه تاكل الحنيذ بين أربع جدران!

تذكر لما قلنا لك جب معك حافظتين وصحن؟

بتكون حافظة للحم وحافظة للرز وصحن للتقديم فوق هام السحب.. وراك مشوار ٢٧ دقيقة لمطل السحاب ولا نبي حنيذك يبرد.

مطل السحاب من الأماكن المميزة في جبال السودة، ومجهز بأماكن للجلوس والألعاب وحتى غرف على المطل تقدر تستأجرها لو تبي تاكل الحنيذ وتاخذ بعدها غفوة، لأنها بتكون أول تخمة تعيشها وأنت على بعد 2800م عن سطح البحر.

وعشان تكتمل الليلة السحابية، بتلقى عند مدخل مطل السحاب ألذ شاهي على الجمر تحتاج تقفل فيه اللي جناه الحنيذ فيك.. بالعافية.

ما تلقى قائمة عن كافيهات أبها المختصة إلا ومِلء يمليها، رغم إنه للآن في افتتاحه التجريبي.

مِلء مقهى يشبه أبها.. الخشب، الخَضار، الجدران البيضاء اللي تشرح صدرك، اللوحات والزوالي والكنب اللي يلمّك،

وأنت داخل تأمل اللوحة الكبيرة للفنان الألماني لودفيغ دوتيش اللي جالسين فيها اثنين قدام مقهى ويلعبون شطرنج، ولو تأملتها كثير يمكن تتحمس وتسأل الباريستا لو عندهم شطرنج، سألناهم قبلك.. عندهم، وعبال تختار الاستراتيجية اللي بتفاجئ فيها خصمك، الباريستا فيصل عسيري بيجهز لك أحلى استراتيجية يصنع لك منها كوب V60 يفاجئ عقلك. 

قريب صاروا يقدمون مينيو فطور من الساعة ٧ الصبح، وسواء رحت صبح أو ليل لازم تجرب قائمة الحلى -غير كلامهم المعسول-، نادر تلقى مقهى مُختص يبّدع بالحلى لأنهم يشوفونه شيء ثانوي، لكن مِلء تفننوا بأطباق حلى منوعة ودك تجي كل يوم وتعطي كل واحد فيهم فرصة، بس الأهم لا يفوتك عسكريم البسبوسة.

اسكن فوق الجبال، المس الغيوم بيدك، التفت للي جنبك وعلمه كم متر تبعدون عن مستوى سطح البحر.. موسم عسير هذي السنة مليان خيارات سكنية فريدة، بتشوف الأكواخ والكرفانات بكل مكان.. فوق كل مطل، وتحت كل شجرة، وعلى حدود كل قرية.

على بعد ٢٥ كيلو من أبها، في قرية صغيرة كانت العاصمة السياسية والثقافية والاقتصادية لمنطقة عسير، قرية طبب.. بتشوف شيء غريب ومميز من بعيد، بين بيوت ومزارع أهل القرية، بين القصور التاريخية والمرتفعات الخضراء.. كوخ.

كوخ السرو واحد من أكثر الأماكن السكنية الفريدة في عسير كلها موب بس بطبب، تشوف أناقته وفخامته من بعيد بمساحة ١٥٠٠ متر من الخَضار والجلسات الخارجية.

ابن القرية البار نايف المتحمي هو صاحب هذا الكوخ، نايف كان مهتم بصناعة الأثاث الخشبي من خشب شجرة السرو، وهذا اللي خلاه يقرر يسوي الكوخ بنفسه من أحجار وأخشاب كلها من بيئته العسيرية، ونعتقد إن جزء كبير من معرفة الناس لقرية طبب كان بسبب شهرة هذا الكوخ، وايش أعظم من إن اللي يرفع نسبة السياحة في القرية، هو ابن القرية!

تقدر تخلي زيارتك لـ طبب عبارة عن يوم واحد تنام فيه بالكوخ بعدين تزور قصور وأماكن القرية التاريخية وتعرف قصتها وأهميتها لأمارة عسير.

تقدر تحجز الكوخ من هنا

الكرفان واحد من التجارب اللي لازم تسويها مرة بالعمر، تجربته تعطيك أمل كبير إنك تقدر تستقيل وتهرب من الحياة والتزاماتها وتفر العالم وتسكن بين القرى وفوق الجبال ما تبقّى من عمرك.

صارت خيارات الكرفان كثيرة في أبها، حتى تطبيقات حجوزات السكن صارت توفر للمؤجرين خيار عرض كرفاناتهم للإيجار. بتلقاهم موزعين بالطرق والمرتفعات وبين القرى، بعضها يعطيك تجربة كرفان حقيقية تشابه اللي تشوفها في خيالك والأفلام، وبعضها مصمم وكأنه وحدة فندقية فخمة ومتنقلة، وكلهم جيدين لتجربة يوم واحد تسولف عنها طول عمرك.

المزرعة هي المكان المثالي للعيش براحة وهدوء من كل شيء يزعجك في المدينة، الفجرية تصحّيك العصافير الجنوبية بعد ما ضاعت حياتك وأنت تصحى على صوت الحمام، الظهر تتدفى بشمسهم، وتعيش أجمل ساعات الغروب لما تختفي الشمس وراء جبال السودة، وبدل لا تسكن بفندق وتتصل كل صبح على الرسبشن وتسأله متى يفتح البوفيه.. افتح باب الحوش وشف الخَضار، وحمّص لك توست وادهنه بعسل جايك من رجال ألمع، مع صحن فراولة توك قاطفها بيدك، وقل وأنت تتأمل الجبال: أنا ليه ما أروح عسير كل صيفية؟

هذي كانت لستتنا الأولى عن عسير، نتمنى عجبتك. وعشان تعرف أبها خطوة بخطوة، هيئة السياحة سوّت دليل كامل عن فعاليات وأماكن عسير.

وأخيرًا، لا تخاف تسأل أهلها عن أماكنهم السرية.. صح اسمها عسير بس ناسها يسيرة.