يا هلا والله، رجعنا بعد انقطاع دام ٣٢ يوم و ٢٢ ساعة و ١٢ دقيقة، اشتقتولنا يا أهل الرياض؟ حنّا اشتقنالكم. عندنا قناعة إن اللي دائمًا تواجده كثير وما يعطيك فرصة تشتاق له يصير ثقيل دم وبثر، عشان كذا قلنا بنخلي اللستات مرتين في الأسبوع بس.

فكرنا بطريقة نقدر نبثركم فيها بكمية اللستات وهي هذا النوع الجديد من اللستات (نص فل) تكون خفيفة لطيفة ومتكتكة تقدر تقراها بدقيقتين، وأثناء التفكير جعنا على طاري كلمة (متكتكة) واشتهينا تيكا، واحد من فريق البحث والتقصي قال إنها الهبّة الجديدة في الرياض وقلنا ليش ما نسوي لستة عن أفضل مطاعم التيكا:

مطعم جاي من لندن مختص بسندويتشات التيكا، وبس عنده نوعين: سبايسي وعادي، وكلها بالنسبة لنا ألذ ساندوتش تيكا في الرياض... أو لندن. إذا كنت تحب الأكل الحار ومتعود عليه يمكن كلها تُعتبر عادي بالنسبة لك، جب شطتك معك.

يقال أن هذا المطعم هو أول من بدأ تريند سندويتشات التيكا في الرياض، حاليًا له عدة فروع ويقدمون فيها طلبين بس: ساندويتش تيكا و تيكا فرايز، وكل وحدة ألذ من الثانية، وعشان تعرف كم تحتاج من ساندويتش بالضبط، اطلب كأنك بتطلب شاورما ابعه.

مهما تنوعت أشكال التيكا وتطورت، اللي يعرف هذا المطعم يحس إن التيكا حقتهم هي الأصلية والباقي تقليد، عالم البهارات من المطاعم الهندية الكلاسيكية في الرياض، إذا شفته يحاسبك قبل لا يجيب الأكل لا تخاف؛ هذا لأنك طلبت سبايسي ويبي يضمن حسابه قبل لا تاكل... خف شوي بس. اطلب من عندهم تيكا مسالا ويجيك الدجاج مع الصوص حقه وخذلك بريال تميس وصار عندك سندويتشات زي الهبّة.

مطعم الست تحس إنه سووه ٤ أشخاص كل واحد كان بيفتح له مطعم وقرروا يقطون في مساحة وحدة، المطعم عنده ٤ أقسام رئيسية في قائمة الطعام حقتهم: الشاورما، المشوي، الهندي، الفرن.

وكل وحدة من هذي الأقسام كأنها مطعم لحاله يقدم صنفين أو ٣ أصناف. حنا اليوم بنتكلم عن المطعم الهندي: عندهم ساندويتش تيكا و ساندويتش دجاج بالزبدة لذيذة وبسعر منافس جدًا، ننصحك تلحق عليها قبل لا يتهاوشون.