لستة التجهيزات الرمضانية

تاريخ النشر 2023-03-21

اطلع برا بيتكم، استنشق الهوا، شم ريحة حارتكم، وش بتشم؟ مقالي. كل بيت سعودي قاعد يقلي حشوات مختلفة من السمبوسة الآن.. افتح ثلاجتكم بتلقاها مليانة عصائر موسمية زي التوت، وقمر الدين، والجلّاب والطاقة الاستيعابية لفريزركم متكدس بدرجة جيدة للأمن الغذائي على المدى الطويل. 

هذي كلها علامات ان افضل شهر في السنة جاء.. شهر الخير والبركة والإيمان والإحسان.. شهر رمضان. 

في لستة التجهيزات الرمضانية بنجهّزكم لرمضان، وأكل رمضان، ومسلسلات رمضان.. كل اللي عليكم تسوّونه انكم تطولون بالكم معنا وتقرون لستتنا بصدر رحب. 


وش يصير برمضان؟

في شهر رمضان تتغيّر الحياة بالرياض بشكل جذري، وقت الذروة في البيوت يتحوّل للفجر، ورغم ان الشياطين يتربطون في الشهر الفضيل إلا انه يطلع ناس من زمان ما شفناهم زيّ عمال الدشوش. ومع تقديرنا الكامل للأعراض الانسحابية للنيكوتين والكافيين بس ترا ندري انك صايم بدون ما تعلن لنا بكل عصبية٬ وش يصير برمضان؟ الناس يصومون.


رمضان نفسه ما يتغيّر: تعال له مجهّز نفسك بإجابة على أكثر سؤال مبتذل يستخدم كفاتحة سواليف: تفطرون دفعة ولا دفعتين؟ 

جهّز إجاباتك وخلّك شخص اجتماعيًا جيّد وعندنا لك معلومة: تدري بعد رمضان فيه عيد؟ الموضوع مثبت تاريخيًا، لا تتفاجئ وسبّق من الحين: فصّل ثياب العيد واحجز تذكرة سفرة العيد، وحبّذا لو تروح تعيّد بالطايف، حتى لو ما تعرف أحد هناك، تعرفنا حنا، لأن كلماشي صارت بالطايف! 


وش تاكل برمضان؟

كل بيت عنده عاداته الرمضانية الخاصة، مثلًا في بيت سلمان مدير الإنتاج عندنا في كلماشي يقدمون الفطور على دفعتين: الدفعة الأولى تمر وقهوة وماء وعندهم خليط خاص للتمر اللي هو طحينة مع زبدة الفول السوداني.

وفي بيت عبدالكريم محرر كلماشي أمه بدت تستخدم القلّاية الهوائية للأسف بتحضير السمبوسة وأصابع الجبن.. وهو غير راضي عن هذا الأمر بس مستحي يصرّح لها.  

وفي بيت نواف كاتب كلماشي الفطور يكون دفعة وحدة يبدا بـ ٢٠ صنف بداية رمضان ما يصمد في النهاية إلا الشوربة. 


كل بيت له عاداته المختلفة في رمضان، وهذا اللي يميّزه الشهر الفضيل. علّمونا بالتعليقات وشّي عادات بيتكم. 

دليل العزّابي في رمضان

رمضان شهر صعب على العزاب لأن الأكل يصير ألذ بالجمعة، وعمومًا أكل الأمهات ألذ من أي مطعم موجود في العالم، حنا ما نقدر نكرر الجَمعة لكن نقدر نجيب لك أكل أمهات غير أمك في هذي اللستة المصغّرة من الأسر المنتجة.. وهذي اللستة مب للعزاب فقط هذي لك أنتِ بعد إذا بغيتي تودين شي لحمولتك عشان يقولون عنك سنعة وتعرفين تطبخين.. أو اذا كنتِ عزابية بعد. (اضغط على اسم الأم عشان تروح لحسابها)

الأم الأولى

هذا حساب لأم سعودية تتفنن في الأكلات الشعبية أو غير الشعبية وأطباق الحلى، عندها دجاج مسالا وفوتتشيني بالفطر وفي نفس الوقت عندها مرقوق وجريش ويقولون عندها مطازيز قصيمية تهول الهوايل ومشهورة بالبسبوسة حقتها اللي جربناها بنفسنا ونضمنها. 

الأم الثانية

رمضان ما يكتمل الا بالمقليات، القلي شيء سهل لكن الصعب هو لف السمبوسة، تكوير اللقيمات، وحشو السبرينق رولات.

حساب مفرزنات أم عبدالله بتلقى فيه اللي تحتاجه، بس تأخذ المفرزنات وتكبّها بالقلّاية، وتستمتع بحياة العزوبية المبهجة. 

الأم الثالثة

المتخصص بمجال الأطعمة وصديق كلماشي الأستاذ سليمان المحيميد نقل لنا قصّة أم ريّان اللي انتقلت حديثًا من الطايف للرياض وجابت معها برطامنات تعتيمات حجازية٬ التعتيمة هي النواشف عند أهل الغربية. تنفع فطور رمضان؟

الأم الرابعة

للأمانة هذا الحساب ما ندري أم مين بس افترضنا انه أم من التصوير في حساب الانستقرام حقهم٬ إذا ما قد جربت الفطور المغربي ننصح فيه٬ جرب الحريرة بدال الشوربة وخذ لك البسطيلة الصغيرة (ميني) ننصحبها بزاف.

وش تشوف في رمضان؟

التلفزيون شيء قديم، رمضان ٢٠٠٣ كان العصر الذهبي للتفلزيون الرمضاني:

في السعودية كانت سنة طاش ١١..  فيه حلقة رهيبة كأنها حلقة للمسلسل الأنميشن ريك اند مورتي، اسم الحلقة سندريلا وكان واضح محاولاتهم بتطوير تقنية تصويرهم وإخراجهم والأزياء عندهم. في الكويت كان  بداية عصر برامج المقالب الرمضانية مع قرقيعان ببطولة داوود حسين. مين اللي خان الخان؟ في مصر في أغنية التتر لمسلسل خان القناديل مع علي الحجّار. 

الحين، بعد ٢٠ سنة، وش تشوف في رمضان؟ 

المسلسل السعودي

طاش ما طاش

طاش ما طاش رجع وحنا متحمسين لهذا الشي٬ أغلبنا كسعوديين تربينا على متابعة طاش في رمضان وبعد ما وقف انقسم الشعب لقسمين وكأنها حالة طلاق٬ ناصر القصبي اخذ نص الشعب وراح لام بي سي وعبدالله السدحان اخذ النص الثاني وراح للقناة السعودية.. يا سعدنا اليوم لأنهم رجعوا! 

المسلسل المصري

جعفر العمدة

متحمسين تشوفون محمد رمضان بيصفق مين ذي السنة؟ عمل أسطورة الأساطير محمد رمضان في رمضان بيكون بعنوان (جعفر العمدة) وبيمثل فيه دور رجل أعمال ثري تطلب منه امرأة اسمها (عايدة) قرض بمبلغ كبير ويوافق بشرط انها تكون زوجته لمدة ٤٠٠ يوم٬ السؤال اللي يطرح نفسه هنا وش معنى ٤٠٠ يوم ليش ما قال سنة؟

المسلسل الكويتي

سكسيشن

رغم ان المسلسل أمريكي لكن الدراما حقته كويتية بحت٬ تدور أحداث المسلسل عن لوجان روي وشركته الضخمة٬ بعد ما بدت صحة لوجان تتدهور تسارعوا عياله للسيطرة على الشركة وكل واحد منهم يبيها لنفسه٬ موعد عرض الموسم الرابع بيكون في رمضان وكلنا متحمسين نشوف مين بيبوق الشركة.

شارك هذي اللستة

التعليقات


لو ابي اكتب مقال خفافي كذا كيف؟

قبل ٥ أشهر - خلود
عطنا رأيك

تبي تقرأ لستات ثانية؟

الرياض عاصمة الحلويّات الشرقية

الرياض مدينة المخابز

دليل الغافل عن محلات الفلافل