شهر رمضان ما ينربط فيه الشياطين بس، ينربط فيه الشياطين ودكاترة الأسنان.  لأن في رمضان التسوّس يدور ويجول في أفواهنا حر طليق.. ليه؟ لأننا نأكل حلويات بكمّيات هائلة مما يخلي شهر رمضان هو شهر الحلويّات الأول في السنة الهجرية. كل أحد في الشهر الفضيل يأكل حلويّات، الكبار يأكلون حلويّات، الصغار يأكلون حلويّات وأنت تأكل حلويّات.. عشان كذا نقول لك: يا حلوك في رمضان. في لستة الأسبوع هذا بنتكلم عن الحلويات، رمضان والقرقيعان.

القرقيعان هي عادة سنويّة موجودة بشكل رئيسي في المنطقة الشرقية، لكنّها انتشرت وتوسعت لكافة أنحاء المملكة. في البحرين يسمّونه قرقاعون، وفي قطر يسمونه قرنقعوه، وفي الكويت يسمونه زيّنا بالضبط: قرقيعان.

تبي تقرقع؟ ولا تبي تتقرقع؟ في كلتا الحالتين جهز كيستك، ورح للمحلّات هذي اللي تبيع الحلويّات بالجملة.. تلقى عندهم أنواع غريبة من الحلويات المستوردة، بلجيكي، ايطالي، ياباني، وعماني. حلويات من كل أرجاء المعمورة.

المحل موجود في طيبة، بس قبل لا تروح له أحذر من الأمهات في طيبة لأنهم خطر عليك وعلى البشرية كاملة وماراح يسمحون لأي أحد يوقف قدام هوسهم الاستهلاكي. 

باري الساس وامش جنب الجدار ولا تحاول تساعد أحد.. لا تكلم أحد.. لا تبتسم بوجه أحد وإذا عديت الطوفان الغاضب من الأمهات فأنت دخلت على جنّة من الحلويّات في محل الحمود للمكسرات والعطارة. 

حلويات من كل مكان بالعالم، وعمال المحل الأجانب يعرفون الأسامي الشعبية اللي نطلقها على الحلويات، لو تقول له بسكوت أبو ميزان ولا مثلثات بيعرف وشو ويجيبه لك. 

موجود له فرعين، واحد في الشرق والثاني في الشمال. وعلى بعد كيلومتر تقريبًا من فرعه في الشمال له فرع ثالث متخصص بمبيعات الجملة. 

وش اللي يميز حلويات الرشيد؟ طاقمه بيرد على التلفون ويعلمك بالضبط وش اللي متوفر عندهم، وأنت بتنذهل وتقول ما شاء الله.. وشلون يقدر يذكر كل هذي المنتجات؟ 

رغم زحمة المحل الموسمية الا ان رفوفهم دايمًا متكدسة بما لذ وطاب من كل العالم. مهب بس حلويّات.. فيه قهوة وشاهي ومكسرات وحبوب الإفطار ومنتجات الحمية. 

من سنة ١٩٩٠ وهذا المحل يعتبر عدو دكاترة الأسنان الأول في المملكة، حلويّات ناصر العبيد عنده ١٠ فروع في الرياض والأحساء ولو تدخل أيّ فرع منهم بيجيك إحساس انك داخل مقصف مدرسة.

كل شيء متوفر عندهم، شبسات، حلويات، مكسرات، كتاكيت (جمع كتكات).

وإذا كنت أكبر من انك تتقرقع، وأصغر من انك تقرقع.. عندك هذي الأطباق تقدر تطلبها وتعيّشك أجواء القرقيعان بلحالك:

تبي النوستالجيا توصل لك عبر التذوق؟ جرّب الطبق هذا اللي كأنه أيّ حلى ممكن تتذكره فيه بسكوت شاهي. وفوق هذا كله: هو آسكريم.

الحلى هذا يجي طبق مختلف بالأحجام، وداخل الطبق طبقات متكررة من البسكوت والكريمة المثلجة. هذا الطبق إذا جربته فغالبًا بيعجبك، وإذا ما عجبك، افتح الصندوق، طلع مقص، قص لسانك لأنه ما يقدر يذوق، قفّل الصندوق.

نحب أم علي. نحب الكليجا. وش بيصير لو جمعناهم مع بعض؟ 

هذا كان اختراع حساب شعاع الشمس 👁 .

الاختراع الغريب هذا لذيذ جدًا ومحيّر، وزيّ ما يسمّون بعض الأطباق حفلة في فمّك، هذا الطبق هو حفلة طق في فمّك. 

الإقط هو من منتجات الألبان المجففة اللي كانوا أجدادنا يتناولونها في السعودية، تاريخها يرجع لقبل الإسلام في الجزيرة العربية، والإقط حامض جدًا، لأنه زبادي البدو، وشلون يصير حلو؟

في الحقيقة هذي ماهي دونات، هي الجزء الناقص من كل دونات.

من ألذ مخبوزات الرياض مخبز لوف يبدع لنا في طبق جديد يستحدث فيه ثنائية جديدة للتمر والإقط، داخل دونات. بالعافية عليكم. 

شكرًا لوقتك! خلّصنا لستة الحلويات، وعدنا الخميس الجاي في لستة جديدة عنوانها: العشر الأواخر هي وقت السلطة .