لستة ٣٥

يسقط الترند


ليه نكره الترند؟ الترند حركة مجتمعية تقتات على رغبة البشر اللحظية. يسمّونها موضة.. وبعضهم يسمّيها صيحة.. وهذا الأسم الأدق لأنك تنجرف خلف الترند ثم تصيح: أنا وش خلّاني اقسّط كروسون بتمارا؟ 

الترند شيء غير ثابت يتطور مع تطور البشرية، كل ما تطورنا اختلفت طريقة حياتنا.. كنا في مرّه من المرّات نظن ان الريد ڤيلڤیت هو أقوى ما توصلت له البشرية في الطعم. اليوم نسألك متى آخر مره أكلت كبكيك ريد ڤيلڤيت؟ راح الكبكيك، وراح الريد ڤيلڤيت، وسقط الترند. 

في هذي اللستة بنتكلم عن ٥ مطاعم ما تأثرت بالترند، ما زالت على حطّة يدّك، ما غيّرت في المنيو حقّها، اذا دخلتها فأنت كأنك داخل فيها بسنة ٢٠١٠، أو بسنة ٢٠٠٢، لأنهم ما يبغون يتغيّرون ومحافظين على تجربتهم نفسها. وأكلهم؟ لذيذ! 


المطعم الأول

شاتو مراكش

الأفضل، الأمثل، الأكمل من مطاعم الرياض التقليدية: ما تغيّر من سنة افتتاحه ١٩٩٥، المطعم متخبّي في الدور الثالث من مجمع الأندلس، 

ويقوده شيف ماهر جدًا اسمه الشيف حسن اللي يبدّع يوميًا بأطباقه المنوعه مثل: البسطيلة بالدجاج وهي تجربة حالية مالحة في فمّك.. قبل لا تقرر تتعشى فيه، عطهم اتصال وخلّهم يجهزون لك شعيرية مدفونة، بس لا تسحب عليهم. 


المطعم عريق، لدرجة انه عندهم سجل ذهبي وقّع عليه كل سفير مغربي شرّفنا في الرياض، ويخدمونك بالمستوى المغربي المعروف في حسن الضيافة، يعطونك شاهي ويوكلونك حلويّات ويعطرون ايدينك بموية الورد. 

ألذ شيء في هذي التحفة الفنية اللي على شكل مطعم هو الحلويات عندهم، ما لذّ وطاب من يدين الشيف حسن من الحلويات المغربية مثل: الشباكية، حلوية اللوز، الغريّبة وغيرها كثير. 


المطعم الثاني

كوبر شندني

كوبر شندني مطعم هندي عائلي مر بظروف عجيبة. اغلق له فرعين لأسباب اجبر عليها. اغلق فرع التحلية المشهور بعمرانه الهندي لأن صاحب الارض قرر ان ينهي ملكية العقار.. و فرعه الكبير على طريق الملك عبدالعزيز اغلق بسبب حديقة الملك سلمان الضخمة الي بتكون أجمل و أكبر حديقة في العالم.. الحمدالله انه ما زال شغّال، بس وين؟ 


في الحياة مول. متى آخر مره رحت لحياة مول؟ اذا رحت بتلقى هذا المطعم اللذيذ اللي له قصّة خاصة فيه: فتح في سنة ٢٠٠١، صاحبه تاجر سعودي كان يحب يسافر للهند. فقرر يفتح له مطعم هندي في الدمام على شكل القصور الحيدرأبادية.. توسع و فتح اكثر من فرع في المنطقة الشرقية و الرياض. وجاب معاه شيف هندي فنان ضبط وزنية البرياني والمسالا الهندي-سعودية.


مع التيكا مسالا حقّهم الحين صار عندك سبب تروح للحياة مول. 


المطعم الثالث

بعلبك

في نفس السنة اللي سجّل فيها سعيد العويران هدفه على بلجيكا تأسس هذا المطعم العريق، ومن هذاك اليوم ما وقّف يستقبل ثلاث أنواع من العصافير: عصافير ربّي في أعشاشهم بالشجر المجاور للمحل، وعصافير الحب لأنه هذا المكان الأول للديت عند الطيبين، وعصافير بطنك اللي تغرّد: هات لنا الشيش برك. 

الشيش برك أكله يسمّونها البعض آذان الشايب، وهي لحم مفروم ملفوف بعجين ومنقوع في لبن.. وهو أميز طبق عندهم في مطعم بعلبك. 

مطعم بعلبك يقدّم تجربة كلاسيكية أصيلة للمطعم البيروتي، ومكانه في منتصف زحمة طريق العروبة يخلّيه مكان هادئ ومريح، وأكله لذيذ. 


فاصل تعزية:

هذي رسالة تأبين لكل المطاعم والأماكن اللي سكّرت بسبّة الترند، 

القائمة طويلة، لكن فريق كلماشي يذكر هذي الأماكن: 


اليورومارشيه. اسواق الشعلة. فال للتزلج، اكشاك المجلات/الكتب الي داخل الأسواق. ماي واي كافي. الماسة الزرقاء. مقهى قف.

عبقرينو. داجن. مطعم كتشب. هابي لاند. عالم الزواحف. ستار سيتي. المرسى. عالم الثلج. 


مثل ما طيّحكم الترند، نتفائل انه يوم من الأيام بيرجعكم. 


المطعم الرابع

الرياض الصيني

مطعم الرياض الصيني هو أول مطعم صيني في الرياض، بس لو تسأل مدير المطعم عن جنسيته بيقولك انه مب صيني، هو تايواني. المطعم تحت تشغيل السيد وو، هذا فعلًا اسمه محنب عنصريين، السيد وو شخص لطيف جدًا أكرمنا بوقته وعلّمنا عن هذا المطعم: 

المطعم تأسس عام ١٩٨٦، كل الأثاث اللي عندهم ما تغيّر من افتتاحه.. قطع تراثية أثرية تملى المكان تجربة بصرية مميّزة تأخذك للصين.. أو تيوان. 


نتوقع اذا قلت للسيد وو أنت صيني؟ بيقولك: أنا من تيوان يا حيوان.. يمزح معك من دافع المحبة. 

جرّب من عندهم التابنياكي، أو الشوربة الحارة اللي هيّ أكثر من وجبة، هيّ فعالية. 


المطعم الخامس

فدركرز

متى آخر مره أكلت في مكان فيه بوفيه سلطة؟ 

مطعم فدركرز مب من المطاعم اللي تقدّم تجربة أصيلة، لكنه يقدّم تجربة أصيلة من نوعه الخاص: تجربة مطعم أمريكي فاتح بالرياض في سنة ٢٠٠٤، مطعم أمريكي يقدّم فطور وغداء وعشاء، يعيد تعبئة المشروبات مجانًا، وطبقه المميز ما زال التشيلي تشيز فرايز.

المطعم ما خضع للتغيرات في السوق، للحين يتوقع اننا نشتهي كاساديا ولا أصابع الجبن، الميزة عنده انه الكسديا حقّته كأنها نسخة أمريكية/مكسيكية من بيدزاء البيت. 

فدركرز للأسف عانى في وقت كورونا، وأغلق ٣ من أصل ٤ فروع له في الرياض، عشان تساعدهم افطر عندهم، واذا بتفطر منه افطر ساوثويست اومليت مع الهاشبراون السوتيه والتوست اللذيذ. 


خبر عاجل:

مطعم تاو لاونج، اللي في وقت ما في الرياض كان عنده أصعب طاولة ممكن تلقى حجز فيها.. بيرجع يفتح ثاني! 

ما عندنا كافة التفاصيل، بس إذا صار شيء بنعلمكم بقناة التيك-توك حقّتنا. تتابعونا هناك؟  


شارك هذي اللستة
التعليقات

آفاد الهندي وين راح ، ومطعم الجزر الأندنوسية ودار القهوة

Han قبل ١٨ يومًا

وين شيزان يا اخوان؟ جمبري بوري وكثر حبحر. حبحر حار هندي موب سعودي. شيزان ياخوان. شيزان ياچدعان.

عاشق شيزان قبل شهر واحد

تطبيق حيهم الي يحجز فطور في مزرعة موجود ف ابل ستور ؟

عبدالله قبل شهر واحد

فنانين من جميع النواحي

الاستاذة داليا قبل شهر واحد

نبغى جده

SARA قبل شهر واحد

افااا وين المخازن الكبرى !!!

عليّه في العلالي قبل شهر واحد

شاهي، فطاير، كيك، كبدة حاشي لا، بس ذي لستات من كلماشي

الشاعر الجوعان قبل شهر واحد

فيه مطعم جنب الصيني اذا ماني غلطان هندي اسمه شيزان، احد اقدم المطاعم الهنديه الي بالرياض واحسنها، اذا مشتهي اكل هندي لا تروح الا هناك واطلب دجاج ٦٥ حقهم، اطلق شي بالمنيو، وتقعد ٥ دقايق تنتظره يبرد او تستعجل وتحرق لسانك مع الحماس

واحد الله يستر عليه قبل شهر واحد

اهنيكم على الاستمرارية والمشتوى اللي يبيض الوجه.. كأنه صابونة

ابن جلاجل قبل شهر واحد

متى تسوون لستة البرجر 👀

Yara قبل شهر واحد

We need an English version of this

Mo قبل شهر واحد

بس بجرب التعليقات ولازم تسوون لسته عن القصيم 🫰🏻💛

محمد قبل شهر واحد

متى تسوون لست لجدة

ليلى قبل شهر واحد

نبي اليومرشيه و عبقرينو رجعو طفولتنا

الطباخه الماهره قبل شهر واحد

يبيلكم تشوفون مطعم القصر الكوري محد يروح له بس لسا صامد بالتخصصي+ ليه ماتسوون ابلكيشن؟😌

لينو قبل شهر واحد

اليورومارشيه 😢

نحول قبل شهر واحد

مين ما عاد يشتهي اصابع الجبن!!!؟

قبل شهر واحد

مطعم بكين اللي قريب من العسكري

ا قبل شهر واحد

زمان يافن

Mashael قبل شهر واحد

كلماشي وبس والباقي خس

ساره قبل شهر واحد

رهيبين

يوسف قبل شهر واحد

نبي تحقيق في وضع المطعم الكوري اللي مرتز في التخصصي محد اعرفه راح له، فكوا عليه واحد من القراوى الذربين عندكم

مثنى قبل شهر واحد

عندي تعليق بالنسبة للبيكري. ارجو زيارة فارينا بيكري بعثمان بن عفان

د. حسام مدخلي قبل شهر واحد

تجننون افكار وكتابة

مها قبل شهر واحد

البراجون، قرية الثمامة، ملاهي الخيمة وملاهي عالم الطفل، مطاعم البحصلي، السرايا التركي، هوبر و العجمي، محل سرايا للجوالات في البديعة، مقهى القرش في التخصصي... حضارة سادت ثم بادت :(

عبدول قبل شهر واحد

مطعم بعلبك رهيب لكن المكان يذكرني بفلم the shining

الغريب الغامض قبل شهر واحد

استمرو الله يعطيكم العافية

ابو هادي قبل شهر واحد

رهيبين

Lama قبل شهر واحد
عطنا رأيك