يا هلا والله!

كيف رمضان معك؟ هل ما زلت تقابل ناس يقولون لك "مبارك عليك الشهر"؟ غلطانين. 

لأن بعد ما أكلت كلّ ما في طريقك و تأقلمت مع جدول رمضان، وصلنا لآخر الشهر…الفترة اللي بتعيد ترتيب أولوياتك من جديد. وين ناوي تصلّي قيام؟ ووين تتريض؟ حطينا لك توصيات في ثاني دليل لرمضان ٢٠٢٥.

‎ 

‎ 

‎ 

إذا تفضّل تصلّي في مسجد حيّكم، الله يتقبل! هذي الفقرة ما راح تفيدك. 

لكن إذا للحين تدوّر على مسجد شرح، ونظيف، والأهم أن الصلاة فيه تخلي عيونك تغبّش، هذي بعض توصياتنا:

• جامع الأميرة لطيفة بنت سلطان بن عبد العزيز | شارع التخصصي، حي الرحمانية 

غالبًا بتلقاه زحمة، بس إذا تسهلّت ولقيت مكان بتسمع صوت قراءة الشيخ ناصر القطامي شبهوه الكثير بصوت الشيخ ماهر المعيقلي.

• جامع الملك عبدالله بن عبدالعزيز | شارع العروبة، حي الرحمانية

بعد في حي الرحمانية، وحتى هو مشهور…بس نسبة إنك بتلقى فيه مكان أعلى من جامع الأميرة لطيفة.

• جامع الشيخ حمدان البلوي | حي اليرموك

تفاصيله المعمارية لحالها تخليك تخشع.

• جامع سليمان أبانمي | حي السليمانية

هذا الجامع جديد في حيّ السليمانية. واسع ونظيف.

• جامع الراجحي | الدائري الشرقي

تروح كل رمضان وإنت متطمّن إنهم مختارين أئمة رائعين.

‎ 

تدري إذا كنت تأكل ٥ سمبوسات على الفطور يبيلك تمشي ساعتين ونص عشان تحرقها؟ هدفنا هنا مب جلدك وتأنيب ضميرك، بس لا تتفاجأ إذا تغيّر مقاس ثوبك للعيد. هنا يجي سؤال: وين تتمرّن.. أو مثل ما سميناها (تتريض) في الرياض؟

وأخيرًا مدينة الرياض صارت صديقة السياكل مع المسار الرياضي! صح إنك بتلقاه زحمة، بس وش يعني بتروح له بالصيف؟ حلاته الحين! تحرّك من بعد العصر وحتى دقيقة قبل أذان المغرب وحولك بتحصّل أكثر من فاعل خير يفطّرك فطور خفيف لين ماترجع البيت وتخش بالثقيل.

ندري إن بكل الأحوال روحة للمعيقلية فيك فيك قبل العيد. استغل موسم الأمطار وتمشى في أجمل (وأحدث) محطات مترو الرياض.

أكيد بنضيف بادل ضمن قائمة الرياضات الرمضانية…ما ندري وش العلاقة بس شعبيتها تزيد في هذا الشهر مثل الكرة الطائرة. اختار الملعب اللي يناسبك واحجزه على تطبيق سنجاب.

النوادي المصغرة من الإضافات الجديدة لحدائق الرياض. حاليًا موجودة في حي الندى، حي حطين، وحي الغدير. يمديك تحجز المساحة من تطبيقهم.

هذا كان العدد الثاني من دليلنا المتواضع للشهر الفضيل. بالأخير، نبي نتركك مع هذا الدعاء، وتقبل الله صيامكم وقيامكم. 

فاتنا شي؟ عطنا رأيك، واكتب لنا رسالة!