لو لكل المدن لوحة ترحيبية تعلمك إنك وصلت،

مركز إثراء هو لوحة الظهران اللي تعلمك إنك وصلت لها بسلام. 

الظهران كانت مجرد أرض صحراوية قاحلة في منتصفها جبل "ظاهر"، عشان كذا تسمت الظهران.. لين تم اكتشاف فيها أول بئر نفط في المملكة، ومن هنا تغير شكل هذي الصحراء للأبد، وصارت أقوى مدن المملكة اقتصاديًا، والمقر الرئيسي لشركة أرامكو السعودية. 

وما كفّى أرامكو إنها تخلي الظهران الأقوى اقتصاديًا، وقررت تخليها الأقوى معرفيًا!

وسوت مركز إثراء.. مبادرة من أرامكو للاستثمار بطاقة جديدة أقوى من طاقة البترول: طاقة البشر الإبداعية.

في عام ٢٠٠٨ تم وضع حجر أساس المشروع من الملك عبدالله رحمة الله عليه، وافتتح المركز أبوابه عام ٢٠١٦ على يد الملك سلمان الله يحفظه.. وكان الهدف من هذا المشروع هو دعم اقتصاد المعرفة في المملكة، عشان تكون واحدة من أهم الوجهات اللي تساعدنا نتواصل مع العالم حضاريًا وثقافيًا.. وهذا اللي صار في عام ٢٠١٨، لما تم اختيارهم من مجلة TIME كأفضل ١٠٠ وجهة للزيارة.. واليوم، نختارها في كلماشي كأفضل وجهة معرفية تستحق الزيارة في الوطن العربي.

ولأن مين ما يحب إثراء، مين ما وده يعيش فيها كل يومه؟

في هذي اللستة بنعلمك كيف تعيش يومك داخل إثراء، جدول فيه أكل وقهوة وأفلام واسترخاء وقراءة وعلم، جدول تقدر تعيشه مع أخوياك، ومع عائلتك، ومع أطفالك، ومع نفسك.

هذي الحيرة بتجيك كل ما دخلت، لأن كل موقف في إثراء هو بوابة لتجربة جديدة -فعليًا-، عشان كذا لازم توقف مؤقتًا في مواقف رقم ثلاثة وتبدأ أول تجربة.. تتغدى.

واحد من أفضل اللي يقدمون بيتزا في الرياض.. جاء من حي السليمانية، عشان ينافس كل بيتزا نابولية في الشرقية.. في إثراء!

مطعم بيتزا بار بمينيو إيطالي بسيط من صفحة وحدة.. وهذا موب عيب، هذي ميزة تعلمك إنهم مركزين علـي وش العناصر المميزة اللي يبون يقدمونها لك.. عندهم ألذ بيتزا بافلو موزاريلا ممكن تذوقها، مع أنواع مكرونة مختلفة بس لا تبعد عن البيني بينك، ومعها سلطة الكوسة اللي بتخلي عيونك من اللذاذة مفتوحة، وتختمها بتراميسو يعلق في مخكم وين ما رحتوا وجيتوا.. المكان هادئ ومريح ورايق، يناسب تبدأ فيه يومك الإثرائي. 

فريقنا يحب مواقف رقم ١ بالشتاء، ومواقف رقم ٥ بالصيف..

لأن في موقف رقم ١ بتوقف سيارتك وتمشي لمسافة طويلة، بس بتصادفك مناظر جميلة لين توصل لبوابة المركز، بتشوف فيها النوافير والجلسات الأرضية في وسط الزرع، والفود تركس، ومشهد بديع للمبنى من بعيد خاصة لما تغرب الشمس.

ومواقف رقم ٥ نحبها في الصيف لسبب عقلاني وحيد: بتوصل للباب بسرعة قبل تذبحك الشمس. . فبناءً على فصول السنة، قرر.

ما يحتاج نقول ارفع راسك وتأمل هذا الصرح الكبير لما تنزل من السيارة، لأنك تلقائيًا ومهما اعتدت إنك تزور إثراء، يبقى للمبنى هيبته اللي تخليك صعب عليك تتابع خطواتك بدون تتأمله وتركز فيه.. هذا المبنى اللي تشوفه صممته شركة نرويجية اسمها "سنوهيتا" بعد ما فازت بالمسابقة الدولية اللي سوتها أرامكو لتصميم مركز إثراء.

واجهة مبنى إثراء عبارة عن أنابيب فولاذية مطوية طولها ٣٦٠ كم، يعني لو فردتها بتتعدى منفذ الكويت.. بس وش سالفتها؟ هل هدفها بس جمالي؟.. لا.

مبنى إثراء مبني من الداخل بتربة جمعوها من مختلف مناطق المملكة، واستخدموا الأسلوب القديم في البناء وهو دكّ التربة بطريقة تخلي المبنى مقاوم للحريق وعازل للصوت ويتحكم بالرطوبة اللي تتميز فيها المنطقة الشرقية، والأنابيب تسهل تدفّق الهواء الحار والرطوبة أو الغبار اللي ممكن يأثر بالمبنى وتخلي حرارة المبنى الداخلية أخف مهما كانت درجة الحرارة الشرقية في الخارج، وهذا يوفر الطاقة ويقلل استهلاك الكهرباء بسبب عزل الحرارة، عشان كذا خذوا الجائزة الذهبية في تصنيف عالمي بمجال المباني الصديقة للبيئة. 

ولو تفكر ليه كذا تصميمه غريب وإيش سالفة الصخور الأربعة الموزعة بشكل عشوائي: تصميمه الصخري يحاكي الطبيعة الجغرافية للمملكة، مع فلسفة زمنية يعكسها كل دور في هذا المبنى:

الدور الأرضي يمثل الماضي، وهو اللي فيه المتحف وأرشيف أرامكو.

الدور الأول يمثل الحاضر، اللي فيه العروض الحية والمسرح والسينما.

والدور العلوي يمثل المستقبل، اللي فيه المكتبة الضخمة وبرج إثراء ومختبر الأفكار.

أيًا كانت البوابة اللي بتدخل منها في الصيف ولا بالشتاء في مواقف ٣ أو ٥، فيه ريحة قهوة بتعلمك وين لازم تروح بدون نوصف لك المكان.

مقهى نص... من المقاهي الشرقاوية المميزة اللي تشبه إثراء، وهذا اللي يخلينا ما نستغرب وجوده في المركز، صار المقهى هو المسؤول الأول عن ترويق الزوار والقُراء قبل يبدون يومهم في إثراء.

لما تنتظر قهوتك تخلص التفت يسار وبتلقى لوحة اقتباسات، هذي اللوحة كل أسبوع تتغير وتعرض اقتباس جديد من أدباء وشعراء وروائيين من حول العالم، فلو زرتهم اكتب لنا تعليقك في آخر اللستة وعلمنا وش كان اقتباس الاسبوع.

في عشرات الأشياء اللي تقدر تسويها داخل ذا المبنى، سواء كنت لحالك ولا معك أحد فيه مكان بيلمّك في إثراء.. عشان كذا بنرشّح لك تجارب فردية، وجماعية، وعائلية.

بالعادة عند كل أحد تصور لشكل المكتبات العامة اللي ما ترفع سقف توقعاتك فيه: تصميم كلاسيكي حاد الزوايا، فرشة بيج، أرفف كتب خشبية غامقة، أثاث أخضر مع بني، كتمة.. لكن إثراء صعبوها على اللي بعدهم وخلوك تتوقع إن كل مكتبة عامة لازم تكون زيهم، أجمل وأكشخ وأفخم مكتبة، وأكثرها فنّا وكسر للحدود الاعتيادية لشكل المكتبات العامة بالسعودية.. مجرد ما تحط رجلك على الدرج الكهربائي وتشوف كمية الجدران البيضاء والأنوار والتماثل في البناء وحتى توزيع أرفف الكتب، بتخليك تنفصل عن كل شيء وراك وتتخيل إنك دخلت عالم مختلف، وتنسى من وين جيت، وتركز على وجهتك: الكتب.

المكتبة تتكون من أربع أدوار:

الدور الأول مخصص لكتب الأطفال، بس مسموح لك تكون طفل داخل المكتبة، جرّب تقرأ لك قصة على الماشي لأن مختاراتهم رهيبة..

الدور الثاني أغلبه منطقة عرض للكتب ومنطقة جلوس واسترخاء، فيها مقهى المكتبة اللي فيه مساحة للجلسة فيه، وهو الدور الوحيد اللي بتسمع فيه أصوات الناس عالية على عكس باقي الأدوار..

الدور الثالث هو أكبر أدوار المكتبة وفيه أغلب مقتنياتها، بتلقى فيه الكتب بمختلف المواضيع من الفلسفة لين كتب التدبير المنزلي..

والدور الرابع وهو الأجمل بالنسبة لنا، من هناك تقدر تشوف كل المبنى بطريقة مخيفة من جمال عمارتها، هناك يحبون يذاكرون ويشتغلون أغلب أهل الشرقية، على الأطراف وبين ممرات الكتب بتلقى جلسات موزعة بشكل عشوائي بس جميل، وبكل مكان بلتقى أحد منغمس لحاله ولا مسوي جلسة همس مع اصدقاه يذاكرون أو يشتغلون، وفيه أجهزة كمبيوتر موزعة بالمكان تقدر تستخدمها مجانًا لو تبي تبحث عن شيء أو تذاكر فيها.

والحين، بنرشّح لك كتب تقدر تخلصها وتاخذ منها جرعتك المعرفية أو الترفيهية بشكل سريع، وتقدر تسأل أُمناء المكتبة وراح يساعدونك تلقى أماكنهم، ويعلمونك لو فيه منها نسخة مطبوعة أو الكترونية أو سمعية تقدر تشغلها بجوالك من تطبيقهم وتتمشى بين أرفف الكتب:

كتاب "العالق في يوم أحد" للكاتب السعودي عبدالله ناصر، عبارة عن مجموعة قصصية قصيرة بديعة ومضحكة ومبكية وفلسفية، بتشبيهات وأسلوب إبداعي ما شفناه في أيّ من القصص القصيرة السعودية.. الكتاب خفيف ولطيف ومنتب قادر توقف تتنفس لما نتنقل من قصة لقصة، فلو بتطلب قهوتك من مقهى المكتبة، تراها بتبرد.

ديوان الأهلة للشاعر السوداني محمد عبدالباري، ولد الرياض اللي سكن أوروبا لفترة، من الشعّار الشباب القلائل اللي تقدر تقول إنه أعاد إحياء القصيدة العربية الحديثة بمواضيعها الدينية والفلسفية والسياسية، غير إنه في وجهة نظر كاتب هذي اللستة: رومنسي جدًا رغم إنه ترعرع في حي الجرّادية هه.. لو تبي تعرف الشاعر أكثر ننصحك تشوف مقابلته في بودكاست فنجان هنا.

كتاب العادات الذرية للكاتب جيمس كلير، هذا الكتاب بيعيد تشكيل طريقة تفكيرك بأسلوب حياتك وقراراتك وعاداتك السيئة اللي لا إراديًا صرت تعتبرها جزء من شخصيتك بدل تكون معضلة لازم تنحل، راح يساعدك تتبّع العادات والسلوكيات الصغيرة اللي تغييرها بيخلق تأثير تراكمي كبير داخلك.. غالبًا ما راح تخلصه بجلسة وحدة بسبب طوله، بس نضمن لك إنك بتطلع منه بفائدة كبيرة من جلسة وحدة فقط، وبتطلع من إثراء تشتريه.

ولو ما ودّك تقرأ.. يمكن تصادف جيتك وحدة من نقاشات نادي القراءة الخاص بإثراء، تلقى جدول نقاشات الكتب لين بداية ٢٠٢٥ هنا، ويحدثونها كل شهر.

إثراء موب بس أسلوب ترفيه، موب بس متاحف وكتب وأفلام ومسرح.. إثراء عندها مهمة كبيرة وهي تنمية المواهب في مختلف القطاعات الإبداعية والثقافية، ووحدة من أهم برامجهم التعليمية هي أكاديمية إثراء اللي يقدمون فيها دورات في الأدب، الفن والتصميم، العلوم والتكنولوجيا، الأفلام والفنون الأدائية، الموسيقى.. وما بيمر شهر إلا بتلقى لك دورة تناسب جوك، من كيف تسوي كوب بالخزف أو تتعلم الخط الديواني، لين كيف تبيع فكرة فيلمك للمستثمرين أو تسوي بودكاستك الخاص.

ومقسمين دوراتهم بطريقة ذكية لثلاثة أنواع بتشوفها معنونة جنب كل دورة:

انغمر: دورات قصيرة تبدأ من ٣ ساعات لمدة يومين إلى ٥ أيام.. للمبتدئين اللي ودهم يتعرفون على مجال معين.

توسّع: دورات تبدأ من ٤ ساعات لمدة ٣ أيام إلى أسبوع.. للي ودهم يتعمقون أكثر بمجال اهتمامهم.

أشرق: دورات لمدة ٨ ساعات من أسبوع إلى ١٠ أيام.. وتكون للمحترفين واللي مهتمين بمجال معين ويبون يزيدون معرفتهم فيه بطريقة مكثفة وفيها تسليم مهام وواجبات لكل دورة وأحيان فعاليات ميدانية.

تقدر تشيّك وش الدورات الجاية من هنا

ليه حطيناه تجربة جماعية موب فردية؟.. لأن الفن يكتمل لما تناقشه، معارض إثراء الفنية تجربة تستحق الحضور، اختيارهم للمعارض وحرصهم على مواضيعها وفلسفتها والمشاكل اللي تحلها، يخليها لحظة يقدر يستمتع فيها ويفهمها ويتفاعل معها كل أحد من الطفل إلى كبير السن..وبتشوف فيه معرض دائم اسمه "أرامكوراما": اللي ينعرض فيه تاريخ وإرشيف حصري عن أرامكو والمملكة في حقبة البحث الأولى عن البترول في المنطقة الشرقية. 

مسرح إثراء من المسارح القليلة الفعالة باستمرار على مدار السنة، وعندهم مجتمعهم الخاص، مثل ما فيه نادي قراءة في المكتبة، عندهم نادي ومجتمع مسرحي.. تصميمه الجميل يخليه يستوعب كل أنواع الفنون على خشبته، يقدمون فعاليات متنوعة على مدار السنة عالمية ومحلية، في الموسيقى والمسرح وحتى السيرك، وقد عرضوا اورسكترا كاملة لفيلم هاري بوتر، تتابعه لمدة ٣ ساعات مع عرض حي لموسيقى الفيلم!.. تقدر تعرف جدولهم الجاي من هنا.

عِش زي طفل مع أطفالك، في متحف الأطفال.. المتحف الأول من نوعة في المملكة، يعيش فيه الطفل تجارب تفاعلية بطابع تعليمي يسمونه أهل التربية (التعليم بالترفيه)، يتعرفون فيه الأطفال على مواضيع تعليمية كبيرة ولكن بأسلوب ممتع، مثل الفن الإسلامي والعلوم والبيئة، وغيرها من الورشات المتغيرة طوال السنة.

اندهش مع أهلك في معرض الطاقة، اللي بتعيش فيه رحلة من الاكتشافات اللي بتعلمك تفاصيل عن علم الطاقة واستخراج البترول، بعروض تفاعلية وتقنية حديثة تخلي تجربة العلم أكثر إثارة للاهتمام.

في كل الأعياد والمناسبات الوطنية إثراء يسوون احتفالاتهم الخاصة، من عروض مسرحية وفعاليات في الساحات الخارجية، تقدر تزورهم في الأعياد واليوم الوطني ويوم التأسيس.

في عام ١٩٣٦ تم حفر بئر بمدينة الدمام في منطقة توقعوا إن بيكون فيها كمية كبيرة من البترول، لكن بعد سنتين قرروا يوقفون حفر بسبب الاستهلاك الكبير للموارد البشرية والصناعية بدون نتائج واضحة.. وفي نفس اليوم اللي اجتمعوا فيه مجلس الإدارة في ٣ مارس ١٩٣٨، جتهم برقية إن البئر انفجر بالبترول، وجلس ينتج بدون توقف لمدة ٤٤ سنة!.

اكتشف البئر السعودي خميس بن رمثان اللي وصفه الجيولوجي (طوم بارغر) في كتابة "تحت القبة الزرقاء":

"في الصحراء لا يتوه خميس أبدًا، لأنه بالإضافة إلى حاسته السادسة التي بمكانة بوصلة دفينة لا تخطئ، كان لديه ذاكرة مدهشة تمكنه من تذكر موقع في الصحراء كان قد مر به وهو شاب، أو اتجاه موقع بئر سمع عنه قبل عشر سنوات"

طيب، وش علاقة بئر الخير في إثراء؟.. تم بناء إثراء بجانب البئر!، عشان يعكسون المعاني العميقة والتاريخ الكبير اللي تحمله هذي المنطقة تحديدًا مقارنة بأي مكان ممكن يبنون فيه إثراء.

"منحوتة نبع الضياء".. المنحوتة اللي عبارة عن شجرة تطفو في المنتصف وتتوسطها كل الصخور المبني منها المركز وكأنها قلب إثراء النابض، صاحب هذا العمل الفني البديع هو الفنان الإيطالي "جوسيبي بينوني"، اللي كان هدفه يعكس مكانة وأهمية الطبيعة في هذا المبنى كونه صديق للبيئة، وكذلك كون إثراء مبنية في قلب منطقة الظهران اللي بدأت منها أول عملية إنتاج للنفط في المملكة!.. تقدرون تشوفون المنحوتة أول ما تدخلون المتحف، وطول الوقت بتصيرون تدورون حول الشجرة لما تنتقلون من معرض للثاني.. فنبع الضياء بيرافقكم طوال الوقت.

خلص يومك؟ لا.. منتب طالع خارج حدود ذا الصرح الضخم، ارجع موقف رقم ٣، وراك لحمة وفحمة تختم فيه يومك.

بعد ٣ فروع في الرياض، جاء لحمة وفحمة من شوارع الرياض لإثراء عشان يبيع "أكل شوارع".. لما تدخل لا توقف قدام المينيو محتار، نقنق على "ميبل شرمب"، لين يجيك "برجر الترافل"، ثم كملها بـ"برتي فرايز"، وقفل اليوم بواحد من عسكريماتهم بالنكهات الغريبة، مثل: حلاو البقر، علكة مستكة، حلاو طحينية.

لفيت بأهلك أو أخوياك كل مكان في إثراء؟، شفت تاريخ أرامكو بالمتحف؟ حللت لوحة فنية معاصرة وفهمت رسالتها ولا ما فهمتها؟ عرفت في معرض الطاقة معلومات جديدة واندهشت كأنك رجعت طفل؟

هذي كانت لستتنا عن تجربة يوم كامل في مركز إثراء، نتمنى إنها كانت مليانة تجارب ومعلومات إثرائية تخلي تجربة زيارتك الجاية للمنطقة الشرقية أكثر متعة ومعرفة.

هذي اللستة برعاية مبادرة إثراء المحتوى العربي المقدمة من إثراء،

ودورهم بإنهم ينشّطون القطاع الثقافي ويدعمون صنّاع المحتوى المرئي والمقروء والمسموع بالسعودية. 

إثراء وثقوا بالمحتوى اللي نقدمه في كلماشي ودعمونا في تنفيذ هذي اللستة، 

حتى انهم دعموا أكثر من 53 مشروع من شركات ناشئة ومتوسطة بمبالغ توصل لـ 30 مليون ريال!

وإذا تبي تعرف أكثر عن المبادرة، ادخل موقعهم من هنا