مدينة الرياض تقع على هضبة نجد، وتتوسّط واديين: وادي حنيفة ووادي السليّ، لكن بين هذي الواديين عشرات الأودية ومئات المطلّات اللي يستمتع سكّان الرياض بالتنزّه فيها. 

فيه شيّين في الحياة حاول إنك تلحق عليها: تشوف مسلسلك قبل لا يحرقه تويتر، وتستمتع بشتاء الرياض قبل لا يجي الصيف. 

كيف تستمتع بشتاء الرياض؟ سوّ كل شي ما يمديك تسويه بالصيف: تروش الظهر، اجلس في جلسات المطاعم الخارجية، وأهم شيء.. أهم شيء: اكشت في مطل.

هذا أكبر وأشهر وادي بالرياض: وادي حنيفة يوصل طوله 120 كيلو متر ورغم الجلسات المطلة على الوادي حلوة، لكن كثير من الناس يحب يحط فرشته تحت في الوادي؛ لطبيعته الطوبوغرافية اللي توزع الرياح بشكل منعش وتخلّي الجو ألطف.

جزء الوادي اللي يمر بالدرعية جلساته مغلقة حاليًا وجاري تطوير المنطقة لتكون ضمن مشروع المسار الرياضي وهو متنزه طوله أكثر من 135 كيلو متر يمتد من شرق الرياض إلى غربها، لكن إذا بغيت تجلس في الوادي ننصحك بمنطقة وادي أوبير، هناك فيه جلسات مجهزّة عند الوادي تطل على بحيرة وإذا كنت محظوظ يمكن تشوف سرب من البط يمر فيها. مين جاب البط للرياض؟ 

لأن وادي حنيفة كبير واختيارات المطلّات فيه كثير اخترنا لكم 2 منها:

وادي صفار هو وادي متشعب من وادي حنيفة، وهو خيارك الأفضل إذا بغيت مكان هادي مقارنة بالزحمة في مطلات الرياض وأماكن الكشتات، مخطط الوادي حاز على جائزة عالمية كأحد المواقع الطبيعية الرئيسية في المملكة. 

إذا تروح لحي السفارات وما تعرف حديقة النفل حبّينا نقولك نص عمرك يسلم عليك، الحديقة هذي بمناظرها الخلّابة وبوابتها الحديدية تحسسك إنك دخلت رواية أدبية، حتى لو رحت حي السفارات عشان تتقهوى جرب تشرب قهوتك قدام المطل في هذي الحديقة.

اللي يميز وادي نمار هو إنه أكثر وادي مليان مناظر طبيعية رهيبة، تمشية وحدة في الوادي بتمر فيها على أنواع من الحياة الفطرية والطبيعة الجغرافية اللي ما تعودت إنك تشوفها، فجأة بتشوف شلّال، ثم سد، ثم بحيرة مليانة سمك، ثم بط في البحيرة، ثم ناس يوكلون البط خبز. دورة حياة الطبيعة في منظر خلّآب. 

من الأعمال اللي جاري العمل عليها في الوادي هو مطل أعالي الرياض اللي توه ما انبنى لكن أمانة الرياض أعلنت عن مسابقة لأفضل تصميم له، والجائزة الأولى لفئة فرق العمل هي: 75 ألف ريال سعودي، عشان تمخمخ بالتصميم يبيلك مكان رايق، زيّ المطل الجاي:

المطل يبهرك، يبهرك كيف إنك كنت ماسك زحمة السويدي قبل شوي والحين صار هدوء فجأة، هدوء خارجي وهدوء داخلك بعد. سحر المكان هذا إنه يساعدك على السرحان وحتى لو كنت رايح لحالك بتكتشف هناك إنك ما تقدر تجلس لحالك، هناك أنت بتجلس مع سجّة الهاجوس.

وادي لبن، مافيه لبن، ولا حتى موية، إلا إذا جا مطر. هذا الشتاء صار فيه حركة جديدة، تحت الجسر المعلّق بتشوف جلسات كثيرة للإيجار، بدال لا تتقروش بفرشتك ورواقك واختيار مكان مناسب، تقدر تروح هناك وتستأجر جلسة جاهزة بـ50 ريال للساعة، أو افرش جلستك في المطل الجاي:

في هذا المطل بتطل على الجزء الهادي من الرياض، تجلس وتعطي المدينة ظهرك وتريّح عينك من أضواء المدينة وتقدر تمد نظرك لأبعد حدود؛ لأن مافيه مباني ولا ناطحات سحاب توقفه. هذا المكان الرايق ما ينقصه إلا شاهي حبق سكر مضبوط ونقال علوم.

هذي اختياراتنا لأفضل المطلات في الرياض، بس إذا زان الجو زانت الرياض كلها، أي ارتفاع نسبي عن سطح الأرض هو مكان محتمل لفرشة، وإذا ما عندك فرشة أبو عبدالله وأبو وليد عندهم، اتصل بس وشف وين أرضهم عشان تروح وتستأجر جلسة مفروشة وجاهزة لك في أحد المخططات، أو إذا تفضل مكان معين كلمهم وموب مقصرين معك:

أبو عبدالله
0500492103

أبو وليد

0555026708