الدجاج كائن وضيع، بس مفيد. الطريقة الوحيدة اللي قرر فيها الدجاح يتعايش معنا وما ينقرض انه يصير أكل لذيذ للبشر، والبشرية المتوحشة ما قصرت معه. حوّلت متوسط العمر المتوقع للدجاجة لجولة واحدة في مصنع حديث. 🐔

لديربي الكوليسترول في قوانين خاصة: مافيه فائز واحد، بس خمس فائزين بفئات مختلفة، ليه؟ لأن كل أحد يحب دجاجه المقلي.

سبق ومدحنا شاورمتهم، بس اليوم نمدح دجاجهم المقلي.. وللأمانة مقصود ما عندهم دجاج مقلي، عندهم بروست. والبروست هو دجاج مقلي بصيغه سعودية خاصة، محيطه مقرمش ولبه طري.. وزيّ هبّات مطاعم ومقاهي الكويت، مقصود يقدّم تجربة السجن لزبائنه ويقدّم هذا البروست على صحن من حديد.

لو تقعد في حديقة المنصورة في حيّ السويدي وتنصت جيدًا، تبي تسمع صوت قرمشة جاية من بعيد، إذا لاحقتها بتكتشف انه سيمفونية كاملة من القرمشة طالعة من اللي يأكلون محلي في مطعم ركن المختار، هذا المطعم يقدم طبق بروست بشكل كلاسيكي أصيل، وجودتهم مهب بس مسموعة، إلا مسموعة ومرئية ومحسوسة. كل شيء هناك مقلي صح، باحترافية عالية، وزبائن هذا المطعم زيارتهم له بالعادة تكون شبه اسبوعية. 

كنتاكي مثلًا ما نقدر نسميه بروست، هو دجاج مقلي. ودجاج مقلي لذيذ جدًا، خصيصًا اذا تخلّى عن عظمه. في لذة خاصة بتناول كنتاكي، وتأثير ثقافي كبير لهذا المطعم علينا. صاحب الوجه البشوش الكولونيل ساندرز سوّا فينا خير بهذا المطعم، وأمريكانا ما قصرت في تشغيل هذي السلسلة، إذا ودك تملك في فروع كنتاكي السعودية تراهم بينطرحون للاكتتاب العام قريبًا.

الحالة العجيبة لمطعم ركن الافندي، والنسخة الحديثة منه ركن الكرنيش مثيرة للاهتمام، مطعمين بنفس الجودة العالية، نفس الوصفة، نفس البروستد اللذيذ جدًا لكنهم منفصلين رغم التفاهم العالي بينهم، تطلب بعض الأحيان من الافندي، يجيك بكيسة الكورنيش، تطلب من الكورنيش، يجيك بكيسة الافندي، تطلب من الافندي، ويجيك بكيسة الافندي، بس تلقى علبة الحمص من الكورنيش. 

بعد بحث وتقصي ومكالمة اتصال وحده مع موظف استقبال الطلبات الودود جدًا شرحنا لنا وش اللي صار: الكورنيش هو مطعم انفصل عن الافندي مؤخرًا، الشريك السعودي كمّل بإدارة الافندي بينما الشريك السوري بدء مطعم الكورنيش. اثنينهم يستاهلون جائزة منفصلة لهم. 

مطعم قيف مي فايف هو مطعم ما يجي على بالك اذا أحد قال لك انه يبي دجاج مقلي لكن في الحقيقة هذا المطعم عنده واحد من ألذ الدجاج المقلي في المملكة، عنده نوعين: عادي وحرّاق. بس للإتساق مع قصة رحلة صاحب المطعم بين المطابخ العالمية سمّي العادي والحرّاق: بعلبك وبيسيفور حار هذي كانت لستة ديربي الكوليسترول، عندنا خمسة فائزين يستحقون تتعشى عليه في أي يوم من أيام الأسبوع. 

دايمًا نختم اللستة بتهكيرة لتطبيق مرسول، راعي هذي اللستة، وتهكيرة اليوم هي: الدجاج المقلي في ألذ حالة له هو لما يكون حار.. عشان يوصل طلبك لك أسرع تقدر تعطي موظف مرسول مكافأة أكبر عشان يقبل طلبك بسرعة ويجيك بسرعة وبعدين تتقاسم معه مخالفة ساهر.