مبروك! مطعم كودو جا له ولد. ابن مؤسس منيو كودو مصطفى حمادة قرر يفتح هذا المطعم المتخصص بالأكل السريع.

لكن المطعم بعيد كل البعد عن كودو، لأنه مخصص أغلب مساحته لخدمة السيّارات.

المطعم زي كثير غيره، يحاول يسوّي نسخة إن-ن-أوت in-n-out المشهور في ولاية كاليفورنيا، لكن اللي فعلًا يميزه انه لذيذ جدًا لدرجة انه يقارب لطعم البرقر المشهور في كاليفورنيا.

إذا أكلت هذا البرقر فأنت تحس بجودة كل مكوناته، تحس بجودة الخس، والطماطم، والخبز، وأهم شيء اللحم اللي يقعد ٢٤ ساعة فقط وإذا طوّل اكثر من ذلك يأكلونه العمال.

جودة المكونات هي العنصر الرئيسي اللي أعجبنا في هذا البرقر: الطماطم ما يقعد اكثر من ٣ ساعات عشان ما تصير لينة أكثر من اللازم والخس ينظف يومياً ولا يقعد اكثر من ١٥ ساعة.

‎ 

صاحب المطعم الشف أمجد من خريج جامعة ICCA في دبي - قسم المطبخ. 

الصدق، ان كل شي عندهم ننصح فيه. لأن كل شي يصنعونه من الصفر وبأعلى جودة ممكنة.

الكلاسيك البرقر حقهم في الوقت الحالي قد يكون الأفضل في الرياض.. من أول نظره ممكن تحسب انه برقر سماش،

لكن هو مجرد لحمة بلاك انقوس خفيفه مشوية تجي منها شريحتين مع جبنة أمريكي ذايبة، وبصل مشوي مكرمل بحرفة، وخس وطماطم طازج وصوص هوميز اللذيذ. تقدر تطلب منهم يضيفون مخلل!

بوكس السعادة هذا يجيك في صندوق فلين ويحتوي على أربعة أصناف: سلطة الملفوف الباردة -الكولسلو-، بطاطس وافل مقرمش، حبة ذرة غير مفتولة والأهم اجنحة الدجاج بصوص الحار/الحلو مع صلصة الرانش. هذي الصوصات يحضرونها بنفسهم في مطعمهم الداخلي. 

ساندويتش الجبنة المشوية -غريلد تشيز- هذي لذيذة لكنها مو بسيطة لأن فيها ٣ أنواع جبن: شيدر أصفر و شيدر أبيض وجبنة أمريكية. مع شوي رانش.. والأهم الأهم.. يجي معها صلصة طماطم كريمية حلوة. وفي سر في المنيو: تقدر تضيف شريحة برقر أو بيكون مع الجبنة المشوية.

دجاج ناجت لازم تأكله مع صوص الخردل بالعسل.

أوريو مقلية عشان تكمل وجبة اليوم المفتوح المدمرة.

‎ 

‎ 

كانت هذي ثامن لستاتنا في لستة "مطعم الأسبوع".

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب